ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތާރީޚީ ތަށި، ދިވެހިރާއްޖެއިން މިވަނީ ފަނޑުނުވާނެފަދަ ފުރިހަމަކަމެއް ލިބިގެންވާ މޮޅުވުމުގެ ރެކޯޑަކާއެކު ޙާސިލްކޮށްފައެވެ.
މިއީ މުޅި ޤައުމު ފަޚުރުވެރިވާފަދަ ކާމިޔާބީއަކަށްވާއިރު، މި ކާމިޔާބީ ފާހަގަކުރުމަށް، ސަރުކާރާއި، ގުޅުންހުރި މުއައްސަސާތަކާއި އިދާރާތަކާއި އަމިއްލަ ފަރުދުން ވެސް އަންނަނީ ވަރަށް ފުރިހަމައަށް ތައްޔާރުވަމުންނެވެ.
މުޅި ދިވެހިން އުފާކޮށްދިން ޤައުމީ ފުޓްސަލް ޓީމު ރާއްޖެ އަންނާނީ މިރެއެވެ.
ޤައުމީ ފުޓްސަލް ޓީމުން މި ސަރަހައްދުގެ އެއްވަނަ ހޯދައިގެން ރާއްޖެ އައުމަށް ހަމަޖެހިފައިވާ ބޯޓު ވެލާނަ އިންޓަނޭޝަނަލް އެއަޕޯޓަށް ޖެއްސުމާއެކު އުފާ ފާޅުކުރުމައި މަރުހަބާ ކިއުމުގެ ހަރަކާތްތައް ވެލާނާ އިންޓަނޭޝަނަލް އެއާޕޯޓާއި ހަމައިން ފެށޭނެއެވެ.
އެގޮތުން ވީއައިޕީން ޓީމަށް މަރުހަބާ ކިއުމާއި، އެއަޕޯޓުން ޓީމު މާލެ އައުމަށްފަހު އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަ ގޮތަށް ޓްރޮފީއާއެކު ޓީމުން ދަތުރު ކުރާނެއެވެ. އަދި އާޓިފިޝަލް ބީޗަށް އައިސް ބީޗުގައި އޮންނަ ހަރަކާތްތަކުގައިި އާންމުންނާއެކު ޓީމުގެ އޮފިޝަލުންނާއި ކުޅުންތެރިން ބައިވެރިވާނެއެވެ.
މި ކާމިޔާބީ ފާހަގަކުރުމަށް އާޓިފިޝަލް ބީޗުގައި ބާއްވާ ޙާއްސަ ހަރަކާތްތަކުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއާއި ކުޅީވަރާ ބެހޭ ވަޒީރު ބައިވެރިވެވަޑައިގަންނަވާނެއެވެ.
މި ހަރަކާތުގެ ތެރެއިން ރައީސް، ޤައުމީ ޓީމުގެ ކުޅުންތެރިންނާ ބައްދަލުކުރައްވައި ވާހަކަފުޅުދައްކަވާނެއެވެ.
އަދި ރައީސްގެ އަތްޕުޅަށް ސާފް ފުޓްސަލް ޗެމްޕިއަންޝިޕްގެ ޓްރޮފީ އެރުވުމަށް ވެސް ހަމަޖެހިފައިވާއިރު ހަވާ އެރުވުމުގެ ޙާއްސަ ހަރަކާތެއް ވެސް މިރޭ އޮންނާނެއެވެ.
