އެމެރިކާއާއި އިޒްރޭލް ގުޅިގެން އީރާނަށް ދެމުންދާ ވަރުގަދަ އަސްކަރީ ހަމަލާތަކާ ގުޅިގެން، ހޮލީވުޑްގެ މަޝްހޫރު ފަންނާނުން އެކަން ހަރުކަށި އިބާރާތުން ކުށްވެރިކޮށް އަޑުއުފުލަން ފަށައިފިއެވެ.

މެދުއިރުމަތީގެ މަޝްރަހު ނުހަނު ބޮޑަށް ގޯސްވެފައިވާ މި ދަނޑިވަޅުގައި، ފެބުރުއަރީ 28 ވަނަ ދުވަހުގެ ފަތިހުގެ ވަގުތެއްގައި ދޭން ފެށި މި ހަމަލާތަކާ ގުޅިގެން ދުނިޔޭގެ ސަމާލުކަން ވަނީ މިކަމަށް ހުއްޓިފައެވެ. މި ހަމަލާތަކާ ގުޅިގެން ހޮލީވުޑްގެ އެކްޓަރުންނާއި، މިއުޒިކީ ފަންނާނުންގެ އިތުރުން ލިޔުންތެރިން ވެސް ދަނީ ސޯޝަލް މީޑިއާ މެދުވެރިކޮށް ކަންބޮޑުވުން ފާޅުކުރަމުންނެވެ.

މިގޮތުން މަޝްހޫރު އެކްޓްރެސް ރޯޒީ އޯޑޮނަލް އާއި މާކް ރުފަލޯ ފަދަ ތަރިން ވަނީ މި ހަމަލާތަކަކީ އިންސާނީ ކަރާމާތަށް ހުރި ނުރައްކަލެއްގެ ގޮތުގައި ސިފަކޮށްފައެވެ. ރޯޒީ އޯޑޮނަލް އޭނާގެ ސޯޝަލް މީޑިއާގައި ކުރި ޕޯސްޓެއްގައި އެމެރިކާގެ ސިޔާސީ ލީޑަރުންނަށް ވަރަށް ބޮޑަށް ފާޑުކިޔާފައިވެއެވެ. އޭނާ ވަނީ ޑޮނަލްޑް ޓްރަމްޕްގެ ކެމްޕޭން ވައުދުތަކާ ހަވާލާދީ، ހަނގުރާމަ ހުއްޓުވާނެ ކަމަށް ބުނެ ދައްކާ ވާހަކަތަކަކީ ދޮގެއް ކަމަށް ބުނެފައެވެ.

އެމެރިކާއާއި އިޒްރޭލުން ދިން މި ހަމަލާތަކުގައި އީރާނުގެ އަސްކަރީ މަރުކަޒުތަކާއި މުހިންމު ބިނާތަކަށް ވަނީ އަމާޒުކޮށްފައެވެ. މި ހަމަލާތަކުގައި އީރާނުގެ އެންމެ މަތީ ލީޑަރު އަޔާތުالله އަލީ ޚާމަނާއީ އާއި އެ ގައުމުގެ އަސްކަރީ އިސް ވެރިޔާ އަބްދުއްރަހީމް މޫސަވީ އަވަހާރަވެފައިވާ ކަމަށް ބައެއް ރިޕޯޓްތައް ބުނެއެވެ.

މި ހަމަލާތަކުގެ ބަދަލުހިފުމުގެ ގޮތުން އީރާނުން ވެސް ދަނީ މިސައިލާއި ޑްރޯން ބޭނުންކޮށްގެން ހަމަލާތައް ދެމުންނެވެ. މި ކުރިމަތިލުންތަކުގެ ސަބަބުން ސަރަހައްދީ ހަމަޖެހުން ގެއްލި، އާންމު ރައްޔިތުންނަށް ކުރިމަތިވެދާނެ އިންސާނީ ކާރިސާއަކާ މެދު ފަންނާނުން ދަނީ ބޮޑު ކަންބޮޑުވުމެއް ފާޅުކުރަމުންނެވެ.

މީގެ އިތުރުން، މި ހަމަލާތައް ދިން ވަގުތަކީ އިންޑިއާގެ މަޝްހޫރު އެކްޓަރު އަޖިތު ކުމާރު ދުބާއީގައި ހުރި ވަގުތަކަށް ވުމުން، އޭނާގެ ސަލާމަތާ މެދު ވެސް ފޭނުން ކަންބޮޑުވުން ފާޅުކޮށްފައިވެއެވެ. ނަމަވެސް ފަހުގެ ޚަބަރުތައް ބުނާގޮތުން އޭނާ މިހާރު ހުރީ ސަލާމަތުންނެވެ.