ރިޔާސީ އިންތިޚާބުގެ ގާނޫނުގެ އިތުރުން އިންތިޚާބުތަކާބެހޭ އާންމު ގަނޫނަށް އިސްލާހު ގެނައުމުގެ ބިލުވެސް ހިމެނޭގޮތުން، މާދަމާ ފެށުމަށް ހަމަޖެހިފައިވާ ރައްޔިތުންގެ މަޖިލިހުގެ މިއަަހަރުގެ ފުރަތަމަ ދައުރުގައި އިސްލާހު ގެނައުމަށް 23 ބިލެއް ބަންޑާރަ ނައިބުގެ އޮފީހުން ރައްޔިތުންގެ މަޖިލިހަށް ހުށަހަޅައިފިއެވެ.

އެޓަރނީ ޖެނެރަލް އޮފީހުން މިއަދު ކުރި ޓުވީޓެއްގައި ބުނެފައިވަނީ ސަރުކާރުގެ ފަރާތުން ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރަށް ހުށަހެޅުމަށް ޤަޞްދުކުރާ ބިލުތަކުގެ ލިސްޓު، ރައްޔިތުންގެ މަޖިލީހުގެ ގަވާއިދުގެ 82 ވަނަ މާއްދާގެ (ރ) ގައި ބަޔާންކޮށްފައިވާ ގޮތުގެމަތިން ރައްޔިތުންގެ މަޖިލީހުގެ ރައީސަށް މިހާރު ފޮނުވާފައިވާ ކަމުގައެވެ.

މިއަހަރަކީ ރިޔާސީ އިންތިޚާބު ބޭއްވުމަށް ހަމަޖެހިފައިވާ އަހަރުކަމަށް ވާއިރު، ރިޔާސީ އިންތިޚާބާބެހޭ ބިލަށް ސަރުކާރުން ގެނައުމަށް ނިންމާފައިވަނީ ކޮން އިސްލާހުތަކެއްކަން އަދި ސަރުކާރުން ހާމަ ކޮށްފައެއް ނުވެއެވެ.

ސަރުކާރުން ރައްޔިތުންގެ މަޖިލީހުގެ ކުރިޔަށް އޮތް ދައުރަށް ހުށަހެޅުމަށް ފޮނުވާފައިވާ ބިލްތަކަކީ:

1. ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީިއަށް އިސްލާހު ގެނައުމުގެ ބިލު
2. ޖުޑީޝަލް ސަރވިސް ކޮމިޝަނުގެ ޤާނޫނަށް އިސްލާހު ގެނައުމުގެ ބިލު
3. ދިވެހިރާއްޖޭގެ ޤާނޫނުލް އުޤޫބާތަށް އިސްލާހު ގެނައުމުގެ ބިލު
4. ޖިނާއީ އިޖުރާއަތުގެ ޤާނޫނަށް އިސްލާހު ގެނައުމުގެ ބިލު ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް އިސްލާހު ގެނައުމުގެ ބިލު
5. މަސްތުވާ ތަކެއްޗާއި ބެހޭ ޤާނޫނަށް އިސްލާހު ގެނައުމުގެ ބިލު
6. ގޭންގް ކުށްތައް މަނާކުރުމާއި ބެހޭ ޤާނޫނަށް އިސްލާހު ގެނައުމުގެ ބިލު
7. ބިރުދެއްކުމާއި ނުރައްކާތެރި ހަތިޔާރާއި ތޫނުއެއްޗެހި ގެންގުޅުން މަނާކުރުމުގެ ޤާނޫނަށް އިސްލާހު ގެނައުމުގެ ބިލު
8. މަނީލޯންޑްރިންގ އަދި ޓެރަރިޒަމް ފައިނޭންސް ކުރުން ހުއްޓުވުމުގެ ޤާނޫނަށް އިސްލާހު ގެނައުމުގެ ބިލު
9. ދިވެހި ފުލުހުންގެ ޚިދުމަތުގެ ޤާނޫނަށް އިސްލާހު ގެނައުމުގެ ބިލު
10. މައުލޫމާތު ހޯދައި ލިބިގަތުމުގެ ހައްޤުގެ ޤާނޫނަށް އިސްލާހު ގެނައުމުގެ ބިލު
11. އިންތިޚާބުތަކާއިބެހޭ އާންމު ޤާނޫނަށް އިސްލާހު ގެނައުމުގެ ބިލު
12. ރިޔާސީ އިންތިހާބުގެ ޤާނޫނަށް އިސްލާހު ގެނައުމުގެ ބިލު
13. ލޯކަލް ކައުންސިލްތަކުގެ އިންތިޚާބުގެ ޤާނޫނަށް އިސްލާހު ގެނައުމުގެ ބިލު
14. ހައްޖާއި އުމްރާގެ ބިލު
15. ދިވެހިރާއްޖޭގެ ކުޅިވަރު ޤާނޫނަށް އިސްލާހު ގެނައުމުގެ ބިލު
16. އިސްރަށްވެހިންގެ ބިލު
17. ފޮރިން އިންވެސްޓްމަންޓުގެ ބިލު
18. އިންޑަސްޓްރިއަލް ރިލޭޝަންގެ ބިލު
19. މޯލްޑިވްސް މީޑިޔާ އެންޑް ބްރޯޑްކާސްޓިންގ އޮތޯރިޓީގެ ބިލު
20. އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލު
21. ދިވެހިރާއްޖޭގެ ޖަލުތަކާއި ޕެރޯލްގެ ޤާނޫނަށް އިސްލާހު ގެނައުމުގެ ބިލު
22. ކުނިމެނޭޖްކުރުމުގެ ޤާނޫނަށް އިސްލާހު ގެނައުމުގެ ބިލު

ސަރުކާރުން ގިނަ އަދަދެއްގެ ބިލްތަކެއް ރައްޔިތުންގެ މަޖިލީހަށް ފޮނުވާފައިވާއިރު، ރައްޔިތުންގެ މަޖިލިހުގެ ރައީސް މުހައްމަދު ނަޝީދު ދާދިފަހުން ވިދާޅުވެފައިވަނީ، ބިލްތައް ޑްރާފްޓް ކުރުމުގެ ގާބިލްކަން އެޓާރނީޖެނެރަލް އޮފީހުގެ ނެތްކަމަށެވެ.

މަޖިލީހަށް ފޮނުވި ބިލްތަކުގެ އިތުރު ތަފްސީލެއް އެޓާރނީ ޖެނެރަލްގެ އޮފީހުން އަދި ހާމަ ކޮށްފައެއް ނުވެއެވެ.