އުމުރުގެ ތަފާތަށް މީހުން ކުރާ މަލާމާތާއި ފާޑުކިޔުންތަކުގެ ސަބަބުން، ލޯބިވެރިޔާ ޝުބްރާ ޝެޓީ އޭނާ ދޫކޮށްދިއުމަށް އެދުނު ކަމަށް ބޮލީވުޑްގެ މަޝްހޫރު ޑައިރެކްޓަރު އަނޫރާގް ކަޝްޔަޕް ހާމަކޮށްފިއެވެ.

އަނޫރާގްގެ (53އ) އަމިއްލަ ދިރިއުޅުމާއި، ހާއްސަކޮށް އޭނާއަށްވުރެ މާ ބޮޑުތަނުން ހަގު ޝުބްރާ ( 33އ ) އާއެކު އޮތް ގުޅުމަށް މީހުންގެ ބޮޑެތި ފާޑުކިޔުންތަކެއް އަބަދުވެސް އަމާޒުވެއެވެ.

މީޑިއާތަކަށް ދިން އިންޓަވިއުއެއްގައި އަނޫރާގް ބުނެފައިވަނީ، އުމުރުގެ ތަފާތަށްވުރެ ބޮޑަށް އޭނާ ކަންބޮޑުވީ މީހުންގެ ފަރާތުން ޝުބްރާއަށް ކުރިމަތިވި ނަފްސާނީ އަސަރުތަކާ މެދުގައެވެ. އާންމުންގެ ފާޑުކިޔުންތަކާއި ސޯޝަލް މީޑިއާގައި ކުރި މަލާމާތްތަކުގެ ސަބަބުން ޝުބްރާގެ ދިރިއުޅުމަށް ބުރަބޮޑުވެ، އޭނާގެ ސަބަބުން ޝުބްރާއަށް އެ ފިއްތުންތައް ތަހައްމަލު ކުރަން ޖެހުމުން، އެ ގުޅުން ނިންމާލައި އޭނާ ދޫކޮށްދިއުމަށް އެދުނު ކަމަށް އަނޫރާގް ބުންޏެވެ.

ނަމަވެސް، މީހުން ދެއްކި ވާހަކަތަކަށް ބެލުމެއްނެތި، ދެމީހުންގެ މެދުގައި އޮތް ގުޅުން އުމުރުގެ އަދަދަކުން އެކަނި މިންނުކުރެވޭނެކަން އެމީހުންގެ އިހުސާސްތަކުން ސާބިތުކޮށްދިނެވެ.

މި ވާހަކަތަކާއެކު އަނޫރާގްގެ އަމިއްލަ ދިރިއުޅުން އަނެއްކާވެސް ބޮޑު ބަހުސަކަށް ވެފައިވާއިރު، އަމިއްލަ އިހުތިޔާރުގައި އެކުގައި އުޅޭ ބޮޑެތި މީހުންގެ ގުޅުމުގެ ތެރެއަށް މުޖުތަމައުން ވަންނަންޖެހޭ މިންވަރާމެދު ގިނަ ބަޔަކު ދަނީ ސުވާލު އުފައްދަމުންނެވެ.

މި ހާދިސާއިން އެނގިގެން ދަނީ، ބައެއް ފަހަރު ގުޅުމެއްގައި އޮންނަ އެންމެ ބޮޑު ގޮންޖެހުމަކީ ދެމީހުންގެ މެދުގައި އޮންނަ ތަފާތުތަކަށްވުރެ ބޮޑަށް، ވަށައިގެން ތިބޭ މީހުންގެ ފަރާތުން ކުރިމަތިވާ ފާޑުކިޔުންތަކާއި ނިންމުންތައް ކަމެވެ.