އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ މައްޗަށް ކުރަނީ އެ ކުންފުނީގެ ލިޔެކިޔުންތަކެއް ނައްތާލަން މަސައްކަތް ކުރިކަމުގެ ތުހުމަތު ކަމަށް ފުލުހުން މިއަދު ބުނެފިއެވެ.
ފުލުހުންގެ މީޑިއާ އޮފިޝަލް ވިދާޅުވީ އެ މައްސަލައާ ގުޅިގެން ފަޒުލްއާ ސުވާލުކޮށް ބަޔާން ނަގާފައިވާ ކަމަށެވެ.
"ފަޒުލްގެ މައްޗަށް ކުރަނީ އެޗްޑީސީގެ ރަސްމީ ލިޔެކިޔުންތަކެއް ނައްތާލަން މަސައްކަތް ކުރިކަމުގެ ތުހުމަތު،" އޮފިޝަލް ވިދާޅުވިއެވެ.
ފޯޖުކޮށްފައިވާ ލިޔުމެއް ތައްޔާރުކޮށްގެން ފަޒުލްގެ ބޭބެ، މުހައްމަދު ފަޒީލް ރަޝީދަށް ގޯއްޗެއް ކަނޑާފައިދިން މައްސަލައެއް ފެންމަތިވެފައި ވަނިކޮށް އޭނާ ވަނީ މަގާމުން އިސްތިއުފާދެއްވާފައެވެ. އިސްތިއުފާދެއްވީ މައްސަލައިގެ ތަހުގީގަށް ޖާގަދިނުމުގެ ގޮތުން ޕީސީބީން އޭނާ ސަސްޕެންޑުކުރުމުންނެވެ.
ހައުސިން މިނިސްޓްރީން ބުނީ ފަޒުލްގެ ބޭބެ ފަޒީލަކީ ބިންވެރިޔާ ސްކީމްގެ ދަށުން ގޯއްޗަށް ޝަރުތުހަމަވާ ބޭފުޅެއް ނޫން ކަމަށެވެ. އެ މައްސަލައާ ގުޅިގެން އެމްޑަބްލިއުއެސްސީގެ ޑެޕިއުޓީ މެނެޖިން ޑިރެކްޓަރުކަމުން ފަޒީލް ވަނީ ސަސްޕެންޑުކޮށްފައެވެ.
