މިއަދުގެ ދުނިޔޭގައި "ބާރު" މާނަ ކުރެވެނީ ހަމައެކަނި ހަނގުރާމަވެރި ހަތިޔާރަކުން ނޫނެވެ. އިގުތިސާދީ ކުރިއެރުމާއި، ޓެކްނޮލޮޖީގެ ނުފޫޒާއި، އަދި ސިޔާސީ ގޮތުން ގައުމުތަކުގެ މައްޗަށް ހިންގޭ ބާރަކީ މިއަދު މީހަކު ބާރުގަދަ މީހަކަށް ހަދާ މައިގަނޑު ސަބަބުތަކެވެ. 2026 ވަނަ އަހަރުގެ މި ދަނޑިވަޅުގައި ދުނިޔޭގައި އެންމެ ނުފޫޒުގަދަ ބޭފުޅުންނަށް ބަލާލާއިރު، ތިރީގައިވާ ބޭފުޅުން ފާހަގަ ކޮށްލެވެއެވެ.

1. ޑޮނަލްޑް ޓްރަމްޕް (އެމެރިކާގެ ރައީސް)

ޑޮނަލްޑް ޓްރަމްޕަކީ އެމެރިކާގެ 47 ވަނަ ރައީސްއެވެ. މީގެ އިތުރުން އޭނާއަކީ މަޝްހޫރު ވިޔަފާވެރިއެކެވެ.
ޑޮނަލްޑް ޓްރަމްޕަކީ ނިއުޔޯކަށް އުފަން، ރިއަލް އެސްޓޭޓް ވިޔަފާރީގެ ތެރެއިން ބޮޑު މުއްސަނދި ކަމެއް ހޯއްދެވި ބޭފުޅެކެވެ. އޭނާގެ ފަސް ދަރިން ތިބޭއިރު، އާއިލީ ވިޔަފާރީގައިވެސް އާއިލާގެ މެންބަރުން ބައިވެރިވެއެވެ. 2024 ވަނަ އަހަރުގެ އިންތިހާބު ކާމިޔާބު ކުރައްވައި، 2025 ގައި ދެވަނަ ފަހަރަށް ވެރިކަމަށް ވަޑައިގަތުމަކީ އޭނާގެ ސިޔާސީ ހަޔާތުގެ އެންމެ ބޮޑު ކާމިޔާބީއެވެ.
ދުނިޔޭގެ އެންމެ ބޮޑު އިގުތިސާދާއި އެމެރިކާ ޑޮލަރުގެ ކޮންޓްރޯލް އޮތީ އޭނާގެ އަތްޕުޅުގައެވެ. ދުނިޔޭގައި އޮތް އެންމެ ވަރުގަދަ އަސްކަރިއްޔާގެ "ކޮމާންޑަރ އިން ޗީފް" އަކީ އޭނާއެވެ. އެމެރިކާގެ "އެމެރިކާ ފަސްޓް" ސިޔާސަތުގެ ސަބަބުން ބައިނަލްއަގުވާމީ ވިޔަފާރިއާއި ދުނިޔޭގެ މަސްރަހަށް ބޮޑެތި ބަދަލުތަކެއް އާދެއެވެ.

2. ޝީ ޖިންޕިންގް (ޗައިނާގެ ރައީސް)
ޝީ ޖިންޕިންގ އަކީ ޗައިނާގެ ރައީސް އަދި ކޮމިއުނިސްޓް ޕާޓީގެ ޖެނެރަލް ސެކްރެޓަރީއެވެ. ޝީ ޖިންޕިންގް އަކީ ސިޔާސީ އާއިލާއަކަށް އުފަން ބޭފުޅެކެވެ. އޭނާގެ ބައްޕައަކީ ޗައިނާގެ ކުރީގެ އިސް ލީޑަރެކެވެ. ޒުވާން ދުވަސްވަރު ދަނޑުވެރިކަމުގެ މަސައްކަތްވެސް ކުރެއްވި ޝީ އަކީ ވަރަށް ކެތްތެރި އަދި ހަރުދަނާ ލީޑަރެއްގެ ގޮތުގައި ފާހަގަ ކުރެވެއެވެ. ޗައިނާގެ ގާނޫނަށް ގެނައި ބަދަލާއެކު އޭނާއަށް އުމުރަށް ވެރިކަމުގައި ހުރެވިދާނެއެވެ.

ދުނިޔޭގެ "ފެކްޓްރީ" ގެ ގޮތުގައި ބެލެވޭ ޗައިނާގެ ހުރިހާ ވަސީލަތްތަކެއްގެ މައްޗަށް އޭނާގެ ފުރިހަމަ ބާރު އޮވެއެވެ.
ދުނިޔޭގެ އެކި ގައުމުތަކުގައި އިންފްރާސްޓްރަކްޗާ ބިނާކޮށް، ގައުމުތަކުގެ މައްޗަށް ޗައިނާގެ ނުފޫޒު ވަނީ ފަތުރާފައެވެ.

3. ލަޑީމިއަރ ޕޫޓިން (ރަޝިއާގެ ރައީސް)
ޕޫޓިން އަކީ ކުރިން ރަޝިއާގެ ޖާސޫސީ އިދާރާ (KGB) ގައި މަސައްކަތް ކުރެއްވި ބޭފުޅެކެވެ. އޭނާގެ އަމިއްލަ ދިރިއުޅުމަކީ ވަރަށް ބޮޑަށް ސިއްރުކޮށްފައިވާ ކަމެކެވެ. ނަމަވެސް އޭނާއަކީ ކުޅިވަރަށް، ހާއްސަކޮށް ޖޫޑޯއަށް ލޯބިކުރައްވާ ބޭފުޅެއްކަން އެންމެން ދަނެއެވެ.

ޔޫރަޕާއި ދުނިޔޭގެ ބައެއް އެހެން ގައުމުތަކަށް ބޭނުންވާ ގޭހާއި ތެލުގެ ބޮޑު ބައެއް ކޮންޓްރޯލް ކުރަނީ ރަޝިއާއިންނެވެ. ދުނިޔޭގައި އެންމެ ގިނަ ނިއުކްލިއަރ ހަތިޔާރު ހުރި އެއް ގައުމަކީ ރަޝިއާއެވެ. ހުޅަނގުގެ ގައުމުތަކާ ދެކޮޅަށް އޭނާ ގެންގުޅޭ ހަރުކަށި ސިޔާސަތުތަކުގެ ސަބަބުން ދުނިޔޭގެ ސަލާމަތީ މަސްރަހު ބަދަލުކުރުމުގެ ބާރު އޭނާއަށް ލިބިގެންވެއެވެ.

4. އީލޮން މަސްކް (ޓެކްނޮލޮޖީގެ މަހުޖަނު)

އީލޮން މަސްކް އަކީ ޓެސްލާ، ސްޕޭސް އެކްސް، އަދި އެކްސް (ކުރީގެ ޓްވިޓަރ) ގެ ވެރިޔާއެވެ. ދެކުނު އެފްރިކާއަށް އުފަން މަސްކް އަކީ ދުނިޔޭގެ އެންމެ މުއްސަނދި މީހާއެވެ. އޭނާއަކީ އާދަޔާ ހިލާފަށް ގިނައިން މަސައްކަތްކުރާ، އަދި އާ އީޖާދުތަކަށް ލޯބިކުރާ މީހެކެވެ. އޭނާގެ އަމިއްލަ ދިރިއުޅުމުގައި ގިނަ ކައިވެނިތަކެއް ކޮށްފައިވާއިރު، އޭނާގެ ގިނަ ދަރިންތަކެއް ތިބެއެވެ.
'އެކްސް' މެދުވެރިކޮށް ދުނިޔޭގެ ހަބަރުތަކާއި މީހުންގެ ހިޔާލުތައް ބޭނުން ގޮތަކަށް ބަދަލުކުރުމުގެ ބާރު އޭނާއަށް އެބައޮތެވެ.
ސްޕޭސް އެކްސް މެދުވެރިކޮށް ސެޓެލައިޓް އިންޓަނެޓް (Starlink) ފޯރުކޮށްދިނުމަކީ ހަނގުރާމަތަކާއި މުވާސަލާތީ ދާއިރާގައި އޭނާގެ ނުފޫޒު ގަދަވާ ސަބަބެކެވެ. އޭއައިގެ ދާއިރާގައި އޭނާ ކުރާ މަސައްކަތްތަކީ އިންސާނިއްޔަތުގެ މުސްތަގުބަލަށް ބޮޑު ނުފޫޒެއް ފޯރުވާނެ ކަންކަމެވެ.

މި ބޭފުޅުންގެ ނިންމުންތަކަކީ މުޅި ދުނިޔޭގެ އިގުތިސާދަށާއި، ސަލާމަތަށް އަދި އަޅުގަނޑުމެންގެ އާންމު ދިރިއުޅުމަށްވެސް ސީދާ އަސަރުކުރާ ކަންކަމެވެ. ބާރަކީ ހަމައެކަނި މަގާމެއް ނޫންކަން، މި ބޭފުޅުންގެ އަމަލުތަކުން ސާފުވެއެވެ. ދުނިޔޭގެ މި ބަދަލުވަމުންދާ މަސްރަހުގައި، އެންމެ ބާރުގަދަ މީހަކީ ކާކު ކަމަށް ހީވަނީ؟