ރާއްޖޭގެ ޓޫރިޒަމް ދާއިރާގެ އެންމެ ބޮޑު ކުންފުނިތަކުގެ ތެރެއިގައި ހިމެނޭ ޔުނިވާސަލް އެންޓްޕްރައިސަސްއާއި ޗަމްޕާލާސް ހޯލްޑިންގްސް، ކޮމަންޑޫ ހޯލްޑިންގްސް އަދި ކުރެއްދޫ ހޯލްޑިންގްސްއިން، އެމްއެމްއޭގެ އާ ގަވާއިދާ އެއްގޮތަށް ޑޮލަރު މާރުނުކުރާނެ ކަމަށް ބުނެފި އެވެ.
އެމްއެމްއޭއިން އަލަށް އެކުލަވައިލި އާ ގަވާއިދުގައިވާ ގޮތުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ރާއްޖޭގެ ބޭންކަކަށް ޑޮލަރު މާރު ކުރަން މަޖުބޫރުވާނެ އެވެ.
އެ ގަވާއިދަށް ފެށީ މިދިޔަ މަހުގެ އެއްވަނަ ދުވަހުން ފެށިގެންނެވެ.
ޔުނިވާސަލް އެންޓަޕްރައިސަސްގެ ޗެއާމަން، މުހައްމަދު އުމަރު މަނިކު (އެމްޔޫ މަނިކު) ސޮއިކުރައްވާ އެމްއެމްއޭއަށް ފޮނުއްވި ސިޓީގައި ވިދާޅުވީ އެމްއެމްއޭގެ ގަވައިދަކީ ރަނގަޅަށް ވިސްނާނުލައި ހެދި ގަވައިދެއް ކަމަށެވެ.
އެގޮތުން ރިސޯޓުތަކުން މިހާރުވެސް ޓެކްސްގެ ގޮތުގައި ފައިސާ ދައްކަނީ ޑޮލަރުން ކަމަށެވެ. އަދި އޭގެ އިތުރުން ޖީއެސްޓީއާއި ރިސޯޓު މުވައްޒަފުންނަށް ދޭ މުސާރައާއި ގްރީން ޓެކްސްއާއި ސަޕްލަޔަރުންނާއި އަދި މާކެޓިންއާއި އެހެނިން ހަރަދުތައް ވެސް ކުރަމުންދަނީ ހަމަ ޑޮލަރުން ކަމަށް މަނިކު ވިދާޅުވި އެވެ.
އެހެންކަމުން އެ ގަވައިދަށް އަމަލުކުރެވެން ނެތް ކަމަށް ވެސް އޭނާ ވިދާޅުވި އެވެ.
އަދި އެ ގަވައިދުގެ ބަދަލުގައި ޕްރެކްޓިކަލް ގަވައިދުތައް ހެދުމަށް ވެސް އޭނާ ގޮވާލެއްވި އެވެ.
ޔުނިވާސަލްއަކީ ރާއްޖޭގައި އަށް ރިސޯޓު ހިންގަމުންދާ ކުންފުންޏެކެވެ.
