ކުރީގެ ރައީސް މައުމޫން އަބްދުލްގައްޔޫމް އިސްވެ ހުންނަވާ އުފެއްދެވި މޯލްޑިވްސް ރިފޯމް މޫވްމެންޓް (އެމްއާރްއެމް) އިލެކްޝަންސް ކޮމިޝަން (އީސީ) އިން މިއަދު އުވާލައިފި އެވެ.
އެކަމާ ގުޅިގެން މައުމޫން މިއަދު ވިދާޅުވީ އެމްއާރްއެމް އުވާލާފައިވަނީ ގާނޫނާހިލާފަށް ކަމަށާއި އީސީގެ އެ ނިންމުމަށް ތަބާނުވާނެ ކަމަށެވެ.
އެމްއާރްއެމް އުވާލަން މީގެ ކުރިން، 2023 ގައިވެސް އީސީން ނިންމި އެވެ. އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ އެ ޕާޓީން އީސީއާ ދެކޮޅަށް ސިވިލް ކޯޓަށް މައްސަލަ އެއް ހުށަހެޅި އެވެ. ކޯޓުން ހުކުމްކުރީ އީސީގެ ނިންމުމަކީ ގާނޫނާ ހިލާފު ނިންމުމަކަށްވާތީވެ އަމަލު ނުކުރުމަށެވެ.
އޭގެފަހުން 3،000 މެންބަރުން ހަމަކުރަން އީސީން އެމްއާރްއެމަށް 3 މަސް ދުވަހުގެ މުއްދަތެއްދިނެވެ. އެ މުއްދަތުގެ ތެރޭގައިވެސް އެ އަދަދަށް މެންބަރުން ހަމައެއް ނުކުރެވުނެވެ.
ގާނޫނުގައި ލާޒިމުކުރާ އަދަދަށް މެންބަރުން ހަމަނުވާތީވެ އެމްއާރްއެމް އުވާލުމުގެ މަސައްކަތް ފެށިކަން އޮގަސްޓު 25، 2024 ގައި އީސީން އިއުލާންކުރި އެވެ. ސިޔާސީ ހަރަކާތްތައް ނުހިންގުމަށާއި ދަރަންޏެއްވާނަމަ އެމްއާރްއެމްގެ އޮފީހަށް ހުށަހަޅަން އީސީން އެދުނެވެ. އެ މުއްދަތުގައި އެމްއާރްއެމުން އެއްވެސް އެއްޗެއް އީސީއަށް އަންގާފައިނުވެ އެވެ.
ނޮވެމްބަރު 20، 2019 ގައި ރަޖިސްޓްރީ ކުރި އެމްއާރްއެމް އުވާލާފައިވާއިރު އެ ޕާޓީގެ ދަފްތަރުގައި 1،867 މެންބަރުން އެބަތިއްބެވެ.
މިއީ މައުމޫން އިސްވެ ހުންނަވާ އުފެއްދެވި 3 ވަނަ ޕާޓީ އެވެ. މީގެ ކުރިން އެމަނިކުފާނު އުފެއްދެވި ދިވެހި ރައްޔިތުންގެ ޕާޓީ (ޑިއާރްޕީ) އުވާލީ 3،000 މެންބަރުން ހަމަނުވުމުންނެވެ. އެ ޕާޓީއަށް ފަހު މައުމޫން އިސްވެ ހުންނަވާ އުފެއްދެވީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެވެ. އެމްއާރްއެމް އުފެއްދެވީ ރައީސް އަބްދުﷲ ޔާމީންއާ ދެމެދު އުފެދުނު ނުތަނަވަސްކަމުގެ ތެރެއިންނެވެ.
