ފައިސާ އެއްކުރަން އުޅުނު މުވައްޒަފަކު، އޭނާ އެއްކުރި 30 މިލިއަން އިންޑިއަން ރުޕީސް (ގާތްގަނޑަކަށް 3.6 ލައްކަ އެމެރިކާ ޑޮލަރު) ފޭރިގަތް ކަމަށް ބުނެ ހެދި ދޮގު ރޭވުން ސީސީޓީވީ ފުޓޭޖާއި ފުލުހުންގެ ތަޙުޤީޤުން ފަޅާއަރައި، އޭނާއާއި އޭނާގެ ބައިވެރިޔާ އިންޑިއާގެ ދިއްލީ ފުލުހުން ހައްޔަރުކޮށްފިއެވެ.

މި މައްސަލައިގައި ހައްޔަރުކޮށްފައިވަނީ ދިއްލީގެ ޓިކްރީ ކަލާންގައި ހުންނަ "މަދަން ލާލް ޕްލާސްޓިކް" ކުންފުނީގައި ފައިސާ އެއްކުރުމުގެ މަސައްކަތްކުރާ އުމުރުން 24 އަހަރުގެ ޕަރްވީން މަލްހޯތުރާއާއި، އޭނާގެ ރަޙުމަތްތެރިޔާ އުމުރުން 23 އަހަރުގެ ޕަރްވީން (ޕްރޭމް) އެވެ.

މިއޮކްޓޯބަރު މަހުގެ 1 ވަނަ ދުވަހު މަލްހޯތުރާ ވަނީ އޭނާގެ ވަޒީފާދޭ ފަރާތުގެ އެންގުމަށް ތިން ތަނަކުން ޖުމްލަ 30 މިލިއަން ރުޕީސް އެއްކޮށްފައެވެ. އެއަށްފަހު ސައިކަލުގައި އެނބުރި ދަނިކޮށް، ޒާކިރާ ފްލައިއޯވާ ކައިރިން ކަޅު ކުލައިގެ ސައިކަލެއްގައި އައި ތިން މީހަކު އޭނާ ހުއްޓުވައި، ތޫނު އެއްޗަކުން މޭމައްޗަށް ހަމަލާދީ ފައިސާ ދަބަސް ފޭރިގެންފައިވާ ކަމަށް ބުނެ އޭނާ ވަނީ މޯތީ ނަގަރު ފުލުހުންނަށް މައްސަލަ ހުށަހަޅާފައެވެ.

ނަމަވެސް މައްސަލަ ތަޙުޤީޤުކުރި ފުލުހުންނަށް އޭނާގެ ވާހަކަތަކުން ބޮޑެތި ޝައްކުތަކެއް އުފެދުނެވެ:

އޭނާގެ މޭމައްޗަށް ހަމަލާދީފައިވާ ކަމަށް ބުނި ނަމަވެސް، އޭނާ ލައިގެން ހުރި ގަމީހުގައި އެފަދަ އެއްވެސް ޒަޚަމެއް ނުވަތަ ވީދިފައެއްވެސް ނެތެވެ.
އޭނާ ބުނި ސަރަޙައްދާއި ވަގުތުގެ ސީސީޓީވީ ފުޓޭޖު ބެލުމުން، އެފަދަ ހާދިސާއެއް ހިންގާފައިވާ ކަމުގެ އެއްވެސް ހެެއްކެއް ނުފެނުނެވެ.

ފުލުހުން ކުރި ސުވާލުތަކާ އެކު، މަލްހޯތުރާ ވަނީ އެ ފައިސާތައް އަމިއްލައަށް ނެގުމުގެ ބޭނުމުގައި ދޮގު ރޭވުމެއް ރޭވި ކަމަށް އެއްބަސްވެފައެވެ. އޭނާ ކިޔައިދިން ގޮތުގައި، ފައިސާ ދަބަސް ކޭޝަވް ޕުރާމް މެޓްރޯ ސްޓޭޝަން ކައިރިން އޭނާގެ ރަޙުމަތްތެރިޔާ ޕްރޭމްއާ ހަވާލުކުރުމަށްފަހު، އަމިއްލައަށް ތޫނު އެއްޗަކުން މޭމަތި ޒަޚަމްކޮށްލީއެވެ. އަދި ހެކި ނައްތާލުމުގެ ގޮތުން އޭނާގެ ފޯނު ހަލާކުކޮށްލުމަށްފަހު އެއްލާލީއެވެ.

ފުލުހުން ވަނީ ހަރިޔާނާގެ ބަހާދުރްގަރުގައި ހުންނަ ޕްރޭމްގެ ގޭގައި ރޭޑްކޮށް، ވަގަށް ނެގި ކަމަށް ބުނި 30 މިލިއަން ރުޕީސް އެކީގައާއި، ފައިސާ ދަބަހާއި، އެކަމަށް ބޭނުންކުރި ސައިކަލު ހޯދައި ފުލުހުންގެ ބެލުމުގެ ދަށަށް ގެންގޮސްފައެވެ.

މި ދެ މީހުންވެސް މިހާރު ތިބީ ފުލުހުންގެ ހައްޔަރުގައެވެ.