ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް، މިދިޔަ ރޯދަ މަހު ރަށްރަށުގެ ގޭގޭގެ ކަރަންޓް ބިލްތަކުގެ ޑިސްކައުންޓްގެ ގޮތުގައި 25 މިލިޔަން ރުފިޔާ ދީފައިވާ ކަމަށް ފެނަކަ ކޯޕަރޭޝަނުން ބުނެފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވީ، ރައީސްގެ ނިންމެވުމާއި އެގޮތަށް ރޯދަ މަހުގެ ކަރަންޓާއި ފެނުގެ ބިލު ތަކުން ޖުމްލަ 25 މިލިއަން ރުފިޔާގެ ޑިސްކައުންޓް ދީފައިވާ ކަމަށެވެ. އެ ޑިސްކައުންޓް ދިނީ އެވްރެޖް ބިލަކަށްވާ ވަރަށް ކަމަށާއި އެ މިންގަނޑަށް ނުފެތޭ ބިލު ތަކުންވެސް 10 ޕަސެންޓުގެ ޑިސްކައުންޓް ދީފައިވާނެ ކަމަށްވެސް ވިދާޅުވިއެވެ.

އޭނާ ވިދާޅުވީ، ފެނާއި ކަރަންޓަށް އާއްމުން ކުރާ ޚަރަދު ކުޑަކުރަން ހޭލުންތެރި ކުރުވުމުގެ ޕްރޮގްރާމް ތަކެއް ހިންގަންޖެހޭ ކަމަށެވެ. އެފަދަ ޕްރޮގްރާމްތައް ފަށާފައިވާއިރު، އެ ދުވަހަކު ކޮންމެ ގެއެއްގެ ކަރަންޓް މީޓަރަށް އަރާ އަދަދު އަމިއްލައަށް ބަލައިލެވޭނެ ސިސްޓަމެއް ގާއިމް ކުރުމަށްޓަކައި، ސްމާޓް މީޓާ ޕްރޮޖެކްއް ފަށާފައިވާ ކަމަށްވެސް އޭނާ ވިދާޅުވިއެވެ.

އެ ޕްރޮގްރާމް މިހާރު ދ. އަތޮޅުގައި ކުރިއަށް ދާއިރު އެ އަތޮޅު ކުޑަހުވަދޫގައި އެ ސިސްޓަމް ގާއިމްކޮށް ނިމިފައިވާ ކަމަށްވެސް އޭނާ ވިދާޅުވިއެވެ. އޭނާ ވިދާޅުވީ ކުރިށް އޮތް ތަނުގައި އެރަށުގެ ގޭގޭގެ ކަރަންޓް ބިލަށް އަރާ އަދަދު ބަލައިލެވޭނެ ކަމަށެވެ. އޭރުން އެމީހަކު ބޭނުންވާ އަދަދަށް ކަރަންޓް ބިލަށް އަރާވަރު ކޮންޓްރޯލް ކުރުމުގެ ފުރުސަތު ލިބޭނެ ކަމަށްވެސް ވިދާޅުވިއެވެ.