މާލޭގެ މައި އެއް މަގު ކަމަށްވާ އަމީނީ މަގު މަރާމާތު ކުރުމުގެ މަޝްރޫޢުގެ ދަށުން، އެ މަގުގެ ދެވަނަ ސެގްމަންޓުގައި ތާރުއެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކާމިޔާބުކަމާއެކު ނިންމާލައިފިއެވެ.
އެމްޓީސީސީން ހޯމަ ދުވަހު ހާމަކުރި ގޮތުގައި، މި ސަރަޙައްދު ޒަމާނީ ފެންވަރަށް ތަރައްގީކޮށް ނިމުމުން، މާލޭގައި ދަތުރުފަތުރުކުރާ ފަރާތްތަކަށް ލުއިފަސޭހަވެ، މަގުތަކުގެ ގުޅުން އިތުރަށް ހަރުދަނާވެގެންދާނެއެވެ. އެ ކުންފުނިން އާންމުކޮށްފައިވާ ފޮޓޯތަކުން ފެންނަ ގޮތުގައި، ތާރު އެޅުމާއި އެއްވަރުކުރުމުގެ މަސައްކަތުގައި ރޯލަރާއި އެކްސްކަވޭޓަރު ފަދަ ބޮޑެތި މެޝިނަރީތައް ބޭނުންކޮށްފައިވެއެވެ.
މި މަސައްކަތަކީ އަމީނީ މަގާއި، އިއްޒުއްދީން މަގު އަދި ބޮޑުތަކުރުފާނު މަގުގެ ހަލާކުވެފައިވާ ސަރަޙައްދުތައް ރަނގަޅު ކުރުމަށް ސަރުކާރުން ކުރިއަށްގެންދާ ބޮޑު މަޝްރޫޢުގެ ބައެކެވެ. މި މަހުގެ ކުރީކޮޅު ފުރަތަމަ ސެގްމަންޓުގައި ތާރުއަޅައި ނިންމުމަށްފަހު، އެމްޓީސީސީން ފެށީ ވޮއިސް އޮފް މޯލްޑިވްސް (ވީއޯއެމް) ސަރަހައްދުން ފެށިގެން ގިޔާސުއްދީން ސްކޫލާ ހަމައަށް ހިމެނޭ ދެވަނަ ސެގްމަންޓުގެ މަސައްކަތެވެ. މުޅި މި މަޝްރޫއު އަންނަ ނޮވެމްބަރު މަހުގެ ނިޔަލަށް އެއްކޮށް ނިންމުމަށް ވަނީ ތާވަލުކުރެވިފައެވެ.
އަމީނީ މަގު އަލުން މަރާމާތުކުރަން ޖެހުނީ، މީގެ ތިން އަހަރު ކުރިން އެ މަގުގައި ތާރުއެޅި ނަމަވެސް، މަގުގެ އެކި ހިސާބުތަކުގައި ވަޅުގަނޑު ހެދި، އަޑިގުޑަންވެ، ދުއްވާ އެއްޗެއްސަށް ބޮޑެތި ދަތިތަކަކާ ކުރިމަތިލާން ޖެހުމާ ގުޅިގެންނެވެ. ހާއްސަކޮށް ހާބަރު ފުޑްކޯޓު ސަރަހައްދުގެ މަގު އޮތީ ބޭނުންކުރަން ނުރައްކާތެރި ހާލަތެއްގައެވެ.
ކުރިން ދިމާވި ލަސްތަކަކަށްފަހު މި މަސައްކަތް އެމްޓީސީސީއާ ހަވާލުކުރީ މިދިޔަ ޖޫން މަހުގެ ތެރޭގައެވެ. މި މަޝްރޫޢުގެ ދަށުން ބަސް ހުއްޓާ ސަރަޙައްދުތަކުގެ ޕޭވްމަންޓްތަކަކީ ބޮޑެތި ވެހިކަލްތައް ދަތުރުކުރުމުން ގެއްލުން ނުވާނޭހެން ބާރުގަދަކޮށް ފަރުމާކުރެވިގެން ހަދަމުންދާ ތަންތަން ކަމަށްވެސް އެ ކުންފުނިން މައުލޫމާތު ދެއެވެ.
