އިނގިރޭސިވިލާތުގެ ކުރީގެ ޝާހީ އާއިލާގެ މެންބަރު، ޕްރިންސަސް ޑަޔާނާ ތަރީޚީ ގޮތުން ތަންކޮޅެއް މަޝްހޫރުވި އަދި ފެޝަންގެ ދުނިޔޭގައި ބޮޑު ނުފޫޒެއް ފޯރުވި "ރިވެންޖް ޑްރެސް" އަނެއްކާވެސް ނީލަމުގައި ވިއްކާލުމަށް ތައްޔާރު ވެއްޖެއެވެ.
މި ހެދުން ނީލަން ކިޔުމަށް ހަމަޖެހިފައިވަނީ މަޝްހޫރު ނީލަން ކުންފުނި ސޯތެބީސް އިން އެމެރިކާގެ ނިއުޔޯކްގައެވެ. މި ނީލަން ބޭއްވުމަށް ތާވަލު ކޮށްފައިވަނީ ކުރިއަށް އޮތް ޑިސެމްބަރު މަހުގެ 9 ވަނަ ދުވަހުއެވެ. ލަފާކުރެވޭ ގޮތުގައި މި ހެދުން 150,000 އާއި 300,000 އެމެރިކާ ޑޮލަރާ ދެމެދުގެ އަގެއްގައި ވިކޭނެއެވެ.
ގްރީކް ފެޝަން ޑިޒައިނަރު ކްރިސްޓީނާ ސްޓެމްބޯލިއަން ޑިޒައިންކުރި މި ކަޅުކުލައިގެ ކުރު ސިލްކް ހެދުން، ޑަޔާނާ ތައްޔާރު ކުރީ 1994 ޖޫން 29 ގައި ލަންޑަންގެ ސާޕެންޓައިން ގަލަރީގައި އޮތް ވެނިޓީ ފެއާގެ އިވެންޓަކަށެވެ.
މި ހެދުމަށް "ރިވެންޖް ޑްރެސް" (ބަދަލުހިފުމުގެ ހެދުން) ގެ ނަން ދެވުނީ، އެ ރޭ އިނގިރޭސިވިލާތުގެ ޓީވީން ދެއްކި ޑޮކިއުމެންޓްރީއެއްގައި ޑަޔާނާގެ އޭރުގެ ފިރިކަލުން (މިހާރުގެ ކިންގް ޗާލްސް) އަމިއްލައަށް އެހެން އަންހެނަކާ އެކު އޮތް ގުޅުމަށް އިއުތިރާފުވެވަޑައިގަތުމުންނެވެ. ޝާހީ އާއިލާގެ އުސޫލުތަކާ ޚިލާފަށް، ކެރޭ އަދި ރީތި ގޮތަކަށް ޑަޔާނާ އެ ރޭ އާންމުންގެ ކުރިމައްޗަށް ނުކުމެވަޑައިގަތުމަކީ މީޑިއާއާއި އާންމުންގެ ބޮޑު ސަމާލުކަމެއް ލިބުނު ކަމެކެވެ.
މި ހެދުން އެންމެ ފަހުން ނީލަމުގައި ވިއްކާލާފައިވަނީ 1997 ވަނަ އަހަރުގެ ޖޫން މަހުގައެވެ. އެއީ ޑަޔާނާ އަވަހާރަވުމުގެ އެންމެ ދެ މަސް ކުރިން، ކެންސަރާއި އެއިޑްސް ބަލީގެ ޚޭރާތްތަކަށް ފައިސާ ހޯދުމަށް ބޭއްވި ނީލަމެއްގައެވެ.
ސޯތެބީސްއިން މަޢުލޫމާތު ދޭ ގޮތުގައި، މިފަހަރުގެ ނީލަމުގައި ހެދުމާއެކު 1997 ގެ ނީލަމުގެ ކެޓަލޮގުގެ ޚާއްޞަ ކޮޕީއެއްވެސް ވިއްކާލެވޭނެއެވެ. އެ ކެޓަލޮގުގައި ޑަޔާނާ އާއި ޑިޒައިނަރުގެ ސޮއި ހިމެނެއެވެ. އަދި މި ނީލަމުން ލިބޭ ފައިސާގެ އެއްބައި ޗެރިޓީއަށް ހަދިޔާކުރުމަށްވެސް ވަނީ ހަމަޖެހިފައެވެ.
