ރާއްޖޭގެ ޓޫރިޒަމްގެ ބާނީންގެ ފައިދާ އިދިކޮޅު އެމްޑީޕީން ދަނީ ނަގަމުން ކަމަށާއި އެ ޕާޓީއަށް އެކަންވިޔަ ނުދީ، ރިސޯޓް ވިޔަފާރިވެރިން ރައްޔިތުންގެ ފަޅިއަށް އެރުމަށް ރައީސް ޑރ. މުހައްމަދު މުއިއްޒު އެދިވަޑައިގެންފި އެވެ.

ސަރުކާރަށް އެއް އަހަރު ފުރުމާ ގުޅިގެން ސޯޝަލް ސެންޓަރުގައި މިހާރު ކުރިއަށްދާ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ 1970ގެ ފަހުކޮޅުން ފެށިގެން އަމިއްލަ ގޮތުން ޓޫރިޒަމް ވިޔަފާރި ފައްޓަވައި އެ ދާއިރާ ކުރިއަށްގެންދެވި ބޭފުޅުންނަށް ޝުކުރު އަދާކުރައްވާ ކަމަށެވެ. އަދި އެ ބޭފުޅުން ކިބައިން އެމަނިކުފާނު އެދިވަޑައިގަންނަވަނީ ގައުމަށާއި ރައްޔިތުންނަށް ހެވެއް ނެދޭ ސިޔާސީ ލީޑަރުން އެބޭފުޅުންގެ ނާޖައިޒު ފައިދާ ނެގުމަށް ފުރުސަތު ނުދެއްވުމަށް ކަމަށެވެ.

"ތިބޭފުޅުންގެ ނާޖާއިޒު ފައިދާ، ސިޔާސީ ގޮތުން ގައުމަށް ލޯބިނުކުރާ ދިވެހިންގެ ފަޅީގައި ނެތް ސިޔާސީ މީހުންނަށް ތިބޭފުޅުންގެ ފައިދާ ނާޖައިޒު ގޮތުގައި ނެގިޔަނުދެއްވާށޭ. އަޅުގަނޑުމެން މިތިބީ ރައްޔިތުންގެ ފަޅީގައި ރައްޔިތުންނާއެކީގައި ތިޔަ ހިދުމަތްތެރި އިސްރަށްވެހިން އަޅުގަނޑުމެންނާއެކު ވަޑައިގަތުމަކީ ގައުމަށް އެންމެ ފައިދާހުރި ގޮތް،" ރައީސް ވިދާޅުވި އެވެ.

ޓޫރިޒަމް ދާއިރާއިން ރާއްޖެއަށް ލިބޭ ޖުމްލަ އާމްދަނިއަކީ ހަތަރު ބިލިއަން ރުފިޔާ ކަމަށެވެ. އޭގެ ތެރެއިން ރާއްޖޭގެ ބޭންކުތަކަށް މާރު ކުރަނީ އެއް ބިލިއަން ޑޮލަރު ކަމަށް ރައީސް ވިދާޅުވި އެވެ.

ސަރުކާރު ހިއްސާވާ ކުންފުނިތަކުން ކަޅު ބާޒާރުން ޑޮލަރު ގަންނަން ޖެހިފައިވާތީ ދައުލަތުން ބޮޑު ބުރައެއް އުފުލަން ޖެހިފައިވާ ކަމަށެވެ.

މީގެ އިތުރުން ރައީސް ވިދާޅުވީ އެމްއެމްއޭއިން އަލަށް ހެދި އެ ގަވާއިދުގެ ސަބަބުން  ރާއްޖެއިން ބޭރަށް ފުރާ ކޮންމެ ދިވެއްސަކަށް އެއާޕޯޓުން ދޫކުރަމުންދާ 500 ޑޮލަރު 1،000 ޑޮލަރަށް އިތުރުވެގެންދާނެ ކަމަށެވެ. ގަވާއިދު ރަނގަޅަށް ތަންފީޒުކުރެވޭނަމަ 2026 ވަނަ އަހަރުގެ ފުރަތަމަ ކުއާޓާއިން ފެށިގެން ބޭރަށް ފުރާ ކޮންމެ ދިވެއްސަކަށް 1،000 ޑޮލަރު ދޫކުރެވޭނެ ކަމަށާއި، އެއީ އެކި ބޭނުންތަކަށް ރާއްޖެއިން ބޭރަށް ފުރާ ދިވެހިންނަށް ވަރަށް ބޮޑަށް ފައިދާވާނެ ކަމެއް ކަމުގައި ރައީސް ވިދާޅުވި އެވެ.