ޓެކްސް ބޮޑުކުރާއިރު ވަކިދާއިރާއަކުން ޓެކްސް ބޮޑުކުރާތީ އެކަމާމެދު މާމިގިލީ ދާއިރާގެ މެމްބަރު ގާސިމް އިބްރާހިމް ނުރުހުން ފާޅުކުރައްވައިފިއެވެ.
ސަރުކާރުން ހުށަހަޅާފައިވާ ސަޕްލިމެންޓްރީ ބަޖެޓް ދިރާސާ ކުރަން އެކުލަވާލި ކޮމިޓީގައި ވާހަކަ ދައްކަވަމުން ގާސިމް ވިދާޅުވީ މިސްރާބު މިހާރު ދާގޮތުން ގައުމު ސަލާމަތް ނުކުރެވޭނެ ކަމަށެވެ. އެހެންވެ ގައުމު ސަލާމަތް ކުރަން އަޅަންޖެހޭ ފިޔަވަޅުތައްވެސް އަޅަންޖެހޭނެ ކަމަށެވެ.
ގާސިމް ވިދާޅުވީ ޓެކްސް ބޮޑުކުރާތީ އެކަމާމެދު ކަންބޮޑުވުންތަކެއް އެބަހުރި ކަމަށެވެ. އެގޮތުން ވަކި ދާއިރާއަކުން ޓެކްސް ބޮޑުކުރުމާ ދެކޮޅަށް ގާސިމް ވިދާޅުވީ އެއީ ސަރުކާރުން ހަދާ ވަރަށް ބޮޑު ގޯހެއް ކަމަށެވެ.
"އިޤްތިސާދީ ގޮތުން ހަމަޖެހިގެންދާ އިޤްތިޞާދެއް ހަލާކުކޮށްލުމަށްޓަކައި، އެއްޗެއް ފެލަންވާނީވެސް ވަކިވަރަކަށް، އެެއަށްވުރެ އިތުރަށް ފެލައިފިއްޔާ ދެންދާނީ ފަޅައިގެން، އެހެންވީމަ އަޅުގަނޑު ދަންނަވާލަން ބޭނުންވަނީ ޓެކްސް ބޮޑު ކުރައްވަން ތި ވިދާޅުވަނީ އެންމެ ދާއިރާއަކުންނޭ. އެހެން ނުހައްދަވާށޭ، އެއީ ގޯހެކޭ، އިންތިހާ ދަރަޖައިގެ ގޯހެެއް،" ގާސިމް ވިދާޅުވިއެވެ.
ގާސިމް އިތުރަށް ވިދާޅުވީ މިއަހަރުގެ ޖޫން މަހުގެ ތެރޭގައި ސަރުކާރުގެ ޚަރަދުތައް ކުޑަކުރައްވާނެ ކަމަށް ރައީސް ޑރ. މުއިއްޒު ވިދާޅުވިނަމަވެސް، އެފަދަ ބަދަލެއް މިހާތަނަށް ފެނިގެންނުދާ ކަމަށެވެ. އެކަން ރައީސަށް ނުކުރެއްވިގެން އުޅޭ ސަބަބުވެސް އެނގިވަޑައިގަންނަވާ ކަމަށްވެސް ގާސިމް ވިދާޅުވިއެވެ.
ރައީސަށް ގާސިމް ގޮވާލެއްވީ ގައުމު އިނދަޖެހުނަނުދީ، ގައުމު ސަލާމަތް ކުރުމަށެވެ.
"މަނިކުފާނު އަޅުއްވަންޖެހޭ ކޮންމެ ފިޔަވަޅެއްވެސް އަޅުއްވައިގެން ނޫން ގޮތަކަށް މިކަމުން ސަލާމަތެއް ނުވާނެ، އަޅުގަނޑުމެން ސަލާމަތްކޮށްދޭން ނާންނާނެ އެހެން ބަޔަކު. އެހެންވީމަ ކުރައްވަންޖެހުނު ކޮންމެ ކަމެއް ވެސް ކުރަށްވަންވާނެ،" ޤާސިމް ވިދާޅުވިއެވެ.
