މޯލްޑިވްސް މީޑިއާ ކައުންސިލް (އެމްއެމްސީ) ގެ މެދަ އިންތިހާބުގެ ވޯޓު ލެވޭ މީހުންގެ ދާއިމީ ލިސްޓް ހޯމް މިނިސްޓްރީން އާންމު ކޮށްފިއެވެ.
ހޯމް މިނިސްޓްރީން އާންމުކުރި އެމްއެމްސީގެ މެދަ އިންތިހާބުގައި ވޯޓުލުމަށް ރަޖިސްޓްރީ ކުރި ފަރާތްތަކުގެ ތެރެއިން ދާއިމީ ލިސްޓުގައި ތިބީ 85 މީހުންނެވެ.
މިއިންތިޚާބުގައި ހުސްވެފައިވާ މީޑިއާ ތަމްސީލް ކުރާ މެމްބަރުކަމުގެ މަޤާމަށް ޚަބަރު އޮންލައިގެން ޗީފް އެޑިޓަރ އަލީ އާދަމް ކުރިތިލައްވައެވެ.
މިއިންތިހާބު ބޭއްވުމަށް ހަމަޖެހިފައިވަނީ މިމަހުގެ 29 ވަނަ ދުވަހުގެ ހެނދުނު 10:00 އިން 11:00 އަށް ވެލާނާގެ ތިރީގައެވެ. އެމްއެމްސީއަށް ތިން މެމްބަރަކު އިންތިހާބު ކުރުމަށް ނިންމާފައިވަނީ އެމްއެމްސީއަށް އެންމެ ފަހުން އިންތިހާބުވި އަމިއްލަ ދެ މެމްބަރަކު އިސްތިއުފާ ދިނުމުންނާއި، މީޑިއާ ތަމްސީލް ކުރާ އެއް މެމްބަރެއްގެ ދައުރު ހަމަވާތީއެވެ.
މީޑިއާގެ އިދާރާތައް ތަމްސީލުކުރާ 8 މެންބަރުންނާއި ޢާންމުންގެ ތެރެއިން އިންތިޚާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށް އެކުލެވޭ މޯލްޑިވްސް މީޑިއާ ކައުންސިލުގެ މައިނގަޑު މަސައްކަތަކީ މީޑިއާގެ މިނިވަންކަން ޤާނޫނު ތަންދޭ ގޮތުގެމަތިން ވީހާވެސް ފުޅާދާއިރާއެއްގައި އެކަށައަޅައި އާލާކޮށް ދެމެހެއްޓުމެވެ.
