އެމެރިކާ، އިސްރާއީލް އަދި އީރާން ހިމެނޭ ގޮތަށް ކުރިއަށްދާ ގިނަ ހަނގުރާމަ އިތުރަށް ގޯސްވަމުންދާއިރު، ދުނިޔޭގެ ސަލާމަތީ އަދި އިންޓެލިޖެންސް އިދާރާތަކަށް ވަނީ އާ ކަންބޮޑުވުންތަކަކާ ކުރިމަތިލާންޖެހިފައެވެ.

2026 ވަނަ އަހަރުގެ ފެބްރުއަރީ މަހުގެ ފަހުކޮޅު ދިން އަމާޒުކުރެވިފައިވާ ހަމަލާތަކުގައި އީރާނުގެ ސުޕްރީމް ލީޑަރު އަލީ ޚާމަނާއީ އާއި އެހެނިހެން އިސް އޮފިޝަލުން އަވަހާރަކޮށްލުމާ ގުޅިގެން، ހުޅަނގުގެ އިންޓެލިޖެންސް އެޖެންސީތަކުން ދަނީ އީރާނުގެ ސިއްރު ބަދަލުހިފުމުގެ ސްޓްރެޓެޖީއެއް ކަމަށްވާ "ސްލީޕަރ ސެލް" ތައް އެކްޓިވޭޓް ކޮށްފާނެކަމުގެ އިންޒާރު ދެމުންނެވެ.

އާންމު އަސްކަރީ ހަމަލާތައް ސުރުޚީތަކުގައި އޮތް ނަމަވެސް، މި ސިއްރު ނެޓްވޯކްތައް ހަރަކާތްތެރިވުމަކީ މި ހަނގުރާމައިގެ މުޅިން އައު މަރުޙަލާއަކަށް ވެދާނެއެވެ.

މިހާރުގު ހާލަތު ހައި އެލާރޓައް އައުމުގެ އެންމެ ބޮޑު ސަބަބަކީ ދާދި ފަހުން އަތުލައިގަނެވުނު މުވާސަލާތީ މެސެޖުތަކެކެވެ. 9 މާރިޗު 2026 ގައި ރިޕޯޓުކޮށްފައިވާ ގޮތުގައި، އީރާނުން ފޮނުވިކަމަށް ބެލެވޭ އެންކްރިޕްޓެޑް މެސެޖުތަކެއް އެމެރިކާގެ އިންޓެލިޖެންސަށް ވަނީ ލިބިފައެވެ.

ގާނޫނު ތަންފީޒުކުރާ އިދާރާތަކަށް ފޮނުވިފައިވާ ސަރުކާރުގެ އެލާޓްތަކާ ހަވާލާދީ ބުނާގޮތުން، މި ސިގްނަލްތަކަކީ ތެހެރާނަށް ދިން ހަމަލާތަކަށްފަހު ގިނަ ގައުމުތަކަކަށް ފޯރުކޮށްދީފައިވާ މެސެޖުތަކެކެވެ. މިއީ ބޭރުގައި ތިބި ސިއްރު އޭޖެންޓުންނަށް ހަރަކާތްތެރިވުމަށް ނުވަތަ އިރުޝާދު ދިނުމަށް ފޮނުވި "އޮޕަރޭޝަނަލް ޓްރިގަރ" އެއް ކަމަށް އިންޓެލިޖެންސް އޮފިޝަލުން ބުނެއެވެ. ވަކި ހާއްސަ ނުރައްކަލެއް ނުވަތަ ހަމަލާއެއް ދޭނެކަން އަދި ކަށަވަރު ކުރެވިފައި ނުވި ނަމަވެސް، މި މެސެޖުގެ ސަބަބުން މުޅި ދުނިޔޭގެ ސަލާމަތީ ބާރުތައް ވަނީ ދިފާއީ ގޮތުން ފާރަވެރިކަން އިތުރުކޮށްފައެވެ.
ސްލީޕަރ ސެލްތަކުގެ ބިރަކީ ހަމައެކަނި ޚިޔާލީ ކަމެއް ނޫނެވެ. ދާދި ފަހުން ހިނގާދިޔަ ބައެއް ހާދިސާތަކުގެ ސަބަބުން މި ޕްރޮކްސީތައް މިހާރު ހަރަކާތްތެރިވާން ފަށާފައިވާކަމުގެ ކަންބޮޑުވުން ވަނީ އިތުރުވެފައެވެ.

މިގޮތުން ފާހަގަ ކޮށްލެވޭ ކަންކަމަކީ އުތުރު އެމެރިކާގެ ހަމަލާތައް: ޓެކްސަސްގެ އޮސްޓިންގެ ބާއެއްގައި ދިން ބަޑީގެ ހަމަލާއަކާއި، ކެނެޑާގައި އީރާނާ ދެކޮޅު ފަރާތެއްގެ ޖިމަކަށް ދިން ހަމަލާއެއް ގާނޫނު ތަންފީޒުކުރާ ފަރާތްތަކުން ދަނީ ތަޙްޤީޤުކުރަމުންނެވެ. އޮސްޓިންގެ މައްސަލާގައި ޝައްކުކުރެވޭ މީހާގެ އެޕާޓްމަންޓުން އީރާނުގެ ދިދަތަކާއި ލީޑަރުންގެ ފޮޓޯތައް ވަނީ ފެނިފައެވެ. މިއާއެކު އެފް.ބީ.އައިގެ ޖޮއިންޓް ޓެރަރިޒަމް ޓާސްކް ފޯސްއިން ދަނީ މިއީ ޓެރަރިޒަމާ ގުޅުންހުރި ކަމެއްތޯ ބަލަމުންނެވެ.

ގަލްފުން ހައްޔަރުކުރުން: މާރިޗު މަހުގެ ކުރީކޮޅު ގަތަރުގެ ސަލާމަތީ ބާރުތަކުން ވަނީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް އާ ގުޅުންހުރި ދެ ސެލްއެއް ހައްޔަރުކޮށްފައެވެ. މިއީ އެމެރިކާ އާއި އިސްރާއީލުގެ ބޮމުގެ ހަމަލާތައް ފެށުނު ފަހުން ގަލްފުން މިފަދަ ބަޔަކު ހައްޔަރުކުރި ފުރަތަމަ ފަހަރެވެ.

އީރާނުގެ ބަދަލުހިފުމުގެ އަމަލުތައް މެދުއިރުމަތި ފަހަނައަޅައި ޔޫރަޕަށް ފޯރުމަކީ އެކަށީގެންވާ ކަމެއްކަމަށް ޖަރުމަނުގެ އިންޓެލިޖެންސުން ވަނީ އާންމުކޮށް އިންޒާރުދީފައެވެ. އަދި މުޅި ޔޫރަޕް ބައްރުގައި ސެކިއުރިޓީ އާއި މޮނިޓަރކުރުން ވަނީ ވަރުގަދަކޮށްފައެވެ.

އީރާނުން ޕްރޮކްސީ ނެޓްވޯކްތަކާއި ސިއްރު އޭޖެންޓުންނަށް ބަރޯސާވުމަކީ އެމީހުންގެ ދިފާއީ ސްޓްރެޓެޖީގެ މުހިންމު ބައެކެވެ. މިއަށް އަސްކަރީ ތަޖުރިބާކާރުން އާންމުކޮށް ކިޔަނީ "މޮޒެއިކް ޑިފެންސް" އެވެ. އެމެރިކާ ނުވަތަ އިސްރާއީލުގެ އަސްކަރީ ބާރާ ސީދާ ކުރިމަތިލުމުގެ ގާބިލުކަން އީރާނަށް ނެތުމުން، އެގައުމުން ބޭނުންކުރަނީ މިފަދަ ނުސީދާ އަދި ޚަރަދުކުޑަ ހަނގުރާމައިގެ އުކުޅުތަކެވެ.

ސްލީޕަރ ސެލްތައް އާންމުގޮތެއްގައި ބޭރު ގައުމުތަކުގައި އާދައިގެ ދިރިއުޅުމެއް އުޅެމުން އެތައް އަހަރެއް ވަންދެން ސިއްރުން އުޅެއެވެ. އެމީހުންގެ ފުރަތަމަ މަސައްކަތަކީ "ހާޑް ޓާގެޓްސް" (އަސްކަރީ ބޭސްތަކާއި ސަރުކާރުގެ އިމާރާތްތައް) އަދި "ސޮފްޓް ޓާގެޓްސް" (ސަރުކާރާ ދެކޮޅު މީހުންނާއި މުހިންމު އުމްރާނީ ވަސީލަތްތައް) ގެ މައުލޫމާތު އެއްކޮށް ފާރަލުމެވެ.

އައި.އާރް.ޖީ.ސީ އަދި ހިޒްބުالله ފަދަ ޖަމާޢަތްތައް މެދުވެރިކޮށް، އީރާނުން މި ކުދި ސިއްރު ސެލްތައް ބޭނުންކޮށްގެން މުހިންމު މީހުން މެރުމާއި ސްޓްރެޓެޖިކް ހަމަލާތައް ދެއެވެ.
ޕްރޮކްސީ ހަމަލާތަކުގެ ސަބަބުން، ސީދާ އީރާނުން ދިން ހަމަލާއެއްކަމަށް އެއްބަސްނުވެ، ދުޝްމަނުންނަށް ހަމަލާދިނުމުގެ ފުރުސަތު އީރާނަށް ލިބެއެވެ. މީގެ ސަބަބުން ސީދާ އަސްކަރީ ރައްދެއް ދިނުމަށް ދުޝްމަނުންނަށް އުނދަގޫވެއެވެ.

މި ނުރައްކާތައް ހުރިނަމަވެސް، ސެކިއުރިޓީ ތަޖުރިބާކާރުން އާންމުންނަށް އިރުޝާދު ދެނީ ބޭކާރު ހާސްކަމެއްގެ ތެރެއަށް ނުވެއްޓުމަށެވެ.

ހަނގުރާމަތަކާ ބެހޭ ދިރާސާކުރައްވާ ޑރ. ބްރޮޑެރިކް މެކްޑޮނަލްޑް ދާދިފަހުން ފާހަގަކުރެއްވި ގޮތުގައި، އީރާނާއި ހިޒްބުالله އިން އެތައް ދުވަހެއް ވަންދެން ސިއްރު ނެޓްވޯކްތައް ގެންގުޅުނު ނަމަވެސް، އެ ބޭނުންކުރަނީ ވަރަށް ބޮޑަށް ރާވައިގެންނެވެ. ފާއިތުވި ހަފްތާތަކުގައި އީރާނުގެ ގިނަ އަސްކަރީ އަދި ނިއުކްލިއަރ ވަސީލަތްތަކެއް ނައްތާލެވިފައިވާތީ، އެގައުމު މިހާރު އޮތީ ވެރިކަން ބަދަލުވުމާއި ސަލާމަތްވުމުގެ އެތެރޭގެ ބޮޑު ކާރިސާއެއްގެ ތެރޭގައެވެ.

ތަޖުރިބާކާރުން ފާހަގަކުރާ ގޮތުގައި، ސަރުކާރުގެ އޮފިޝަލުންނާއި ބައެއް މުހިންމު ތަންތަނަށް ނުރައްކާ އޮތް ނަމަވެސް، އެމެރިކާ އާއި ގުޅިފައިވާ ގައުމުތަކުގެ ގާނޫނު ތަންފީޒުކުރާ އިދާރާތަކަކީ ތާރީޚީ ގޮތުން ބަލާއިރުވެސް މިފަދަ ހަމަލާތައް ހިނގުމުގެ ކުރިން ހޯދައި ހުއްޓުވުމަށް ވަރަށް ކާމިޔާބު ބައެކެވެ.

މިހާރު އެފް.ބީ.އައި އާއި ހޯމްލޭންޑް ސެކިއުރިޓީން މޮނިޓަރކުރުން އިތުރުކޮށްފައިވަނީ އަތުލައިގަނެވުނު އެއްވެސް މެސެޖަކުން ހަމަލާއެއް ދިނުމުގެ ކުރިން މި ނެޓްވޯކްތައް ހުއްޓުވުމަށެވެ.