މެދުއިރުމަތީގައި ހަރަކާތްތެރިވާ އެމެރިކާގެ ހަނގުރާމަމަތީ މަނަވަރުތަކާއި މަތިންދާ ބޯޓުތައް އޮތް ސަރަޙައްދުތައް ހިމެނޭހެން، ޙަމަލާ ދޭންވީ އަމާޒުތަކާ ބެހޭ ޖާސޫސީ މަޢުލޫމާތު ރަޝިޔާއިން އީރާނާއެކު ޙިއްޞާ ކުރަމުންދާ ކަމަށް ބައިނަލްއަޤުވާމީ ބައެއް މަސްދަރުތަކުން ރިޕޯޓު ކޮށްފިއެވެ.

ރަޝިޔާއިން އީރާނަށް މިފަދަ އެހީތެރިކަމެއް ފޯރުކޮށްދެމުންދާ ކަމުގެ އަޑުތައް ގަދަވެފައި މިވަނީ، ފާއިތުވި ހަފްތާއިން ފެށިގެން ޔަހޫދީންނާ ގުޅިގެން އެމެރިކާއިން އީރާނަށް ދެމުންދާ ވަރުގަދަ ޙަމަލާތަކުގެ ސަބަބުން، އެމެރިކާގެ އުޅަނދުތައް ހޯދުމަށް އީރާނުގެ އަސްކަރިއްޔާއަށް ބޮޑެތި ގޮންޖެހުންތަކެއް ކުރިމަތި ވެފައިވާ ދަނޑިވަޅެއްގައެވެ.

ނަމަވެސް، ރަޝިޔާއިން އީރާނަށް ފޯރުކޮށްދެނީ ކިހާ މިންވަރެއްގެ އެހީތެރިކަމެއްކަން މިހާތަނަށް މުޅިން ސާފުވެފައެއް ނުވެއެވެ.

އެމެރިކާ އާއި ޔަހޫދީ ނިރުބަވެރި ދައުލަތުން ގުޅިގެން އީރާނަށް ދެމުންދާ ލާއިންސާނީ ޢުދުވާނުގައި މިހާތަނަށް 1،000 އަށް ވުރެ ގިނަ މީހުން ޝަހީދުވެފައިވާ ކަމަށް ރިޕޯޓުތައް ބުނެއެވެ. އޭގެ ތެރޭގައި އީރާނުގެ ރޫޙީ ވެރިޔާ އާޔަތުﷲ ޢަލީ ޚާމަނާއީ އާއި އެމަނިކުފާނުގެ ޢާއިލާގެ ބައެއް މެންބަރުންވެސް ހިމެނިވަޑައިގަންނަވައެވެ.

މި ޢުދުވާނުގެ ރައްދުގައި އީރާނުންވެސް ދަނީ ހުއްޓުމެއްނެތި ޔަހޫދީންގެ ސަރަޙައްދުތަކަށާއި، މެދުއިރުމަތީގެ އެކި ޤައުމު ތަކުގައި ގާއިމްވެފައިވާ އެމެރިކާގެ އަސްކަރީ މަރުކަޒު ތަކަށް ވަރުގަދަ ޙަމަލާތަކެއް ދެމުންނެވެ. އީރާނުގެ މި ޙަމަލާތަކުގައި މިހާތަނަށް އެމެރިކާގެ ހަ ސިފައިން މަރުވެފައިވާކަން ވަނީ ކަށަވަރުވެފައެވެ.

މި ޙާލަތާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ކުރިއަށް އޮތް ދުވަސްތަކުގައި އެމެރިކާގެ އިތުރު ސިފައިން މަރުވުމުގެ ފުރުޞަތު އެބައޮތް ކަމަށެވެ.

މެދުއިރުމަތީގެ މަސްރަޙު މިހާރު އޮތް ގޮތުން، ރަޝިޔާގެ މި ޖާސޫސީ އެހީތެރިކަމަކީ އީރާނަށް ލިބޭނެ ވަރަށް ބޮޑު ކުރިއެރުމެއް ކަމަށް މަސްރަޙު ދިރާސާކުރާ ފަރާތްތަކުން ދެކެއެވެ.