މާފަންނު ފިހާރައެއްގެ ތެރެއަށް ވަދެ ތޫނު އެއްޗަކުން ހަމަލާދީ ޒަހަމްކޮށްލި ޒުވާނާއަށް ފަރުވާދެމުންދަނީ ވެންޓިލޭޓަރުގައި ކަމަށް އައިޖީއެމްއެޗްއިން ބުނެފިއެވެ.
އައިޖީއެމްއެޗްގެ މީޑިއާ އޮފިޝަލް ބުނީ ޒަހަމްވި ޒުވާނާއަށް ފަރުވާދެމުންދަނީ އައިޖީއެމްއެޗްގެ ވެންޓިލޭޓަރުގައި ބާއްވައިގެން ކަމަށެވެ. އޭނާއަށް ލިބިފައިވާ އަނިޔާތަކުގެ އިތުރު ތަފްސީލެއް އައިޖީއެމްއެޗުން ހާމައެއް ނުކުރެއެވެ. އެހެން ނަމަވެސް، އާންމުވެފައިވާ ފޮޓޯތަކުން ފެންނަގޮތުގައި އެ ފިހާރަތެރޭގައި ވެސް ވަރަށް ގިނައިން ލޭ ހުއްޓެވެ. އަދި އޭނާގެ ގައިގައިވެސް ވަރަށް ގިނައިން ލޭ ހުއްޓެވެ.
ރޭ 09:20 ހާއިރު މާފަންނުގައި ހުންނަ ކްރާސާ ނަމަކަށް ކިޔާ ފިހާރައެއްގެ ތެރެއަށް ވަދެ, ވަޅި ޖަހައި ޒަހަމްކޮށްލާފައިވަނީ 30 އަހަރުގެ ޒުވާނެއްކަމަށް ފުލުހުން ބުނެއެވެ. އެނގިފައިވާގޮތުގައި އެ ފިހާރަ ތެރެއަށް އޭނާ ވަނީ ބަޔަކު މީހުން އޭނާ ހޯދަން އަންނާތީ ފިލަން ވެގެންނެވެ. ނަމަވެސް އެ ފިހާރަ ތެރޭގައި އޭނާ ހުއްޓައި ދެ މީހަކު އައިސް އޭނާއަށް ވަޅިން ހަމަލާދިނެވެ.
މި މައްސަލައާ ގުޅިގެން އެއްވެސް މީހަކު ހައްޔަރުކުރިކަން ފުލުހުން ހާމަކޮށްފައިނުވާއިރު، މައްސަލައިގެ ތަހުގީގު ދަނީ ކުރިއަށެވެ.
