ރާއްޖޭގައި މިއަދު ފެށި 20 އަހަރުން ދަށުގެ ސާފް ޗެމްޕިއަންޝިޕްގެ ފުރަތަމަ މެޗުގައި، ދެ ލަނޑުގެ ލީޑެއް ދިފާއު ކުރުމަށް ކުޅުުނު ދިވެހި ޒުވާން ޓީމު ސްރީ ލަންކާ އަތުން 3-2 އިން ބަލިވެއްޖެއެވެ.
ގަލޮޅު ދަނޑުގައި ކުޅުނު މި މެޗުގެ ފުރަތަމަ ހާފްގައި ރާއްޖޭގެ ކެޕްޓަން އިލާން އިމްރާން ވަނީ ދެ ލަނޑު ޖަހައި ދިވެހި ސަޕޯޓަރުންނަށް ވަރަށް ބޮޑު ހިތްހަމަ ޖެހުމެއް ގެނެސްދީފައެވެ. ފުރަތަމަ ލަނޑު 28 ވަނަ މިނިޓުގައި ޖެހިއިރު، ދެވަނަ ލަނޑު ޖެހީ ފުރަތަމަ ހާފްގެ އިތުރު ވަގުތުގައެވެ.
ނަމަވެސް، ދެވަނަ ހާފްގައި ލަންކާ ޓީމުން ވަނީ ހިތްވަރާ ގަދަ ކުޅުމެއް ދައްކައި ކުޑަ ވަގުތުކޮޅެއްގެ ތެރޭގައި ތިން ލަނޑު ޖަހައި ނަތީޖާ އަނބުރާލައިފައެވެ. ލަންކާގެ ލަނޑުތައް ޖެހީ މުހައްމަދު ހަތީމް، އަހްމަދު ހިޖާޒީ، އަދި ކެޕްޓަން ހުސެއިން އަބްދުﷲ — ފަހު ލަނޑު ޕެނަލްޓީ އަކުންނެވެ.
މި ބަލިވުމާ ގުޅިގެން ސެމީ ފައިނަލަށް ދިއުމަށް ރާއްޖެ ކުރަންޖެހޭ މަސައްކަތް ވަރަށް ބޮޑަށް ބުރަ ވެއްޖެއެވެ. ހަވީރުގެ ދެވަނަ މެޗުގައި ނޭޕާލުން ވަނީ ބޫޓާން 2-1 އިން ބަލިކޮށްފައެވެ.
މާދަމާ ކުޅޭ ގްރޫޕް ބީ ގެ މެޗުގައި، ހަވީރު 3:45 ގައި ބައްދަލުކުރާނީ ބަންގްލަދޭޝް އާއި ޕާކިސްތާނެވެ.
