މިއަހަރުގެ ބަރަކާތްތެރި ރަމަޟާން މަސް ނިމި، ފިތުރު އީދު ދުވަސް ކަނޑައެޅުމަށްޓަކައި ޝައްވާލް މަހުގެ ހަނދު ބެލުމަށް ސައުދީ އަރަބިއްޔާގެ ސުޕްރީމް ކޯޓުން އެ ގައުމުގެ އެންމެހައި މުސްލިމުންނަށް އިލްތިމާސްކޮށްފިއެވެ.

ސައުދީގެ ސުޕްރީމް ކޯޓުން ނެރުނު ބަޔާނެއްގައި ބުނެފައިވަނީ، 2026 މާރިޗު 18 ވާ ބުދަ ދުވަހުގެ އިރުއޮއްސޭ ވަގުތު، ޝައްވާލް މަހުގެ ހަނދު ފެނޭތޯ ބެލުމަށް އެދޭ ކަމަށެވެ.

އީދު ދުވަސް ކަނޑައެޅޭނެ ގޮތް:

ބުދަ ދުވަހުގެ ރޭ ހަނދު ފެނިއްޖެނަމަ: ރަމަޟާން މަސް 29 ދުވަހުން ނިމި، މާރިޗު 19 ވާ ބުރާސްފަތި ދުވަހަކީ މިއަހަރުގެ ފިތުރު އީދު ދުވަސް ކަމަށް ކަނޑައެޅޭނެއެވެ.

ބުދަ ދުވަހުގެ ރޭ ހަނދު ނުފެނިއްޖެނަމަ: ރަމަޟާން މަހުގެ 30 ދުވަސް ހަމަކުރުމަށްފަހު، މާރިޗު 20 ވާ ހުކުރު ދުވަހަކީ އީދު ދުވަސް ކަމުގައި ބެލެވޭނެއެވެ.

ސުޕްރީމް ކޯޓުން ބުނެފައިވަނީ ހަނދު ފެނިއްޖެ މީހަކު، އަމިއްލަ ލޮލުން ފެނުނު ކަމުގައި ވިޔަސް ނުވަތަ ދޫރުބިނާ ފަދަ އާލާތެއް ބޭނުންކޮށްގެން ފެނުނު ކަމުގައި ވިޔަސް، ވީ އެންމެ އަވަހަކަށް އެންމެ ކައިރީގައި ހުރި ކޯޓަކަށް އެކަން ރިޕޯޓުކޮށް ހެކިބަސް ދިނުމަށް އެދޭ ކަމަށެވެ.

އާންމުގޮތެއްގައި ސައުދީ އަރަބިއްޔާއިން ހަނދު ފެނުމާ ގުޅިގެން އިސްލާމީ ގިނަ ގައުމުތަކުން އީދު ފާހަގަކުރާ ދުވަސް ކަނޑައަޅައެވެ. ރާއްޖޭގައި ވެސް ހަނދު ސާބިތުކުރުމުގެ ރަސްމީ ޖަލްސާ ބުދަ ދުވަހުގެ ރޭ އޮންނާނެއެވެ.