އެމެރިކާއާއި އިޒްރޭލުން ގުޅިގެން އީރާނާ ދެކޮޅަށް ފަށާފައިވާ ހަނގުރާމައިގެ ސަބަބުން ދުނިޔޭގެ އިގްތިސާދަށް ބޮޑެތި ލޮޅުންތަކެއް އަރަމުންދާއިރު، އެމެރިކާގެ ހިއްސާގެ ބާޒާރުން ދެ ހަފުތާގެ ތެރޭގައި 2.2 ޓްރިލިއަން އެމެރިކާ ޑޮލަރު ފޮހެވިގެން ހިނގައްޖެއެވެ.
އެމެރިކާގެ އެންމެ ބޮޑު ކުންފުނިތައް ހިމެނޭ އެސް އެންޑް ޕީ 500 (S&P 500) އިންޑެކްސް އިއްޔެ ވަނީ 0.61 އިންސައްތަ ދަށަށް ގޮސް، 6,632.19 ޕޮއިންޓަށް ވެއްޓިފައެވެ. މިއީ 2026 ވަނަ އަހަރު މިހާތަނަށް މި އިންޑެކްސް އެންމެ ދަށަށް ދިޔަ ފަހަރެވެ. މި ދަށްވުމާއެކު، އެންމެ ފަހުން އިންޑެކްސް ހުރި އެންމެ މަތީ މިންވަރަށްވުރެ މިހާރު ވަނީ 5 އިންސައްތަ ދަށަށް ގޮސްފައެވެ.
ބާޒާރުގެ އަގުތައް ވެއްޓެން ފަށާފައިވަނީ ފެބްރުއަރީ 27 ވަނަ ދުވަހުން ފެށިގެންނެވެ. އެއީ އެމެރިކާއާއި އިޒްރޭލުން އީރާނާ ދެކޮޅަށް ހަނގުރާމަ ފެށި ދުވަހުގެ ކުރީ ދުވަހެވެ. އެ ދުވަހުން ފެށިގެން މިހާތަނަށް ބާޒާރުގެ އަގުތައް ވަނީ 3.6 އިންސައްތަ ދަށަށް ގޮސްފައެވެ. މި ބަދަލުގެ ސަބަބުން އެމެރިކާގެ ރައްޔިތުންގެ ރިޓަޔަރމަންޓް ފަންޑުތަކާއި، ޕެންޝަން ފަންޑުތަކަށް ބޮޑެތި ގެއްލުންތަކެއް ލިބޭނެ ކަމަށް ބެލެވެއެވެ.
މީގެ އިތުރުން، އެމެރިކާގެ މަރުކަޒީ ބޭންކު (ފެޑް) އިން އިންޓްރެސްޓް ރޭޓް 3.5 އާއި 3.75 އިންސައްތައާ ދެމެދު ހިފެހެއްޓުމަށް ނިންމުމާ ގުޅިގެންވެސް ބާޒާރަށް ވަނީ ނޭދެވޭ އަސަރުތަކެއް ކޮށްފައެވެ. ފެޑްގެ ރައީސް ޖެރޯމް ޕަވަލް އިންޒާރު ދެއްވާފައިވަނީ އީރާނުގެ ހަނގުރާމައާ ގުޅިގެން ތެލުގެ އަގު އުފުލެމުން ދިއުމަކީ (ޑަބްލިޔު.ޓީ.އައި ތެޔޮ ފީފާއެއް 99 ޑޮލަރަށް އަދި ބްރެންޓް ތެޔޮ 110 ޑޮލަރަށް) އިންފްލޭޝަން މަތިވެ އިގްތިސާދީ ނުތަނަވަސްކަން އިތުރުވާނެ ކަމެއް ކަމަށެވެ.
މި ހަނގުރާމައިގެ ސަބަބުން ތެލުގެ އަގު އުފުލި، ދުނިޔޭގެ މާލީ ބާޒާރުތަކަށް ވަނީ ބޮޑު ގުޑުމެއް އަރާފައެވެ. އަދި އިންފްލޭޝަން ކޮންޓްރޯލް ކުރުމަށް ކުރާ މަސައްކަތްތަކަށް މީގެ ސަބަބުން ހުރަސް އެޅެމުންދާކަން މާހިރުން ފާހަގަކުރެއެވެ.
