ސައޫދީ އަރަބިއްޔާގެ އިމާރާތްކުރުމުގެ ދާއިރާއަކީ މީގެ ކުރިން ގިނައިން ފިރިހެނުން ހަރަކާތްތެރިވަމުން އައި ދާއިރާއެއް ނަމަވެސް، މިހާރު އެ ގައުމުގެ އަންހެނުން ދަނީ މި ސިނާއަތުގައި ފާހަގަކޮށްލެވޭ ފަދަ ކުރިއެރުންތަކެއް ހޯދަމުންނެވެ.

ގައުމުގެ ބޮޑެތި ތަރައްގީގެ މަޝްރޫއުތަކުގައި އަންހެނުންގެ ބައިވެރިވުން އިތުރުވެ، އެކަނބަލުން ދަނީ އާ ތަސައްވުރުތަކާއި ހުނަރުތައް މި ދާއިރާއަށް ގެންނަމުންނެވެ.

ތަފާސްހިސާބު ތަކުން ދައްކާ ގޮތުގައި، ސައޫދީ އަރަބިއްޔާގެ މަސައްކަތުގެ ބާޒާރުގައި އަންހެނުން ބައިވެރިވާ މިންވަރު ވަނީ ފާއިތުވި އަހަރުތަކުގައި ވަރަށް ބޮޑަށް އިތުރުވެފައެވެ. 2017 ވަނަ އަހަރު މި އަދަދު 17 އިންސައްތައިގައި ހުރި އިރު، މިހާރު އެ އަދަދު ވަނީ ގާތްގަނޑަކަށް 35 އިންސައްތައަށް އުފުލިފައެވެ. މިއީ ސައޫދީގެ "ވިޝަން 2030″ އިސްލާހީ އެޖެންޑާގެ ދަށުން ލިބުނު ބޮޑު ކުރިއެރުމެކެވެ.

އިމާރާތްކުރުމުގެ ދާއިރާގައި ހަމައެކަނި އޮފީސް މަސައްކަތްތަކުގެ ބަދަލުގައި، ސައޫދީ އަންހެނުން މިހާރު ފެންނަނީ ސައިޓް އިންޖިނިއަރުންގެ ގޮތުގައެވެ. މީގެ ތެރޭގައި މައިނިންގ އިންޖިނިއަރުންނާއި، ގާ ހޯދުމާއި ފަރުމާކުރުމުގެ މާހިރުން އަދި ބޮޑެތި މަޝްރޫއުތައް މެނޭޖްކުރާ ފަރާތްތައް ހިމެނެއެވެ.

މި ދާއިރާގައި ހަރަކާތްތެރިވާ ބައެއް އަންހެން މާހިރުން ފާހަގަކުރާ ގޮތުގައި، ކުރިން މި މަސައްކަތްތަކުގައި އަންހެނުން އުޅުމުން ހައިރާންކަން ލިބުނު ނަމަވެސް، މިހާރު އެކަނބަލުންގެ ފަންނީ ގާބިލުކަމާއި ނެރޭ ނަތީޖާއަށް ސިނާއަތުގެ އިތުބާރު ވަނީ ލިބިފައެވެ.

ދިރިއްޔާ، ރެޑް ސީ އަދި ގިއްދިޔާ ފަދަ ސައޫދީގެ މެގަ-ޕްރޮޖެކްޓް ތަކުގެ ސަބަބުން ގިނަ އަދަދެއްގެ މީހުން މަސައްކަތްތަކަށް ބޭނުންވެއެވެ. މިކަމުގެ ސަބަބުން އަންހެނުންނަށް ފުރުސަތުތައް ފަހިވެ، އިންޖިނިއަރިންގ އަދި އާކިޓެކްޗަރ ކިޔަވައިގެން ނުކުންނަ އަންހެން ކުދިންގެ އަދަދުވެސް ވަނީ އިތުރުވެފައެވެ.

މި ބަދަލާއެކު، އިމާރާތްކުރުމުގެ ސިނާއަތުގައި މައްސަލަތައް ހައްލުކުރުމާއި، ރޭވުންތެރިކަމުގެ ތެރެއަށް އަންހެނުންގެ ޚާއްސަ ވިސްނުންތައް ވަދެ، މަސައްކަތުގެ ފެންވަރު ރަނގަޅުވަމުންދާ ކަމަށް މާހިރުން ދެކެއެވެ. މިއީ ހަމައެކަނި ވަޒީފާގައި ބައިވެރިވުމެއް ނޫނެވެ؛ މިއީ ސައޫދީގެ މުސްތަގުބަލު ބިނާކުރުމުގައި އަންހެނުންގެ ހިއްސާ އާ އުސްމިންތަކަކަށް ގެންދިއުމެވެ.