2026 ވަނަ އަހަރުގެ ފެބްރުއަރީ 28 ގައި އެމެރިކާ އާއި އިސްރާއީލުން ގުޅިގެން އީރާނަށް ދޭން ފެށި ހަމަލާތަކަށްފަހު އީރާނަށް ބައިނަލްއަޤްވާމީ ގޮތުން ލިބޭ ތާއީދަކީ ދުނިޔޭގެ ސިޔާސީ މަސްރަޙުގައި އުފެދިފައިވާ އެންމެ ބޮޑު ސުވާލެވެ.

މާރިޗު 3، 2026 އާ ހަމައަށް އީރާން އޮތީ ނާޒުކު ފަށްތަރެއް މަތީގައެވެ. ދުނިޔޭގެ އެއްވެސް ބޮޑު ބާރަކާއެކު ރަސްމީ "ދިފާޢީ އެއްބަސްވުމެއް" އީރާނުން ހަދާފައި ނެތް ނަމަވެސް، އެ ޤައުމަކީ އެކަހެރިވެފައިވާ ޤައުމެއް ނޫނެވެ. އީރާނުގެ ދެމިއޮތުން ބިނާވެފައިވަނީ އިޤްތިޞާދީ އެހީތެރިކަމާއި، ޑިޕްލޮމެޓިކް ރައްކާތެރިކަމާއި، ސަރަޙައްދީ ހަނގުރާމަވެރި ޖަމާޢަތްތަކުގެ މައްޗަށެވެ.

ޗައިނާ ނުވަތަ ރަޝިޔާއިން އީރާނުގެ ދިފާޢުގައި ސީދާ ހަނގުރާމައަށް ނުނިކުތް ނަމަވެސް، އެ ދެ ޤައުމުން ދޭ ނުސީދާ އެހީތެރިކަމަކީ ހުޅަނގުގެ އިއްތިޙާދާ ދެކޮޅަށް އީރާނަށް އޮތް އެންމެ ބޮޑު ހަތިޔާރެވެ.

އިޤްތިޞާދީ މައިނާރު ޗައިނާއަކީ އީރާނުގެ އެންމެ މުހިންމު ބައިވެރިޔާއެވެ. ނަމަވެސް ޗައިނާގެ އެހީތެރިކަން ބިނާވެފައިވަނީ ވަކި ފިކުރަކަށްވުރެ ބޮޑަށް އަމިއްލަ މަންފާގެ މައްޗަށެވެ. ޗައިނާއިން އީރާނުގެ ތެލުގެ 80 އިންސައްތަ ގަނެއެވެ. އީރާނުގެ ވެރިކަން ވެއްޓިއްޖެނަމަ ދުނިޔޭގެ ތެލުގެ ބާޒާރަށް އަންނާނެ ލޮޅުމަކަށް ޗައިނާ ތައްޔާރެއް ނޫނެވެ.

މާރިޗު 1 ވަނަ ދުވަހު އީރާނުގެ އެންމެ މަތީ ވެރިޔާ އަލީ ޚާމަނާއީ އަވަހާރަކޮށްލުމާ ގުޅިގެން، އދ. ގެ ސަލާމަތީ މަޖިލީހުގައި އެންމެ ބާރަށް އަޑުއުފުލި ޤައުމަކީ ޗައިނާއެވެ.
ޗައިނާއިން އީރާނުގެ ވަގުތީ ލީޑަރޝިޕް ކައުންސިލާއެކު މަޝްވަރާ ކުރަމުންދިޔަ ނަމަވެސް، އެމެރިކާއާއި ގަލްފުގެ ޤައުމުތަކާއެކު އޮތް ވިޔަފާރީގެ ގުޅުމަށް ބުރޫއަރާފާނެތީ، ސީދާ އަސްކަރީ ގޮތުން ހަނގުރާމައިގެ ތެރެއަށް ވަނުމަށް ޗައިނާ ވަންނާނެކަމަކަށް ނުބެލެވެ .

ރަޝިޔާއާއި އީރާނުގެ ގުޅުން މިހާރު ވަނީ ވަރުގަދަ އިއްތިޙާދަކަށް ބަދަލުވެފައެވެ.ޔޫކްރެއިން ހަނގުރާމައިގައި އީރާނުން ރަޝިޔާއަށް ޑްރޯން ފޯރުކޮށްދީފައިވާތީ، ރަޝިޔާއަށް މިހާރު ވަނީ އީރާނަށް އެހީވުމަށް މަޖުބޫރުވެފައެވެ.

ރަޝިޔާއަށް މި ހަނގުރާމައަކީ އެމެރިކާގެ ސަމާލުކަމާއި ވަސީލަތްތައް ޔޫރަޕާ ދުރަށް ގެންދިއުމަށް ލިބޭ ފުރުޞަތެކެވެ. ރަޝިޔާއިން އީރާނަށް ޖާސޫސީ މަޢުލޫމާތާއި، ސެޓެލައިޓް ޑޭޓާ އަދި އިލެކްޓްރޯނިކް ހަނގުރާމައިގެ ޓެކްނޮލޮޖީ ފޯރުކޮށްދެއެވެ.

ޗައިނާ އާއި ރަޝިޔާއިން ޑިޕްލޮމެޓިކް އެހީތެރިކަން ދޭއިރު، އީރާނާއެކު އަމަލީ ގޮތުން ހަނގުރާމައިގައި އަދި ބައިވެރިވަނީ އެ ޤައުމަށް ވާގިވެރިވާ ހޫޘީން ނުވަތަ ހިޒްބުﷲ ފަދަ ޖަމާޢަތްތަކެވެ.

ލަފާކުރެވޭ ގޮތުގައި އުތުރު ކޮރެއާއިން އީރާނަށް މިސައިލް ޓެކްނޮލޮޖީ ފޯރުކޮށްދެމުންދެއެވެ. ރަސްމީކޮށް ޕާކިސްތާނުން ހަނގުރާމަ ހުއްޓާލުމަށް ގޮވާލި ނަމަވެސް، އެ ޤައުމުގެ އެތެރޭގެ އާންމުންގެ ފިއްތުންތަކާ ހުރެ އީރާނަށް "ނުސީދާ" އެހީތެރިކަމެއް ފޯރުކޮށްދިނުމަކީ އެކަށީގެންވާ ކަމެކެވެ. އީރާނުގެ "ބާރުގަދަ ބައިވެރިން" މިވަގުތު ތިބީ ދިފާޢީ މަޤާމެއްގައެވެ.

ރަޝިޔާ އާއި ޗައިނާ އީރާނާއެކު ތިބީ އެމެރިކާގެ ބާރު ކަނޑުވާލުމަށްޓަކައެވެ. ނަމަވެސް އެމީހުން އަމަލީ ގޮތުން ހަނގުރާމައިގެ ތެރެއަކަށް ނުވަދެއެވެ. މި ހަނގުރާމައިގެ ކުލަވަރު ބަދަލު ވާކަށް ގިނަ ވަގުތެއް ނަގާނެކަމަކަށް ނުފެނެވެ.