ދިރާގު ދިވެހި ޕްރިމިއަރ ލީގުގައި ރޭ ކްލަބް އީގަލްސްއާ ދެކޮޅަށް ކުޅުނު މެޗު ފަސޭހަކަމާއެކު ކާމިޔާބުކޮށް، މާޒިޔާ ސްޕޯޓްސް އެންޑް ރެކްރިއޭޝަނުން ލީގު ތަށި ދިފާއުކުރުމާ ގާތަށް ޖެހިލައިފިއެވެ.
ގަލޮޅު ރަސްމީ ބޯޅަ ދަނޑުގައި ކުޅުނު މި ފޯރިގަދަ މެޗު މާޒިޔާ އިން ކާމިޔާބުކުރީ 3-0 ގެ ނަތީޖާއަކުންނެވެ.
މި މުހިންމު މޮޅާއެކު މާޒިޔާ އިން ވަނީ ކުޅުނު 15 މެޗުން 43 ޕޮއިންޓް ހަމަކޮށްފައެވެ. ތާވަލުގެ ދެވަނައިގައި އޮތް ކްލަބް އީގަލްސްއަށް 14 މެޗުން ލިބިފައިވަނީ 32 ޕޮއިންޓެވެ. އެހެންކަމުން، ކުރިއަށް އޮތް މެޗުން މޮޅުވެގެން މާޒިޔާއަށް ލީގު ޗެމްޕިއަންކަން ކަށަވަރު ކުރުމުގެ ފުރުސަތު މިހާރު ވަނީ ތަނަވަސްވެފައެވެ.
މުޅި މެޗު ކަހަލަ ގޮތަކަށް ޑޮމިނޭޓްކޮށްގެން ކުޅުނު މާޒިޔާ އިން ވަނީ ފުރަތަމަ ހާފުގައި އީގަލްސްގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައެވެ. ޚާއްޞަކޮށް އިބްރާހިމް އައިސަމް އާއި ހަމްޒާ މުހައްމަދު (ހަމްޕު) އަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް، ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
މާޒިޔާ އިން މެޗުގެ ލީޑު ނެގީ ދެވަނަ ހާފު ފަށައިގެން 56 ވަނަ މިނިޓުގައެވެ. މި ލަނޑު ލިބުނު ކޯނަރެއްގެ ބޭނުން ހިފައި، އޭރިއާ ތެރެއިން ގޯލަށް ފޮނުވާލައިގެން ކާމިޔާބުކޮށްދިނީ ކެޕްޓަން ސަމޫހު އަލީއެވެ. މާޒިޔާގެ ދެވަނަ ލަނޑު މެޗުގެ 79 ވަނަ މިނިޓުގައި ކާމިޔާބުކޮށްދިނީ އަހުމަދު އަހަމްއެވެ. މިއީ ހަމްޒާ މުހައްމަދު އޭރިއާ ތެރެއިން ތަނަވަސްކޮށްދިން ފުރުސަތަކުން އޭނާ ކާމިޔާބުކުރި ލަނޑެކެވެ.
މެޗުގެ ފޯރިގަދަވި ވަގުތެއްގައި، މާޒިޔާގެ ސަމޫހު އަލީއަށް ކުރި ނުރައްކާތެރި ފައުލަކާ ގުޅިގެން ރެފްރީ ވަނީ އީގަލްސްގެ މާވިން ލެބޭއަށް ސީދާ ރަތްކާޑެއް ދައްކައި ދަނޑުން ފޮނުވާލާފައެވެ.
މާޒިޔާގެ ތިންވަނަ ލަނޑު މެޗުގެ 85 ވަނަ މިނިޓުގައި ކާމިޔާބުކުރީ ހަމްޒާ މުހައްމަދެވެ. އޭނާ މި ލަނޑު ޖެހީ އީގަލްސްގެ އޭރިއާ ތެރެއަށް ވަދެ، އަރިމަތިން ފޮނުވާލި ބާރު ހަމަލާއަކުންނެވެ.
މި ނަތީޖާއާއެކު މާޒިޔާ އޮތީ ލީގު ތަށީގައި އަތްލުމާ ފިޔަވަޅަކާ ގާތުގައެވެ. އެޓީމުގެ ދެން އޮތް މެޗަކީ ލީގު ކާމިޔާބުކުރުމުގެ އުފާ ފާޅުކުރުމަށް ލިބޭނެ އެންމެ ރަނގަޅު ފުރުސަތެވެ.
