ގާޒާ އިއާދަ ކުރުމުގެ އަނެއްކާވެސް ބޮޑު ގޮންޖެހުމެއް ކުރިމަތިވެފައިވާއިރު، ތަޖުރިބާކާރުން ބުނާ ގޮތުގައި ހަނގުރާމައިން ހަލާކުވެފައިވާ މި ސަރަހައްދު އަލުން ބިނާކުރުމުގެ މަގު ހުރީ އެ ސަރަހައްދުގެ ހަލާކުވެފައިވާ މަގުތަކުން އެކަނި ނޫން ކަމަށާއި، ކިޔަވައިދޭ ކްލާސްރޫމްތަކުން ވެސް ކަމަށެވެ.
ބައިނަލްއަގުވާމީ ތަރައްގީގެ މާހިރު ޕްރޮފެސާ ސުލްތާން ބަރަކާތާއި، ތައުލީމީ އަދި ސަގާފީ ކަންކަމުގެ މާހިރު ޕްރޮފެސާ އެލިސަން ފިޕްސް ވިދާޅުވާ ގޮތުގައި، ގާޒާއަށަ އެންމެ ދެމެހެއްޓެނިވި އަރައިގަތުމެއް ލިބޭނީ ތައުލީމުން ފެށިގެންނެވެ. އަލްޖަޒީރާގައި ޝާއިއުކުރެވިފައިވާ އެބޭފުޅުންގެ ގޮވާލެއްވުމުގައި، ސްކޫލްތަކާއި ޔުނިވާސިޓީތައް އަލުން ބިނާކުރުމާއި، މުދައްރިސުންނާއި ދަރިވަރުންނަށް ބާރުވެރިކުރުވުން، މާއްދީ ތަރައްގީގެ އުމްރާނީ ބިނާތައް އަލުން އިއާދަ ކުރުން ފަދައިން މުހިންމު ކަމަށް ބަޔާންކޮށްފައިވެއެވެ.
"އެހެން ގިނަ ފަހަރުވެސް، އަލުން ބިނާކުރުމުގައި އެންމެ ބޮޑަށް ސަމާލުކަން ދެނީ ހަމައެކަނި ކޮންކްރީޓާއި ދަގަނޑަށް،" ބަރަކާތް ވިދާޅުވިއެވެ. "ނަމަވެސް، މީހުންނަށް ކިޔަވައިގަތުމާއި، އުފެއްދުންތެރިވުމާއި، ލީޑަރުކަން ދިނުމުގެ ގާބިލްކަން އިތުރުކުރުމަށް އިންވެސްޓު ނުކޮށްފިނަމަ، ސުލްހަ އާއި ތަރައްގީގެ ބިންގާ ބަލިކަށިވެފައި ދެމިހުންނާނެއެވެ."
ފާއިތުވި އަހަރު ގާޒާގެ ތައުލީމީ ދާއިރާއަށް ބޮޑެތި ގެއްލުންތަކެއް ލިބިފައިވެއެވެ. ސްކޫލްތަކާއި، ޔުނިވާސިޓީތަކާއި، ލައިބްރަރީތައް ހަލާކުވެ ބިމާ ހަމަވެފައިވާއިރު، ގިނަ މުދައްރިސުންވަނީ ހިޖުރަކޮށްފައި ނުވަތަ މަރުވެފައެވެ. ނަމަވެސް، މި ހުރިހާ ގެއްލުންތަކެއްގެ ތެރޭގައި ވެސް ގާޒާގެ ތައުލީމީ މުޖުތަމައުވަނީ ވަގުތީ ހިޔާތަކާއި ވަގުތީ ތަންތަނުގައި ކިޔަވައިދިނުން ކުރިއަށް ގެންގޮސްފައިވައެވެ، މިއީ އެ ސަރަހައްދުގެ މުއައްސަސާތަކުގެ ހިތްވަރާއި ކެތްތެރިކަމުގެ ހެއްކެކެވެ.
"މި ކްލާސްރޫމްތައް، ޓެންޓުތަކުގެ ދަށުން ނަމަވެސް، ފިކުރާއި އުއްމީދުގެ ރައްކާތެރި ތަންތަނެވެ،" ފިޕްސް ފާހަގަކުރެއްވިއެވެ. "އެތަންތަނަކީ ގާޒާ އަލުން އާރާސްތުވުމުގެ ހިތެވެ – ކަރާމާތްތެރިކަމާއި އެކުވެރިކަން އަލުން ބިނާކުރެވޭ ތަނެވެ."
ބަރަކާތާއި ފިޕްސް ވަކާލާތު ކުރައްވަނީ އަލުން ބިނާކުރުމުގެ މަސައްކަތް ފަލަސްތީނީންގެ އަމިއްލަ ބާރުވެރިކަމުގެ ދަށުން ކުރިއަށް ގެންދަންޖެހޭނެ ކަމަށެވެ. އަދި ބައިނަލްއަގުވާމީ އެހީގެ މަސައްކަތްތަކުން ގިނަފަހަރަށް އެތަނުގެ ތަޖުރިބާކާރުންގެ ހުނަރު އިހުމާލުކުރާކަމަށް އިންޒާރުދެއްވައެވެ. އެބޭފުޅުން ބާރުއަޅުއްވަނީ ހަގީގީ އަލުން އާރާސްތުވުން ބޭރުން ތަންފީޒުކުރެވޭނެ އެއްޗެއް ނޫންކަމަށެވެ. "އަ "އަލުން ބިނާކުރުން ކުރެރެވެންޖެހޭނީ ފަލަސްތީނީންނާއެކު، އެބައިމީހުންނަށް ނޫނެވެ،" އެބޭފުޅުން ލިޔުއްވިއެވެ.
އެބޭފެބޭފުޅުންގެ މެސެޖް ގާޒާއަށަ ފުޅާވެގެންދެއެވެ. މި ލިޔުންތެރިން ދުނިޔޭގެ ޔުނިވާސިޓީތަކަށާއި، އެހީދޭ ފަރާތްތަކަށާއި، ސިޔާސަތު ކަނޑައަޅާ ފަރާތްތަކަށް ގޮވާލަނީ ފަލަސްތީނީ ތައުލީމީ މުއައްސަސާތަކާއެކު ދިގު މުއްދަތުގެ ބައިވެރިވުމުގެ ގުޅުންތައް ގާއިމުކުރުމަށެވެ – ހެޔޮއެދުމުގެ ގޮތުން ނޫން، އިންސާފާއި އިންސާނިއްޔަތުގެ ހައްގުގެ ގޮތުންނެވެ. މިފަދަ ގުޅުންތަކުން އިސްކަންދޭންވާނީ އަޑުއެހުމަށާއި، އެކުގައި އުފެއްދުންތެރިކަމަށާއި، އެކަކު އަނެކަކަށް އިހުތިރާމްކުރުމަށް ކަމަށް އެބޭފުޅުން ވިދާޅުވެއެވެ.
ކުރިއަށް ހުރި ގޮންޖެހުންތަކަކީ ވަރަށް އުނދަގޫ ކަންކަމެވެ. ސްކޫލްތައް އަލުން ބިނާކުރުމުގެ އިތުރުން، ގާޒާއިން ކުރިމަތިލާންޖެހެނީ އެސްބެސްޓޮސް ތައައްޔަރުވުން ފަދަ ތިމާވެށީގެ ނުރައްކާތަކާއި، މުދަލާބެހޭ ދެބަސްވުންތަކާއި، ހަނގުރާމައިގެ ނަފްސާނީ ޓްރޯމާއާއެވެ. ލިޔުންތެރިން ވިދާޅުވާގޮތުގައި، ތައުލީމަށް މި ހުރިހާ ކަމެއް ހައްލުކުރުމުގައި މުހިންމު ދައުރެއް އަދާކުރެވިދާނެއެވެ – އާ ޖީލަކަށް އެބައިމީހުންގެ މުޖުތަމައު ފަރުވާދީ އަލުން ބިނާކުރުމަށް ބޭނުންވާ އިލްމާއި ހުނަރު ދިނުމުގެ ގޮތުންނެވެ.
ތައުލީމަކީ ހަމައެކަނި މީހުން ވަޒީފާތަކަށް ތައްޔާރުކުރުމެއް ނޫނެވެ،" ބަރަކާތް އިތުރުކުރެއްވިއެވެ. "އެއީ ހަނދާން ދަމަހައްޓައި، ފާޑުވިސްނުން އާލާކޮށް، އަދި މުޖުތަމައުތަކަށް މާ ރަނގަޅު މުސްތަގުބަލެއް ހިޔާލުކުރުމަށް ބޭނުންވާ ވަސީލަތްތައް ދޭ އެއްޗެކެވެ."
ގާޒާގެ ކުދިން ކްލާސްރޫމްތަކަށް އަނބުރާ އައިސްފައިވާއިރު ބައެއް ކްލާސްރޫމްތައް ވަނީ ވީރާނާވެފައި، ބައެއް ކްލާސްތައް ހިންގެނީ އޮންލައިންކޮށް، އަދި އަނެއްބައި ކުދިން ކިޔަވަނީ ސަރަހައްދީ ހިޔާވަހިކަމުގެ ތަންތަނުގައި، އެކުދިންގެ ފިލާވަޅުތައް ވެގެން ގޮސްފައިވަނީ ދެކޮޅުވެރިކަމާއި ކެތްތެރިކަމުގެ ނިޝާންތަކަކަށެވެ. ތައުލީމީ ދާއިރާގައި މަސައްކަތްކުރާ މީހުންނާއި ދަރިވަރުންނަށް، ކޮންމެ ފިލާވަޅެއް ކިޔަވައިދިނުމަކީ އަލުން ބިނާކުރުމުގެ އަމަލެކެވެ.
