ދަ ހޯކްސް ކުންފުނީގެ ބޯޓަކުން ގަވާއިދާ ޚިލާފަށް ގިނަ އަދަދެއްގެ ސިނގިރޭޓް ރާއްޖެ އެތެރެކުރި މައްސަލައިގައި ދައުވާ ކުރަން ފޮނުވަނީ ކޮންބައެއްގެ މައްޗަށްކަން ސާފުވާންޖެހޭ ކަމަށް ރައްޔިތުންގެ މަޖިލީހުގެ ނާއިބު ރައީސް އަދި ދިއްގަރު ދައިރާގެ މެންބަރު އަހުމަދު ނާޒިމް ވިދާޅުވެއްޖެއެވެ.
ދަ ހޯކްސް ކުންފުނީގެ ބޯޓުން ގަވާއިދާ ޚިލާފަށް ސިނގިރޭޓް އެތެރެކުރި މައްސަލަ، މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އިން ދަނީ ބަލަމުންނެވެ.
241 ކޮމިޓީގައިވެސް ހިމެނިވަޑައިގަންނަވާ ނާޒިމް ވިދާޅުވީ، ސިގިރޭޓް އެތެރެކުރި މައްސަލައިގެ ތަހުގީގުގެ 90 ޕަސެންޓް ނިމިފައިވާ ކަަމަށް މޯލްޑިވްސް ކަސްޓަމްސް ސާވިސް އިން ކޮމިޓީއަށް މައުލޫމާތު ދީފައިވާ ކަމަށެވެ.
ނަމަވެސް ކަސްޓަމުން ކޮމިޓީއަށް ފޮނުވި ޖަވާބުގައި، އެ މައްސަލައިގައި ދައުވާ ކުރަން ޕްރޮސިކިއުޓާރ ޖެނެރަލް (ޕީޖީ) އަށް ފޮނުވަން ނިންމާފައިވަނީ ކޮންބައެއްގެ މައްޗަށްކަން ސާފު ނޫން ކަމަށެވެ.
"ކަސްޓަމްސްއިން ފޮނުވި ޖަވާބުގައި އޮތީ އެކަމުގައި ތުހުމަތު ކުރެވޭ އެ ކުންފުނީގެ މުވައްޒަފުންގެ ފިންގާ ޕްރިންޓް އަދި ފޯނު އެނަލިސިސް ރިޕޯޓް ފުުހުންގެ ޚިދުމަތުން ލިބުމުން އެ މައްސަލައިގައި ދައުވާ ކޮށްދިނުމަށް އެދި ޕީޖީ އޮފީހަށް ފޮނުވާނެ ކަމަށް" ނާޒިމް ވިދާޅުވިއެވެ.
އޭނާ ވިދާޅުވީ އެ މައްސަލައިގައި ދައުވ ާކުރަނީ މުވައްޒަފުންނަށްތޯ، ނުވަތަ ފަޅުވެރިނަށްތޯ، ހޯކްސްއަށްތޯ، އަދި ބޯޓުގެ ކެޕްޓަނަށްތޯ، ކަސްޓަމްސްއިން ފޮނުވި ޖަވާބުން ސާފު ނުވާކަމަށެވެ.
"އެނގެން ބޭނުންވަނީ އެ މައްސަލައިގައި ޗާޖް ކުރަނީ ހޯކްސްއަށްތޯ، ފަޅުވެރިންނަށްތޯ، ނުވަތަ ކެޕްޓަނަށްތޯ، ސާފުކޮށް އެނގޭ ގޮތަކަށް ނޫން ޖަވާބު ފޮނުވާފައި އޮތީ،" ނާޒިމް ވިދާޅުވިއެވެ.
އެހެންކަމުން އެކަންތައް ސާފުވާ ގޮތަށް އަލުން އެ މައްސަލައަށް ޖަވާބުދޭން ކަސްޓަމްސްގައި ކޮމިޓީން އެދިފައިވާ ކަމަށްވެސް ނާޒިމް ވިދާޅުވިއެވެ.
