ޔޫއޭއީގެ ދުބާއީން ތެލް އަވީވަށް ދަތުރުކުރި ފްލައިދުބާއީގެ ފްލައިޓް FZ1073 ގެ ކޮކްޕިޓް ތެރޭގައި ދެ ޕައިލަޓުންގެ މެދުގައި ހިނގި މާރާމާރީއަކާ ގުޅިގެން، އެ ބޯޓު ކުއްލި ހާލަތުގައި ސައޫދީ އަރަބިއްޔާގެ ތަބޫކް އެއާޕޯޓަށް ޖައްސައިފިއެވެ. މި ހާދިސާގައި ބޯޓުން ދަތުރުކުރި އެއްވެސް ފަސިންޖަރަކަށް އަދި ފަޅުވެރިއަކަށް ބޮޑު އަނިޔާއެއް ލިބިފައިނުވާކަމަށް ރިޕޯޓްތައް ބުނެއެވެ.
ބޯޓު ރައްކާތެރިކަމާއެކު ތަބޫކަށް ޖެއްސުނު ނަމަވެސް، މިއީ ވައިގެ ދަތުރުފަތުރުގެ ތާރީޚުގައި ހިންގި އެންމެ ނުރައްކާތެރި އަދި ނާދިރު ހާދިސާތަކުގެ ތެރެއިން ހާދިސާއެކެވެ.
ފްލައިޓް ރާޑަރުގެ މައުލޫމާތުތަކުން ފެންނަގޮތުގައި ބޯޓު އުޑުމަތީގައި އުޅެނިކޮށް، އެންމެ 2 މިނެޓު ތެރޭގައި ގާތްގަނޑަކަށް 17,400 ފީޓު ތިރިއަށް ވެއްޓިގެން ދިޔައެވެ. މިއީ ކޮކްޕިޓް ތެރޭގައި ބޯޓުގެ ކޮންޓްރޯލް ހޯދުމަށް ދެ ޕައިލަޓުންގެ މެދުގައި ހިންގި ކުރިމަތިލުމުގެ ސަބަބުން ދިމާވި ކަމެއްކަމަށް ބެލެވެއެވެ.
ކޮކްޕިޓް ތެރެއިން އެންމެ ފުރަތަމަ ފޮނުވީ އާންމު ކުއްލި ހާލަތު އަންގައިދޭ "Squawk 7700″ ސިގްނަލެވެ. ނަމަވެސް އޭގެ ކުޑައިރުކޮޅެއް ފަހުން، ބޯޓު ހައިޖެކްކޮށްފިކަން އަންގައިދޭ "Squawk 7500″ ސިގްނަލް އެކްޓިވޭޓްވިއެވެ.
ހައިޖެކް އެލާޓް (7500) ސިގްނަލް ލިބުމާއެކު، އިސްރާއީލުގެ އެއާފޯސްގެ ހަނގުރާމަމަތީ ޖެޓްތައް ވަގުތުން ވައިގެ ތެރެއަށްު ފޮނުވައި، ދިފާއީ އެންމެ މަތީ ހާލަތަށް އަރައި ސެކިއުރިޓީ ކައުންސިލުން ކުއްލި ބައްދަލުވުންތަކެއް ބޭއްވިއެވެ.
ބޯޓުގެ ކެބިން ތެރެއިން އަޑުފައްގަނޑު ވަދެވުމުން އަދި ރުއިމުގެ އަޑުތައް އިވުމުން ފަސިންޖަރުންނަށް ކަމެއް ގޯސްވެއްޖެކަން އެނގުނެވެ. ރިޕޯޓްތައް ބުނާގޮތުގައި، ކޮކްޕިޓް ދޮރު ހުޅުވުނު ވަގުތު އެތެރޭގައި ލޭތައް ހުރިތަން ފެނިފައިވެއެވެ.
ބޯޓުގައި ތިބި ފަސިންޖަރުންނާއި ކެބިން ކުރޫއިން ވަގުތުން ކޮކްޕިޓަށް ވަދެ، ހަމަނުޖެހުން ހިންގަން އުޅުނު ޕައިލަޓް ކޮންޓްރޯލްކޮށް ބަނދެލިއެވެ.
ފަސިންޖަރުންގެ ތެރޭގައި ތިބި އޮފް-ޑިއުޓީ ޕައިލަޓުންތަކެއްގެ އެހީތެރިކަމާއެކު، ބޯޓުގެ ކޮންޓްރޯލް އަލުން ހޯދައި ސައޫދީގެ ތަބޫކް އެއާޕޯޓަށް ރައްކާތެރިކަމާއެކު ބޯޓު ޖެއްސިއެވެ.
ސައޫދީ އަރަބިއްޔާގެ ކަމާބެހޭ އޮތޯރިޓީތަކުންނާއި ފްލައިދުބާއީއިން މިހާރު ދަނީ މި ހާދިސާ މެދުވެރިވާންޖެހުނު ސަބަބު ވަރަށް ތަފްސީލުކޮށް ތަހުގީގު ކުރަމުންނެވެ. މިއީ ނަފްސާނީ މައްސަލައަކާ ހުރެ ހިންގި ކަމެއްތޯ ނުވަތަ އެހެން އެއްވެސް މަގުސަދެއް އޮތްކަމެއްތޯ ބެލުމަށް ދެ ޕައިލަޓުން ސުވާލުކުރުމަށް ސައޫދީ ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
ފްލައިދުބާއީއިން ނެރުނު ބަޔާނެއްގައި ބުނެފައިވަނީ ފަސިންޖަރުންގެ ރައްކާތެރިކަމަކީ އެއާލައިނުން އެންމެ އިސްކަންދޭ ކަންތައް ކަމަށާއި، ހާދިސާގެ ތަހުގީގަށް ފުރިހަމައަށް އެއްބާރުލުން ދެމުންދާ ކަމަށެވެ.
