ވޭތުވެދިޔަ 70 އަހަރު ދުވަހު އިސްރާއީލުން މަސައްކަތް ކުރަމުން އައިސްފައިވަނީ ވަކި ބޯޑަރެއް ކަނޑައެޅިގެންވާ ދައުލަތެއްގެ ގޮތުގައެއް ނޫނެވެ.

އޭގެ ބަދަލުގައި އެ ގައުމުން ބޭނުންކުރަމުންދަނީ "ބަދަލުވަމުންދާ ރޮނގުތަކެއް" ނުވަތަ "ފްލުއިޑް ލައިންސް" އެވެ. 1947 ވަނަ އަހަރުގެ ބައިކުރުމުގެ ޕްލޭނުން ފެށިގެން މިއަދުގެ އަސްކަރީ ސިޔާސަތުތަކާ ހަމައަށް، އިސްރާއީލުގެ ބޯޑަރުތަކަކީ ބައިނަލްއަގުވާމީ ގާނޫނުތަކަށް ގޮންޖަހައި، ފުޅާވަމުންދާ އަމާޒުތަކެކެވެ.

އިސްރާއީލުން އަމިއްލަ ދައުލަތަށް ވަކި ބޯޑަރެއް އޮތްކަމަށް ގަބޫލުނުކުރާ ފަދައިން، އަވަށްޓެރި ގައުމުތަކުގެ މިނިވަން ބޯޑަރުތަކަށްވެސް އިހުތިރާމެއް ނުކުރެއެވެ. އީރާނުން ފެށިގެން މިސްރާ ހަމައަށް ހުރި ބޯޑަރުތަކަކީ އެ ގައުމުގެ ކުރިމަތީގައި ހަމައެކަނި ޗާޓެއްގައި ކުރަހާފައިވާ ރޮނގުތަކެކެވެ.

ފަލަސްތީނުގެ ބިންތައް ފޭރިގަނެގެން އިސްރާއީލް އުފެއްދިއިރު، އދ. ގެ 181 ވަނަ ގަރާރުގެ ދަށުން ވަކި ބޯޑަރުތަކެއް ކަނޑައެޅުނެވެ. ނަމަވެސް ޒަޔަނިސްޓް ލީޑަރުންގެ އަސްލު މަގުސަދަކީ އެ ބޯޑަރުތަކުގެ ތެރޭގައި ތިބުމެއް ނޫނެވެ. އިސްރާއީލުގެ ފުރަތަމަ ބޮޑުވަޒީރު ޑޭވިޑް ބެން-ގޫރިއަން އޭރު ވިދާޅުވެފައިވަނީ، ދައުލަތެއް އުފެއްދުމަކީ މުޅި ފަލަސްތީނަށް ވެރިވެގަތުމަށް އެޅޭ "ފުރަތަމަ ފިޔަވަޅު" ކަމަށެވެ.

1948 ގެ ހަނގުރާމައަށްފަހު އުފެދުނު "ފެހި ރޮނގު" އަކީވެސް ދާއިމީ ބޯޑަރެއްގެ ގޮތުގައި އިސްރާއީލުން ދުވަހަކުވެސް ބަލައިގެންފައެއް ނުވެއެވެ. އޭގެ ބަދަލުގައި އެއީ ފުރުސަތު ލިބުނުހާ އަވަހަކަށް ބަދަލުކޮށްލާނެ ވަގުތީ ރޮނގަކަށް ވަނީ ހަދާފައެވެ.

މިއަދު އިސްރާއީލުން ވަނީ ބޯޑަރުތަކުގެ މާނަ އާ ހަރުފަތަކަށް ގެންގޮސްފައެވެ. ޣައްޒާ އާއި ލުބުނާނުގައި އެ ގައުމުން ބޭނުންކުރަމުންދަނީ "ރީނދޫ ރޮނގު" އެވެ. މިއީ ސަލާމަތީ ސަބަބުތަކަށްޓަކައި ކަމަށް ބުނެ، އަވަށްޓެރި ގައުމުތަކުގެ ބިންތަކަށް ވެރިވެގަތުމަށް ބޭނުންކުރާ އުކުޅެކެވެ.

ސަލާމަތީ " ޒޯން" ތަކެއް ހެދުމުގެ ނަމުގައި ޣައްޒާގެ ބޮޑު ބައެއް ވަނީ ހިސާރުކޮށްފައެވެ.
އދ. އިން ބަލައިގެންފައިވާ "ބްލޫ ލައިން" އަށް އިހުތިރާމް ކުރުމުގެ ބަދަލުގައި، އިސްރާއީލުން ދަނީ ލިޓާނީ ކޯރާ ހަމައަށް ދެކުނު ލުބުނާނުގެ ބިންތައް ފޭރިގަތުމަށް މަސައްކަތް ކުރަމުންނެވެ.

އީރާނާ ގުޅޭގޮތުން ގެންގުޅޭ "ރަތް ރޮނގު" އަކީ މުޅި ސަރަހައްދުގެ އަސްކަރީ ބާރުވެރިކަން އެކަނި އިސްރާއީލަށް އޮތުމަށް ކަނޑައަޅާފައިވާ ސިޔާސަތެކެވެ.

އިސްރާއީލުގެ މިހާރުގެ އަމާޒަކީ ހަމައެކަނި ހަނގުރާމައިގެ ޒަރީއާއިން ބިން ހޯދުމެއް ނޫނެވެ. އޭގެ ބަދަލުގައި އަރަބި ގައުމުތަކާއެކު ގުޅުންތައް ބަދަލުކުރުން ނުވަތަ "ނޯމަލައިޒޭޝަން" މެދުވެރިކޮށް، ފަލަސްތީނުގެ މައްސަލައަށް ހައްލެއް ނުހޯދައި، އެ ގައުމުން ހިފާފައިވާ ބިންތަކަކީ އެ ގައުމުގެ ބިންތަކެއްގެ ގޮތުގައި ބަލައިގަތުމަށް މަޖުބޫރު ކުރުވުމެވެ.

މި ސިޔާސަތުގެ ދަށުން، ދީނީ އަދި ތާރީޚީ ވާހަކަތައް ބޭނުންކޮށްގެން، ބައިނަލްއަގުވާމީ ގާނޫނުތަކާ ޚިލާފަށް ބިންތައް ފުޅާކުރުމަކީ " އެމީހުންގެ ދީނުގައި ނިންމާފައިވާ" ކަމަށް ދައްކަން މަސައްކަތް ކުރެއެވެ.

ނިންމުން
މިއަދު "ބޮޑު އިސްރާއީލް" (Greater Israel) އަކީ ހަމައެކަނި ޚިޔާލީ ވާހަކައެއް ނޫނެވެ. އެއީ އީރާނުގެ ބޯޑަރުން ފެށިގެން މިސްރާ ހަމައަށް ފެތުރިފައިވާ ނުރައްކާތެރި ހަގީގަތެކެވެ. މި ސިޔާސަތުގެ ސަބަބުން މެދުއިރުމަތީގައި އެއްވެސް ގައުމެއްގެ ބޯޑަރަކީ އަމާން ނުވަތަ ރައްކާތެރި ތަނެއްގެ ގޮތުގައި ނޯންނާނެއެވެ. ސުލްހަވެރިކަމާއެކު އުޅުމުގެ ބަދަލުގައި އިސްރާއީލުގެ މައިގަނޑު އަމާޒަކީ މުޅި ސަރަހައްދުގެ މައްޗަށް ގަދަވެގަތުމެވެ.