އެމެރިކާގެ ބޯލްޓިމޯ އިން މިއާމީއަށް ދަތުރުކުރި އެމެރިކަން އެއާލައިންސްގެ ފްލައިޓް 1779 ގައި، ދަތުރުމަތީގައި އަންހެން ފަސިންޖަރަކު ބަރަހަނާވެ، އާންމު އިޖުތިމާއީ މިންގަނޑުތަކާ ހިލާފު ހުތުރު އަމަލުތަކެއް ހިންގި ހާދިސާއެއް ފެންމަތި ވެއްޖެއެވެ.

މި ހާދިސާއާ ގުޅިގެން ބޮޑު ނުތަނަވަަސް ކަމެއް އުފެދުނު ނަމަވެސް، ފްލައިޓް އެހެން އެއާޕޯޓަކަށް ޑައިވާޓް ނުކޮށް، ކަނޑައެޅިފައިވާ މަންޒިލަށް ވަނީ ދަތުރުކޮށްފައެވެ.

މިއާމީ އިންޓަނޭޝަނަލް އެއާޕޯޓަށް ދަތުރުކުރި އެއާބަސް A319 މަރުކާގެ މި ފްލައިޓުގެ ގޮނޑި 9D ގައި އިން އަންހެން ފަސިންޖަރު، ކުއްލިއަކަށް ހެދުން ބާލާ އެހެން ފަސިންޖަރުންގެ ކުރިމަތީގައި ވައްތަރުތަކެއް ޖައްސަން ފެށިއެވެ. މިކަން ފްލައިޓުގެ ކެބިން ކްރޫއިންގެ ސަމާލުކަމަށް އައުމާއެކު، ސީނިއާ ފްލައިޓް އެޓެންޑެންޓް ވަނީ ވަގުތުން ކޮކްޕިޓަށް މިކަން އަންގާފައެވެ.

އެއާލައިންގެ އޭސީއޭއާރްއެސް މެސެޖިން ސިސްޓަމް މެދުވެރިކޮށް ކޮކްޕިޓުން ވަނީ އެއާލައިންގެ އޮޕަރޭޝަންސް ސެންޓަރަށް މި މައުލޫމާތު ހިއްސާކޮށް، ފްލައިޓް ޖައްސާއިރު ފުލުހުންގެ އެހީތެރިކަމަށް އެދިފައެވެ.

މައިކްރޯ އަދި ސީރިއަސް ހާދިސާތަކުގައި ފްލައިޓް އެހެން އެއާޕޯޓަކަށް ޑައިވާޓް ކުރުމުގެ އިހުތިޔާރު ޕައިލެޓުންނަށް އޮންނައިރު، މި ހާދިސާގައި ޕައިލެޓުން ނިންމީ މަންޒިލާ ހަމައަށް ދަތުރު ކުރިއަށް ގެންދިއުމަށެވެ. އެއީ ފްލައިޓުގެ ރައްކާތެރިކަމަށް ސީދާ ނުރައްކަލެއް ނެތުމުންނާއި، މިއާމީއަށް ވާސިލުވުމަށް ކުޑަ ވަގުތުކޮޅެއް އޮތުމުން ކަމަށް ބެލެވެއެވެ.

ފްލައިޓް މިއާމީ އިންޓަނޭޝަނަލް އެއާޕޯޓުގައި ޖެއްސުމާއެކު، ގޭޓު ކައިރީގައި ތިބި މިއާމީ-ޑޭޑް ޝެރިފް އޮފީހުގެ ފުލުހުން ވަނީ ބޯޓަށް އަރައި އެ އަންހެން މީހާ ފުލުހުންގެ ބެލުމުގެ ދަށަށް ގެންގޮސްފައެވެ.

މި ހާދިސާއާ ގުޅިގެން އެމެރިކަން އެއާލައިންސްއިން އަދި ރަސްމީކޮށް ތަފްސީލީ ބަޔާނެއް ނެރެފައި ނުވި ނަމަވެސް، ކަމާބެހޭ ފަރާތްތަކުން ދަނީ މައްސަލަ އިތުރަށް ތަހުގީގު ކުރަމުންނެވެ.