މާރާމާރީގެ މައްސަލައެއްގައި ފުލުހުން ހޯދަމުންދާ މީހަކު ފޮރުވައިގެން ގެންގުޅޭ ކަމަށް ތުހުމަތުކޮށް ހަތަރު މީހަކު ކޯޓު އަމުރުގެ ދަށުން ރޭ ހައްޔަރުކޮށްފިއެވެ.
ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން މިދިޔަ މަހު 15 ގައި ހޯދަން އިއުލާންކުރީ ސ. މަރަދޫފޭދޫ، ރަށްދެބައިގެ އިބްރާހިމް ފައިހް ނިޒާމް، 25، އެވެ.
އޭނާ ފޮރުވައިގެން ގެންގުޅޭ ކަމަށް ފުލުހުން ތުހުމަތު ކުރެ އެވެ. އަދި އެ މައްސަލައިގައި ރޭ ބަޔަކު ހައްޔަރުކޮށްފައިވާކަން ވެސް ފުލުހުން ކަށަވަރުކޮށްދިނެވެ. ހައްޔަރުކުރި މީހުން މިހާރު ވަނީ ބަންދުގެ މުއްދަތަށް ކޯޓަށް ހާޒިރުކޮށްފައެވެ.
އެނގިފައިވާ ގޮތުގައި އޭނާ ހޯދަމުން ދަނީ މިދިޔަ ޖެނުއަރީ، 14 ވަނަ ރޭގެ ދަންވަރު މާލޭގެ ކެފޭއަކަށް ވަދެ މީހަކު ޒަހަމުކޮށްލި ކަމަށް އޭނާގެ މައްޗަށް ތުހުމަތު ކުރެވޭތީއެވެ.
