ޕީޕަލްސް ނޭޝަނަލް ކޮންގްރެސް (ޕީއެންސީ) އިން އަންނަ މަހު ބޭއްވުމަށް ހަމަޖެހިފައިވާ އެ ޕާޓީގެ ކޮންގްރެސްގައި ނައިބު ރައީސްގެ މަގާމަށް ފިޝަރީޒް މިނިސްޓަރު އަހުމަދު ޝިޔާމް ވާދަކުރައްވާނެކަން މިއަދު އިއުލާން ކުރައްވައިފި އެވެ. މިހާތަނަށް ހަތް ބޭފުޅަކު މި މަގާމަށް ވާދަކުރައްވާނެކަން ހާމަކުރައްވާފައިވާތީ، ކޮންގްރެސްގައި މި މަގާމަށް ވޯޓެއް ނެގުން މިހާރު ވަނީ ޔަގީންވެފަ އެވެ.
ޕީއެންސީގެ އަސާސީ ގަވާއިދުގައިވާ ގޮތުން އެ ޕާޓީގެ ކޮންގްރެސްގައި އިންތިހާބު ކުރަން ޖެހެނީ ހަ ނައިބު ރައީސުންނެވެ. ނަމަވެސް، މިހާތަނަށް ހަތް ބޭފުޅަކު ވާދަކުރައްވާނެކަން އިއުލާން ކުރައްވާފައިވާތީ، މިއީ ޕާޓީގެ އެތެރޭގެ އިންތިހާބެއްގައި ވާދަވެރިކަން ބޮޑުވެގެންދާނެ ކަމެއްގެ ގޮތުގައި ބެލެވެ އެވެ.
މަގާމަށް ވާދަކުރައްވާ ބޭފުޅުން
މިނިސްޓަރު ޝިޔާމްގެ އިތުރުން ޕީއެންސީގެ ނައިބު ރައީސް ކަމަށް ވާދަކުރައްވާނެކަން އިއުލާން ކުރައްވާފައިވާ ބޭފުޅުންނަކީ:
- އަސްމާ ރަޝީދު – ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު
- މުހައްމަދު ހުސައިން ޝަރީފް (މުންދު)– ސަރުކާރުގެ ތަރުޖަމާނު
- އިބްރާހީމް ޝުޖާއު – ރައްޔިތުންގެ މަޖިލީހުގެ ބާރަށު ދާއިރާގެ މެންބަރު
- އަބްދުﷲ ރާފިއު – ސްޕޯޓްސް މިނިސްޓަރު
- މުހައްމަދު ސައީދު – އިކޮނޮމިކް މިނިސްޓަރު
- ފާތިމަތު ސައުދާ – ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު
މިހާރު ވެސް ޕީއެންސީގެ ނައިބު ރައީސްގެ މަގާމުގައި ހުންނެވި ޝިޔާމް ވަނީ އޭނާ އަލުން އެ މަގާމަށް ވާދަކުރައްވާނެކަން ކަށަވަރުކޮށްދެއްވައިފަ އެވެ. ޝިޔާމްގެ އިތުރުން މިހާރު ވެސް ނައިބު ރައީސްކަމުގައި ތިއްބެވި ބޭފުޅުންގެ ތެރެއިން ސައީދު، ޝުޖާއު އަދި މުހައްމަދު ހުސައިން ޝަރީފް ވެސް ވަނީ އަލުން ވާދަކުރައްވާނެކަން ހާމަކުރައްވައިފަ އެވެ.
ޕީއެންސީގެ އަސާސީ ގަވާއިދު ބުނާގޮތުން، ޕާޓީގެ ވެރިކަމެއް އޮންނަ ހާލަތުގައި ޕާޓީގެ ރައީސަކީ ރައީސުލްޖުމްހޫރިއްޔާ އެވެ. އަދި ޗެއާޕާސަނަކީ ރައީސުލްޖުމްހޫރިއްޔާ އައްޔަންކުރައްވާ ބޭފުޅެކެވެ. އެހެންކަމުން، އަންނަ މަހު ބާއްވާ ކޮންގްރެސްގައި ޕާޓީގެ ރައީސް އާއި ޗެއާޕާސަންގެ މަގާމަށް ވޯޓެއް ނުނަގާނެ އެވެ.
މި އިންތިހާބުގައި މިހާރު ތިއްބެވި ބައެއް ނައިބު ރައީސުން ކަމަށްވާ އެލްޖީއޭގެ ސީއީއޯ މުހައްމަދު ނިމާލް އަދި ޑިފެންސް މިނިސްޓަރު މުހައްމަދު ގައްސާން މައުމޫން އަދި ވާދަކުރައްވާނެކަން އިއުލާން ކުރައްވާފައެއް ނުވެ އެވެ.
