ރާއްޖެއަށް ކުރިމަތިވި ސުނާމީ ކާރިސާއަށް 20 އަހަރު ފުރުމާ ގުޅިގެން މި ކާރިސާގެ ހަނދާން އާކުރުމުގެ ގޮތުން ޚާއްސަ ސުކޫތެއް މިއަދު ގެނެސްފިއެވެ.
މި ސުކޫތު ގެނައީ ސުނާމީގެ ރާޅު 2004 ވަނަ އަހަރު ރާއްޖެއަށް އެރި ކަމަށް ރިކޯޑު ކުރެވިފައިވާ ވަގުތުގައެވެ. އެއީ، 26 ޑިސެމްބަރު 2004 ވަނަ ދުވަހުގެ ހެނދުނު 9:23 އެވެ.
ސަރުކާރުގެ ހުރިހާ މުއައްސަސާއެއްގެ ކުރިމަތީގައި ކުރިއަށް ގެންދިޔަ ހަމަހިމޭން ކަމުގެ މި ސުކޫތު ކޮޅުގައި ސަރުކާރުގެ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ. މާލޭ ސަރަހައްދުގެ ބަޔެއް އަމިއްލަ އޮފީސްތަކުގެ މުވައްޒަފުންވެސް ބޭރަށް ނުކުމެ މި ސުކޫތު ކޮޅުގައި ވަނީ ބައިވެރިވެފައެވެ.
ސުނާމީ ކާރިސާގައި ރާއްޖޭގައި މީހުން ދިރިއުޅޭ 9 ރަށެއް ފިޔަވައި އެހެން ހުރިހާ ރަށަކަށް ރާޅުގެ އަސަރު ކޮށްފައިވެއެވެ. އަދި 82 ދިވެހިން ނިޔާވެ، 26 ދިވެހިން ވީނުވީއެއް ނޭނގި ގެއްލި، 15000 މީހުންގެ ގެދޮރު ވަނީ ގެއްލިފައިވެ އެވެ.
