ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ ސީއީއޯ ޑރ. ވިޓާލީ ލިއުބިމޮވް މަގާމުން މިއަދު ވަކިކޮށްފި އެވެ.

އެކަން ހާމަކޮށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން މިރޭ "އެކްސް" ގައި ކުރި ޕޯސްޓެއްގައި ބުނީ މިފްކޯގެ ސީއީއޯގެ މަގާމުގެ އިތުރުން އެމްޑީގެ މަގާމުންވެސް ވިޓާލީ ވަކިކޮށްފައިވާ ކަމަށެވެ.

ވަކިކުރި ސަބަބެއް ޕީސީބީން ނުބުނެ އެވެ.

މިފްކޯގެ މެނޭޖިން ޑިރެކްޓަރުގެ މަގާމާ ރަސްމީކޮށް ވިޓާލީ ހަވާލުވެވަޑައިގަތީ މިދިޔަ ޑިސެމްބަރު 10 ވަނަ ދުވަހު އެވެ.

ޔުކްރެއިންގެ ރައްޔިތެއް ކަމަށްވާ ވިޓާލީ އަކީ ކުންފުނިތައް ނަގައި ކޮޅަށް ޖެހުމާއި ކުންފުނިތައް ހިންގުމުގައި 20 އަހަރުގެ ތަޖުރިބާ ލިބިފައިވާ ބޭފުޅެކެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެކުރިން ވިދާޅުވި ގޮތުގައި މިފްކޯއަށް ރާއްޖެއިން ބޭރުގެ ތަޖުރިބާކާރު ސީއީއޯއަކު ހޯދީ އެ ކުންފުންޏަކީ ކޮރަޕްޝަނާ ދުރު ކުންފުންޏަކަށް ހެދުމަށެވެ.

މިފްކޯގެ ސީއީއޯގެ މަގާމަށް ބިދޭސީއަކު ހަމަޖެއްސިއިރު އެ ކުންފުންޏަށް މާލީ ބޮޑެތި މައްސަލަތަކެއް ކުރިމަތިވެ 1.2 ބިލިއަން ރުފިޔާއަށް ވުރެ ބޮޑު ދަރަންޏެއް އޭރު އޮތެވެ.