ސައުދީ އަރަބިއްޔާއަށް އަމާޒުކޮށް ޙޫޘީން ދެމުންދާ ހަމަލާތަކާ ގުޅިގެން، ޓަރކީއާއި ޕާކިސްތާނުން ސައުދީ އަރަބިއްޔާއާއެކު ގުޅިފައިވާ ދިފާޢީ އެއްބަސްވުމުގެ ދަށުން ފިޔަވަޅުތައް އަޅަން ނިންމައިފިއެވެ.

މައްކާ ދިފާޢީ އެއްބަސްވުމުގެ ދަށުން އުފައްދާފައިވާ ސްޓްރެޓީޖިކް ޕޮލިޓިކަލް އެންޑް ޑިފެންސް ކޮމިޓީގެ ކުއްލި ބައްދަލުވުމެއް ރިޔާޟްގައި ވަނީ ބާއްވާފައެވެ. މި ބައްދަލުވުމުގައި ތުރުކީވިލާތުގެ ފަރާތުން ޚާރިޖީ ވަޒީރު ހަކާން ފިދާންއާއި، ދިފާޢީ ވަޒީރު ޔަސާރު ގުލާޝްގެ އިތުރުން ޗީފް އޮފް ޖެނެރަލް ސްޓާފް ސައިޗުކް ބައިރަކްތަރޯލޯ ބައިވެރިވެވަޑައިގެންނެވިއެވެ.

މި ބައްދަލުވުމުގައި، ސައުދީ އަރަބިއްޔާގެ ދިފާޢީ ބާރު ވަރުގަދަކުރުމުގެ ގޮތުން، އެ ޤައުމުގައި އަސްކަރީ ފައުޖުތައް ހަރަކާތްތެރިކުރުމަށް މި ތިން ޤައުމުން ވަނީ އެއްބަސްވެފައެވެ. މީގެ އިތުރުން، މައްކާ އަދި މަދީނާއަށް އަމާޒުކޮށް ދޭން އުޅޭ ހަމަލާތައް ކުށްވެރިކޮށް، އިސްލާމީ މުޤައްދަސް ތަންތަން ޙިމާޔަތްކުރުމަށް ފުރިހަމައަށް ތައްޔާރަށް ތިބިކަން މި ޤައުމުތަކުން ހާމަކުރިއެވެ. ހަމަލާތަކާ ދެކޮޅަށް ފިޔަވަޅު އަޅައި، ސައުދީ އަރަބިއްޔާ ހިމާޔަތްކުރުމުގައި މި އިއްތިޙާދުން ދެމިއޮންނާނެ ކަމަށް ސައުދީގެ ދިފާޢީ ވަޒީރު އަމީރު ޚާލިދު ބިން ސަލްމާން ވިދާޅުވިއެވެ.

މި އިއްތިހާދު އިތުރަށް ހަރުދަނާކޮށް ދެމެހެއްޓެނިވި ގޮތެއްގައި ހިންގުމަށްޓަކައި، މައްކާ އިއްތިޙާދުގެ ފުރަތަމަ ސެކްރެޓަރީ ޖެނެރަލްގެ މަޤާމަށް ތިން އަހަރު ދުވަހުގެ މުއްދަތަކަށް ނުޢުމާން މަޙްމޫދު ޢައްޔަނުކޮށްފައިވާކަން ޕާކިސްތާނުގެ ޚާރިޖީ ވުޒާރާއިން ވަނީ އިޢުލާނުކޮށްފައެވެ. ސަރަޙައްދީ މައްސަލަތަކާއި ކާރިސާތައް ޙައްލުކުރުމުގައި ހަމައެކަނި އަސްކަރީ ފިޔަވަޅުތަކަށް ބަރޯސާވުމުގެ ބަދަލުގައި، ޑިޕްލޮމަސީގެ އުޞޫލުން ޞުލްޙަވެރިކަމާއެކު މަޝްވަރާކޮށްގެން މައްސަލަތައް ޙައްލުކުރުމުގެ މުހިންމުކަމަށްވެސް މި ބައްދަލުވުމުގައި އަލިއަޅުވާލާފައިވެއެވެ.

މި އިއްތިހާދު އެންމެ ފުރަތަމަ އެކުލަވާލާފައިވަނީ އޮގަސްޓު މަހުގެ 31 ވަނަ ދުވަހު އިސްތަންބޫލްގައި ބޭއްވި ބައްދަލުވުމެއްގައެވެ. އެ އެއްބަސްވުމުގެ ދަށުން ސައުދީ އަރަބިއްޔާގައި ސެކްރެޓޭރިއެޓެއް ޤާއިމުކުރުމަށާއި، ދިފާޢީ ސިނާއަތާއި ޓެކްނޮލޮޖީ އުފެއްދުމުގެ ދާއިރާއިން ގުޅުން ބަދަހިކުރުމަށް ޤައުމުތަކުން ނިންމާފައިވެއެވެ. މި ތިން ޤައުމުގެ މައިގަނޑު އަމާޒަކީ، ޔަމަނުގެ ޙޫޘީންގެ ފަރާތުން އަންނަ ހަމަލާތައް އިތުރުވަމުންދާ މި ނާޒުކު ދަނޑިވަޅުގައި، ސަރަޙައްދީ ހަމަޖެހުން ޤާއިމުކުރުމަށްޓަކައި މައްކާ އެއްބަސްވުން ހަރުދަނާ މުއައްސަސާއެއްގެ ސިފައިގައި ކުރިއަށް ގެންދިއުމެވެ.