މިއަހަރު އޮންނަ ރިޔާސީ އިންތިޚާބުގައި އަލަށް 21،000އަށް ވުރެ ގިނަ މީހުންނަށް ވޯތް ލެވޭނެކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
މިއަދު ބޭއްވި ޕްރެސްކޮންފަރެންސްގައި އީސީގެ ރައީސް ފުއާދު ތައުފީގް ވިދާޅުވީ، އިންތިޚާބު ބާއްވާ ތާރީޚާއި ހަމައަށް 21،000 ޒުވާނުންނަށް 18 އަހަރު ފުރި ވޯޓް ލެވޭނެކަމަށެވެ. އެހެންކަމުން މިއަހަރު 280،000އަށް ވުރެ ގިނަ މީހުންނަށް ވޯޓް ލުމުގެ ހައްގު ލިބޭނެކަމަށް ފުއާދު ވިދާޅުވިއެވެ. މިދިޔަ ރިޔާސީ އިންތިޚާބުގައި ވޯޓު ލުމުގެ ހައްގު ލިބުނީ 262.000އެއްހާ މީހުންނަށެވެ.
މިފަހަރު އޮންނަ އިންތިޚާބުގައި 600 ވޯޓު ފޮށި ވަހައްޓަން ވަނީ ނިންމާފައެވެ.
މިއަދުގެ ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަނުން ހާމަކުރައްވާފައިވާގޮތުގައި މި އިންތިޚާބުގެ ވޯޓުލެވޭ މީހުންގެ ރަޖިސްޓްރީ އަންނަ މެއި މަހުގެ 2ވަނަ ދުވަހު އާންމުކުރާނެކަމަށެވެ. އަދި ވޯޓުލެވޭ މީހުންގެ ލިސްޓަށް ޝަކުވާ ހުށަހެޅުމަށް 30 ދުވަހުގެ މުއްދަތެއް ލިބޭނެކަމަށްވެސް އެކޮމިޝަނުން ވިދާޅުވެއެވެ. އަދި އެމީހަކު ރައްވެހިވެފައިވާ ތަން ފިޔަވައި އެހެންތަނެއްގައި ވޯޓުލާން ބޭނުންވާ މީހުން އަލުން ރަޖިސްޓްރީވުމަށް ޖުލައި މަހުގެ 16އިން އޮގަސްޓުމަހުގެ 5ވަނަ ދުވަށް ހުޅުވާލާނެކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.
