ދުނިޔޭގެ މަޝްހޫރު ފާސްޓް ފުޑް ޗެއިން، ކޭއެފްސީ އިން ކުރާ އިޝްތިހާރުތަކުގައި ދައްކާ ގޮތަށް، އެ ކުންފުނިން ވިއްކާ ކުކުޅު ބާލިދީ ފުރާފައި ނެތް ކަމަށް ބުނެ، އެމެރިކާގެ ނިއުޔޯކަށް ނިސްބަތްވާ އަންހެނަކު އެ ކުންފުންޏާ ދެކޮޅަށް 20 މިލިއަން ޑޮލަރުގެ ބަދަލެއް ހޯދަން ކޯޓަށް މައްސަލައެއް ހުށަހަޅައިފިއެވެ.

އުމުރުން 64 އަހަރުގެ އެންނާ ވޯޓްޒްބާގާ ނަމަކަށް ކިޔާ މި އަންހެން މީހާ ބުނި ގޮތުގައި، އޭނާ 20 ޑޮލަރަށް ގަތް "ފެމިލީ ފިލް" ބާލިދީގައި ހުރީ އިޝްތިހާރުގައި ދައްކާ ވަރަށް ވުރެ މާ މަދު ކުކުޅު ކޮޅެކެވެ. އިޝްތިހާރުގައި ކުކުޅުތައް ބާލިދީން ބޭރަށް ވެސް ހުންނަ މަންޒަރު ފެނުނަސް، އޭނާއަށް ލިބުނު ބާލިދީގައި ކުކުޅު ހުރީ ބާލިދީގެ ދެބައިކުޅަ އެއްބަޔަށް ވުރެވެސް މަދުން ކަމަށް އޭނާ ބުނެއެވެ.

"އިޝްތިހާރުގައި ދައްކަނީ މުޅި ބާލިދީ ފުރިފައި ހުންނަ ތަން. އެކަމަކު އަހަންނަށް ލިބުނު ބާލިދީގެ އެއްބައިވެސް ނެތް ފުރިފައެއް،" އެންނާ ބުންޏެވެ. އޭނާ އިތުރަށް ބުނި ގޮތުގައި މިއީ މުޅި އާއިލާއަކަށް ފުދޭވަރުގެ ކެއުމެއް ކަމަށް ބުނެ ކުރާ އިޝްތިހާރުތަކަކީ ކަސްޓަމަރުންނަށް އޮޅުވާލުމެކެވެ.

މި މައްސަލައިގައި އޭނާ ކޭއެފްސީގެ މައި އޮފީހަށް ގުޅައި ޝަކުވާ ކުރުމުން، އެ ކުންފުނިން ވަނީ ބަދަލެއްގެ ގޮތުގައި 70 ޑޮލަރުގެ ހިލޭ ކޫޕަން ދޭން ހުށަހަޅާފައެވެ. ނަމަވެސް އެންނާ ވަނީ އެ ހުށަހެޅުމަށް އިންކާރުކޮށް، މިއީ އިންސާފުގެ މައްސަލައެއް ކަމަށް ބުނެ 20 މިލިއަން ޑޮލަރުގެ ބަދަލެއް ހޯދަން ދައުވާކޮށްފައެވެ.

ކޭއެފްސީން މި ދައުވާއަށް ރައްދު ދެމުން ބުނެފައިވަނީ، މިއީ އެއްވެސް އަސާސެއް ނެތް ދައުވާއެއް ކަމަށެވެ. އަދި އިޝްތިހާރުތަކުގައި ކުކުޅުތައް ބާލިދީގެ މައްޗަށް އަރުވާފައި ހުންނަނީ، ބާލިދީގެ ތެރޭގައި ހުރި ތަކެތި ކަސްޓަމަރުންނަށް ސާފުކޮށް ދެއްކުމުގެ ބޭނުމުގައި ކަމަށްވެސް އެ ކުންފުނިން ބުނެފައިވެއެވެ.

މި މައްސަލައާ ގުޅިގެން ސޯޝަލް މީޑިއާގައި ގިނަ ބައެއްގެ ސަމާލުކަން ވަނީ ހުއްޓިފައެވެ. ބައެއް މީހުން މި އަންހެން މީހާގެ ދައުވާއަށް ތާއީދު ކުރާއިރު، އަނެއް ބަޔަކު ބުނަނީ މިއީ ބޮޑު އަދަދަކުން ފައިސާ ހޯދަން ކުރާ ބޭކާރު ކަމެއް ކަމަށެވެ.