އެފްރިކާ ކަޕް އޮފް ނޭޝަންސްގެ ފޯރިގަދަ ފައިނަލަށްފަހު، މުބާރާތުގެ ތަށި ސެނެގާލް އަތުން އަތުލައި އެ ގައުމަށް ހަރުކަށި ފިޔަވަޅު އެޅުމަށް އެދި މޮރޮކޯއިން ފުޓްބޯޅައިގެ މައި އިދާރާތަކަށް މައްސަލަ ހުށަހަޅައިފިއެވެ.

މޮރޮކޯގެ ފުޓްބޯޅަ ފެޑަރޭޝަނުން އެފްރިކާގެ ފުޓްބޯޅަ އެސޯސިއޭޝަން (ކެފް) އާއި ދުނިޔޭގެ ފުޓްބޯޅަ ޖަމިއްޔާ (ފީފާ) އަށް ފޮނުވި ސިޓީގައި ބުނެފައިވަނީ، މެޗުގެ ފޯރިގަދަވެފައި ވަނިކޮށް ސެނެގާލްގެ ކުޅުންތެރިން ދަނޑު ދޫކޮށް ދިޔަ މައްސަލާގައި އެ ގައުމަށް އަދަބު ދޭންޖެހޭ ކަމަށެވެ.

މި ހާދިސާ ހިނގަން މެދުވެރިވީ މެޗުގެ ފަހު މިނިޓުގައި ސެނެގާލުން ޖެހި ގޯލެއް ރެފްރީ ގަބޫލުނުކޮށް، އޭގެ ބަދަލުގައި މޮރޮކޯއަށް ޕެނަލްޓީއެއް ދިނުމާ ގުޅިގެންނެވެ. ރެފްރީގެ މި ނިންމުމާއެކު ސެނެގާލްގެ ކޯޗުގެ އެންގުމަށް، ތަރި ސާދިއޯ މާނޭ ފިޔަވައި ހުރިހާ ކުޅުންތެރިން ވަނީ ދަނޑުން ފައިބައިގެން ޗޭންޖިން ރޫމަށް ގޮސްފައެވެ. ސެނެގާލްގެ ކޯޗު ހިތްހަމަނުޖެހުން ފާޅުކުރީ، މި މުބާރާތުގައި ރެފްރީން މޮރޮކޯއަށް ނަހަމަ ގޮތުގައި އެހީތެރިވާ ކަމަށް ބުނެ އެހެން ގައުމުތަކުން ވެސް ޝަކުވާ ކުރަމުންދާ ދަނޑިވަޅެއްގައެވެ.

މެޗު މެދުކެނޑިފައި އޮތުމަށްފަހު ސެނެގާލްގެ ކުޅުންތެރިން އަލުން ދަނޑަށް އެރީ ގާތްގަނޑަކަށް 16 މިނިޓު ފަހުންނެވެ. ރިޕޯޓްތައް ބުނާ ގޮތުގައި ކުޅުންތެރިން އެނބުރި އައީ މާނޭ ޗޭންޖިން ރޫމަށް ގޮސް، މެޗު ފުރިހަމަކުރުމަށް އެދި އާދޭސް ކުރުމުންނެވެ. މި ހަމަނުޖެހުންތަކާ ހެދި ޕެނަލްޓީ ޖެހުމަށް ޖުމްލަ 24 މިނިޓުގެ ލަސްވުމެއް އައެވެ. މޮރޮކޯގެ ކޯޗު ވަލީދު ރެގްރާގީ ބުނި ގޮތުގައި، އެ ގައުމަށް ލިބުނު ޕެނަލްޓީ ނާކާމިޔާބުވީ އެހާ ގިނައިރު މަޑުކުރަން ޖެހުމުގެ ސަބަބުން ކުޅުންތެރިންގެ ފޯކަސް ގެއްލިގެންނެވެ.

މޮރޮކޯއިން ތުހުމަތުކުރާ ގޮތުގައި ސެނެގާލްގެ މި އަމަލަކީ ފުޓްބޯޅައިގެ ރޫހާ މުޅިން ޚިލާފު، އަދި މުޅި އެފްރިކާ ބައްރަށް ވެސް ލިބުނު ބޮޑު ލަދެކެވެ. އެ ގައުމުން ވަނީ ސެނެގާލުން ގަވާއިދާ ޚިލާފުވެފައިވާތީ މުބާރާތުގެ ނަތީޖާ ބަދަލުކޮށް، އެ ގައުމަށް ހައްގު އަދަބު ދިނުމަށް ގޮވާލާފައެވެ. ނަމަވެސް، ފުޓްބޯޅައިގެ ތާރީޚަށް ބަލާއިރު، ނިމިފައިވާ މެޗެއްގެ ނަތީޖާ މިފަދަ މައްސަލައެއްގައި ފީފާއިން ބަދަލުކުރުމަކީ ވަރަށް ނާދިރު ކަމެކެވެ.