އިރާނުގެ ބެލިސްޓިކް މިސައިލް ޕްރޮގްރާމަކީ އެގައުމުގެ ދިފާއީ ކަމެއްކަމަށް ވާތީ، އެކަމާ ބެހޭގޮތުން އެމެރިކާއާއެކު މަޝްވަރާ ކުރަން ނެތް ކަމަށް އިރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެއެވެ.
އޮމާންގެ މަސްކަޓްގައި އެމެރިކާއާއެކު ބޭއްވި ނުސީދާ މަޝްވަރާތަކަށްފަހު އަލްޖަޒީރާއަށް ދެއްވި އިންޓަވިއުގައި އަރަގްޗީ ބުނީ، އިރާނުގެ މިސައިލް ޕްރޮގްރާމަކީ "ދުވަހަކުވެސް މަޝްވަރާ ކުރެވޭނެ ކަމެއް ނޫން" ކަމަށެވެ. އަދި އެމެރިކާއިން އިރާނުގެ ބިމަށް ހަމަލާދީފިނަމަ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އިރާނުން ހަމަލާދޭނެ ކަމުގެ އިންޒާރުވެސް އޭނާ ވަނީ ދެއްވާފައެވެ.
މިދިޔަ ހުކުރު ދުވަހު ބޭއްވި މަޝްވަރާތައް "ރަނގަޅު ފެށުމެއް" ކަމަށް ރައީސް ޑޮނަލްޑް ޓްރަމްޕް ސިފަކުރެއްވި ނަމަވެސް، މަޝްވަރާތައް ނިމުމާއެކު ޓްރަމްޕް ވަނީ އިރާނާ ދެކޮޅަށް އާ ފިޔަވަޅުތައް އަޅުއްވައިފައެވެ. އެގޮތުން އިރާނާއެކު ވިޔަފާރިކުރާ ގައުމުތަކުގެ މުދަލުން ޓެރިފް ނެގުމާއި، އިރާނުގެ ތެޔޮ އެކްސްޕޯޓް ހުއްޓުވުމަށްޓަކައި ޝިޕިން ދާއިރާއަށް އަމާޒުކޮށް ދަތިކުރުމުގެ ފިޔަވަޅުތައް އަޅުއްވައިފިއެވެ.
އަރަބި ކަނޑުގައި ތިބި އެމެރިކާގެ މަނަވަރަށް އެމެރިކާގެ މަންދޫބުން ޒިޔާރަތްކޮށް، "ބާރުގެ ބޭނުންކޮށްގެން ސުލްހަ ގާއިމުކުރުމުގެ" ސިޔާސަތު ކުރިއަށް ގެންދާނެކަމަށް ވަނީ ވިދާޅުވެފައެވެ.
މި މައްސަލައިގައި އިޒްރޭލުންވެސް ބޮޑު ދައުރެއް އަދާކުރަމުންދެއެވެ. ބޮޑުވަޒީރު ބެންޖަމިން ނަތަންޔާހޫ އަންނަ ބުދަ ދުވަހު ޓްރަމްޕާ ބައްދަލުކުރަން ހަމަޖެހިފައިވާއިރު، އިޒްރޭލުން ބާރުއަޅަނީ އިރާނުގެ މިސައިލް ޕްރޮގްރާމާއި، ސަރަހައްދީ ހަނގުރާމަވެރި ޖަމާއަތްތަކަށް ދޭ އެހީތެރިކަން ހުއްޓުވުން މަޝްވަރާގެ ތެރޭގައި ހިމެނުމަށެވެ. ނަމަވެސް އިރާނުން ތަކުރާރުކޮށް ބުނެފައިވަނީ ނިއުކްލިއާ މައްސަލައިން ބޭރުގެ ކަންތައްތަކާ މަޝްވަރާ ނުކުރާނެކަމަށެވެ.
ހާރިޖީ ދާއިރާގެ މުހައްލިލުން ދެކޭގޮތުގައި، ދެގައުމުންވެސް އެފަރާތްތަކުގެ ހަރުކަށި އުސޫލުތައް ދޫކޮށްލަން ބޭނުން ނުވާތީ މި މަޝްވަރާތަކުން ދާއިމީ ހައްލެއް ފެނުމުގެ ފުރުސަތު ކުޑައެވެ. އިރާނުގެ ވެރިރަށް ތެހެރާންގެ ރައްޔިތުންގެ މެދުގައިވެސް މިކަމާމެދު ނުތަނަވަސްކަމާއި ޝައްކު އުފެދިފައިވެއެވެ.
