ދިވެހި ރާއްޖެއިން ބޭރުގެ ގައުމު ތަކަށް އައްޔަން ކުރެއްވުމަށް ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މަޖިލީހަށް ފޮނުއްވި ބޭފުޅުންގެ ތެރެއިން އަށް ބޭފުޅަކަށް ރުހުން ދިނުމަށް މަޖިލީހުގެ ހާރިޖީ ގުޅުންތަކުގެ ކޮމިޓީން ފާސް ކޮށްފިއެވެ.

ރުހުން ހޯއްދެވުމަށް ރައީސް 10 ބޭފުޅެއްގެ ނަން މަޖިލިސް އަށް ފޮނުއްވިއެވެ. އޭގެތެރެއިން ޗައިނާގައި ހުންނަވާ ރާއްޖޭގެ ސަފީރު ކަމަށް އައްޔަން ކުރައްވަން ފޮނުވާފައިވާ ކުރީގެ ގަވަރުނަރު ޑރ. ފަޒީލް ނަޖީބާއި ބަންގްލަދޭޝްގައި ހުންނަވާ ރާއްޖޭގެ ސަފީރު ކަމަށް އައްޔަން ކުރައްވަން ފޮނުއްވާފައިވާ ޝިއުނީން ރަޝީދުގެ ނަމާމެދު ކޮމިޓީން ގޮތެއް ނިންމާފައެއްނުވެއެވެ. އެއީ އެ ދެ ބޭފުޅެއްގެ ވަނަވަރު މިހާތަނަށް ކޯޓުން ސާފުވެފައި ނުވާތީ އެބޭފުޅުންގެ އިންޓަވިއު ކުރިއަށް ގެންގޮސްފައި ނުވާތީއެވެ. އެހެންކަމުން އެ ދެބޭފުޅުންނަށް ރުހުންދޭން ފެނޭތޯ ކޮމިޓީގައި ވޯޓަށް އަހާފައި ނުވެއެވެ.

މަޖިލީހުން ރުހުން ދޭން ފެންނަކަމަށް ކޮމިޓީން ފާސްކުރި ބޭފުޅުން:

1- އެކުވެރި އަރަބި އިމާރާތުގައި ހުންނަވާ ސަފީރުކަމަށް މުހައްމަދު ހުސައިން ޝަރީފް

2- އިނގިރޭސިވިލާތަށް ކަނޑައަޅުއްވާ ސަފީރު ކަމަށް ޑރ. އިރުތިޝާމް އާދަމް

3- އދ. އަށް ކަނޑައަޅުއްވާ ދާއިމީ މަންދޫބަކަށް ޑރ. އަލީ ނަސީރު މުހައްމަދު

4- ސްރީލަންކާއަށް ކަނޑައަޅުއްވާ ސަފީރު ކަމަށް މައްސޫދު އިމާދު

5- މެލޭޝިޔާއަށް ކަނޑައަޅުއްވާ ސަފީރު ކަމަށް ޑރ. މަރިޔަމް ޝަބީނާ އަޙްމަދު

6- ބެލްޖިއަމަށް ކަނޑައަޅުއްވާ ސަފީރު ކަމަށް ގީލާ އަލީ

7- ޖެނީވާގައި ހުންނަ އދ.ގެ އޮފީސް ތަކަށް ކަނޑައަޅުއްވާ ދާއިމީ މަންދޫބަކަށް، ޑރ. ސަލްމާ ރަޝީދު

8- ސިންގަޕޫރަށް ކަނޑައަޅުއްވާ ސަފީރު ކަމަށް މުހައްމަދު ލުވައިޒް