ލޯކަލް ގަވަމެންޓް އޮތޯރިޓީ (އެލްޖީއޭ)ގެ ބޯޑަށް ކައުންސިލަރުން ހޮވުމަށް ބާއްވާ އިންތިޚާބު، މި މަހުގެ 31 ވަނަ ދުވަހު ބޭއްވުމަށް ނިންމައިފިއެވެ.
މި އިންތިޚާބު ބޭއްވުމަށް އެލްޖީއޭއިން ފުރަތަމަ ނިންމީ އޮގަސްޓު 8 ގައި ނަމަވެސް، އިދާރީ މައްސަލައަކާއި ކައުންސިލްތަކުގެ ޝަކުވާތަކާ ގުޅިގެން، އޮގަސްޓު 4 ގައި އިންތިޚާބު މުއްދަތެއްނެތި ފަސްކުރިއެވެ. ބުރާސްފަތި ދުވަހު ގެޒެޓުގައި ޝާއިއުކުރި އިއުލާނެއްގައި، ފަސްކުރި އިންތިޚާބު މި މަހުގެ 31 ވާ ހޮނިހިރު ދުވަހުގެ ހެނދުނު 10:00 އިން ހަވީރު 16:00 އަށް ބޭއްވުމަށް ހަމަޖެހިފައިވާކަން އެލްޖީއޭއިން ހާމަކުރިއެވެ.
ރަށު ކައުންސިލަރުންގެ ތެރެއިން މި އިންތިޚާބުގައި ވާދަކުރަނީ ފ. ނިލަންދޫ ކައުންސިލްގެ ރައީސް އަލީ އަހުމަދު (ޕީއެންސީ) އާއި، ނ. މަނަދޫ ކައުންސިލްގެ ރައީސް އަލީ ސާފިރު (އެމްޑީޕީ) އެވެ. އަންހެނުންގެ ކޮމިޓީތަކުގެ ރައީސާއިންގެ ތެރެއިން ވާދަކުރަނީ ލ. ގަމުގެ މަރިޔަމް ނީނާ (އެމްޑީޕީ) އާއި، ށ. ފުނަދޫގެ މަރިޔަމް ޒީނާ (ޕީއެންސީ) އެވެ.
ކައުންސިލަރުން މަގާމުގެ ނާޖާއިޒު ފައިދާ ނެގުން، ޒިންމާ އަދާނުކުރުން ނުވަތަ ގާނޫނާ ޚިލާފުވުން ފަދަ ކަންކަމުގައި ފިޔަވަޅު އެޅުމުގެ ބާރު އެލްޖީއޭއަށް ލިބިގެންވެއެވެ.
