މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުގެ މެންބަރުކަމުން، އެ ކުންފުނީގެ އެގްޒެކްޓިވް ޑިރެކްޓަރު މުހައްމަދު މިހާދާއި ނޮން-އެގްޒެކްޓިވް ޑިރެކްޓަރު ސަހަރު ވަހީދު ވަކިކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ، އެ ދެ ބޭފުޅުންވެސް އެމްއޭސީއެލްގެ ބޯޑުން ވަކިކުރަން ނިންމާފައިވަނީ މިއަދުން ފެށިގެން ކަމަށެވެ. ނަމަވެސް މި ދެ ބޭފުޅުން ބޯޑުން ވަކިކުރި ސީދާ ސަބަބެއް ޕީސީބީން ހާމަކޮށްފައެއް ނުވެއެވެ.

އެމްއޭސީއެލްގެ ބޯޑަށް 26 އެޕްރީލް 2025 ގައި އައްޔަންކުރެއްވި މުހައްމަދު މިހާދަކީ، އެ ކުންފުނީގެ ޗީފް ކޮމާޝަލް އޮފިސަރު (ސީސީއޯ) ގެ މަގާމުވެސް ފުރުއްވަމުން ގެންދަވާ ބޭފުޅެކެވެ. މާލީ އަދި ހިންގުމުގެ ދާއިރާގައި ގިނަ އަހަރުތަކެއްގެ ތަޖުރިބާ ހުންނެވި، ޔޫކޭގެ ސީމާ ޗާޓަޑް މެނޭޖްމަންޓް އެކައުންޓެންޓް މިހާދު ވަނީ މީގެކުރިން އެސްޓީއޯގެ ސީއެފްއޯގެ މަގާމާއި، އެ ކުންފުނީގެ ބޯޑު މެންބަރުކަމުގެ އިތުރުން، މިފްކޯ، އެމްއެސްއެސް އަދި އެފްއެސްއެމްގެ އިސް މަގާމުތަކާއި، ކޭޕީއެމްޖީ މޯލްޑިވްސްގެ ޕާޓްނަރެއްގެ ގޮތުގައިވެސް މަސައްކަތް ކުރައްވާފައެވެ.

ބޯޑުން ވަކިކުރެއްވި ސަހަރު ވަހީދަކީ 24 ޑިސެމްބަރު 2023 ގައި އެމްއޭސީއެލްގެ ބޯޑަށް އައްޔަންކުރެވުނު ބޭފުޅެކެވެ. މާލީ ދާއިރާގައި 17 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ، އަދި އިނގިރޭސިވިލާތުން މަތީ ތައުލީމު ހާސިލުކުރައްވާފައިވާ ބޭފުޅެކެވެ. ހަމައެއާއެކު ރިސްކް މެނޭޖްމަންޓާއި ކޮމްޕްލަޔަންސް އަދި އޮޕަރޭޝަންސްގެ ދާއިރާއިން ފާހަގަކޮށްލެވޭ ކާމިޔާބީތަކެއް ހޯއްދަވާފައިވާ ބޭފުޅެއްވެސްމެއެވެ.