ރާއްޖެއެތެރެކުރާ ދުންފަތުގެ ބާވަތް ތަކުގެ ޑިޔުޓީ ރެއިން ފެށިގެން ބޮޑުވުމާއެކު ސިނގިރޭޓެއްގެ އަގު 14 ރުފިޔާ އާއި 15 އަށް އަރައިފިއެވެ.
ސަރުކާރުން ފޮނުވައި، ރައްޔިތުންގެ މަޖިލީހުން ފާސްކޮށްފައިވާ، ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނަށް 19 ވަނަ އިޞްލާޙު ގެނައުމުގެ ބިލު، ރޭގެވަގުތެއްގައި ރައީސް ތަސްދީގު ކުރެއްވުމާއެކު، ފިހާރަ، ކެފޭ، ރެސްޓޯރެންޓު ތަކުން ވިއްކަމުން އައި ސިނގިރޭޓެއްގެ އަގު ވަގުތުން 15 ރުފިޔާ އާއި 14 އަށް މައްޗަށް އަރައިގެން ދިޔައެވެ. އިއްޔެ އިރުއޮއްސުމާ ހަމައަށްވެސް، ވަކިން ސިނގިރޭޓެއްގެ އަގު 7 ރުފިޔާ އާއި 8 ރުފިޔާއަށް ލިބެން ހުއްޓެވެ.
ސިނގިރޭޓްގެ އަގު ބޮޑުތަނުން ކުއްލިއަކަށް އުފުލިގެން ދިޔައިރު، ގިނަ ތަންތަނުން ސިނގިރޭޓް ވިއްކަމުން ދިޔައީވެސް ލިމިޓްކޮށެވެ.
ރޭ ތަސްދީގު ކުރެވިގެން ދިޔަ ބިލުގައި ޑިޔުޓީ ބޮޑުވެގެންދިޔަ ބާވަތް ތަކުގެތެރޭގައި، ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކާއި، އިލެކްޓްރޯނިކް ސިގިރެޓް އަދި މިފަދަ ވޭޕްކުރުމަށް ބޭނުންކުރާ އާލާތްތަކާއި، ހީޓަޑް ޓޮބޭކޯ ޕްރޮޑަކްޓްތަކާއި، ޓޮބޭކޯ ހީޓިންގ ޕްރޮޑަކްޓްތަކާއި، އެ އެއްޗެހީގެ ބައިބައިވެސް ހިމެނެއެވެ.
ހަމަ މި ޤާނޫނުގެ 7 ވަނަ މާއްދާގެ (ހ) ގައި ބަޔާންކޮށްފައިވާ ޗެޕްޓަރުތަކުގެ ތެރެއިން ޗެޕްޓަރ 24، ވަނީ އިޞްލާޙު ކުރައްވާފައެވެ. އެގޮތުން ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކުގެ އަގުތަކަށް އައި ބަދަލުތައް ތަފްޞީލީ ގޮތެއްގައި ވަނީ ބަޔާން ކުރައްވާފައެވެ. އެބަދަލު ތަކަކީ؛
ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތައް؛
(ހ) މި ޗެޕްޓަރުގައި ހިމެނޭ ބާވަތްތަކުގެ ތެރެއިން ތިރީގައި ބަޔާންކޮށްފައިވާ ތަކެތި ފިޔަވައި މި ޗެޕްޓަރުގައި ހިމެނޭ އެހެނިހެން ތަކެތީގެ ޑިއުޓީ މިންވަރު: 200 އިންސައްތަ، (ށ) ސިގިރެޓް؛
ޑިއުޓީ މިންވަރު: 50 އިންސައްތަ، އަދި ސިގިރެޓަކުން 8ރ. (އަށެއް ރުފިޔާ)،
(ނ) ބިޑި؛ ޑިއުޓީ މިންވަރު: 50 އިންސައްތަ، އަދި ބިޑިއަކުން 8ރ. (އަށެއް ރުފިޔާ)،
(ރ) އިލެކްޓްރޯނިކް ސިގިރެޓަށް ނުވަތަ ދުންފަތުގެ އިސްތިޢުމާލުކުރުމަށް ބޭނުންކުރާ އެނޫންވެސް އާލާތްތަކަށް އަޅާ ފްލޭވަރ އާއި ކެމިކަލް؛
ޑިއުޓީ މިންވަރު: 50 އިންސައްތަ، އަދި މިލިލީޓަރަކަށް 8ރ. (އަށެއް ރުފިޔާ)،
(ބ) ހީޓަޑް ޓޮބޭކޯ ޕްރޮޑަކްޓްސް ނުވަތަ ރޯކުރުމަކާ ނުލާ ހޫނުކޮށްގެން ބޭނުންކުރެވޭ ގޮތަށް އުފައްދާފައި ހުންނަ ދުންފަތުގެ އުފެއްދުންތައް (ކޮންސިއުމަބަލްސް)؛
-ޑިއުޓީ މިންވަރު: 50 އިންސައްތަ، އަދި ސްޓިކަކުން 8ރ. (އަށެއް ރުފިޔާ).
މީގެ އިތުރުން، 7 ވަނަ މާއްދާގެ (ހ) ގައި ބަޔާންކޮށްފައިވާ ޗެޕްޓަރުތަކުގެ ތެރެއިން ޗެޕްޓަރ 85 ގެ (ޒ) އަށްވެސް ވަނީ އިޞްލާޙު ގެންނަވާފައެވެ. އެގޮތުން އިލެކްޓްރޯނިކު ސިނގިރޭޓާއި މިފަދަ ވޭޕްކުރުމަށް ބޭނުންކުރާ އާލާތްތަކާއި، ޓޮބޭކޯ ހީޓިންގ ޕްރޮޑަކްޓްތަކުން ނަގާ ޑިއުޓީގެ މިންވަރަކީ 200 އިންސައްތަކަމުގައި ބަޔާންކުރައްވާފައިވެއެވެ. މީގެ އިތުރުންވެސް މުހިންމު އިޞްލާޙުތައް މި ޤާނޫނަށް ވަނީ ގެންނަވާފައެވެ.
ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނަށް ގެނެވުނު އިޞްލާޙުތަކާ ގުޅިގެން އެކުލަވާލަންޖެހޭ ނުވަތަ އިޞްލާޙުކުރަންޖެހޭ ގަވާއިދުތަކާއި އުސޫލުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 30 ދުވަހުގެ ތެރޭގައި ހަދައި، ދިވެހިސަރުކާރުގެ ގެޒެޓުގައި ޝާއިޢު ކުރައްވަންޖެހޭނެ ކަމުގައި ބަޔާން ކުރައްވާފައިވެއެވެ.
ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނަށް 19 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ ތަޞްދީޤުކުރެއްވުމާއެކު، މި ޤާނޫނު ރޭގައި ވަނީ ދިވެހިސަރުކާރުގެ ގެޒެޓުގައި ޝާއިޢު ކުރައްވާފައެވެ. މި ޤާނޫނަށް ޢަމަލު ކުރަން ފަށަން އޮތީ 1 ނޮވެންބަރު 2024 (އިއްޔެ) އިން ފެށިގެންނެވެ.
