އެމެރިކާއިން ގްރީންލޭންޑްގެ މައްޗަށް އަތްގަދަކޮށް، އެ ރަށް ހިފައިފިނަމަ، ވިލާތުގެ ބައްރުގައި ހުރި އެމެރިކާގެ ހުރިހާ އަސްކަރީ މަރުކަޒުތަކެއް ވިލާތުގެ ގައުމުތަކުގެ ބާރުގެ ދަށަށް ގެންނާނެ ކަމުގެ ވަރުގަދަ އިންޒާރެއް ވިލާތުގެ އިއްތިހާދުން ދީފިއެވެ.
މި މައްސަލަ އުފެދެން މެދުވެރިވީ، އާކްޓިކް ސަރަހައްދުގައި ސްޓްރެޓީޖިކް ގޮތުން މުހިންމު މަގާމެއްގައި އޮތް ގްރީންލޭންޑަކީ އެމެރިކާގެ ބައެއްގެ ގޮތުގައި ހެދުމަށް ވޮޝިންގޓަނުން ޝައުގުވެރިކަން ފާޅުކުރަން ފެށުމާ ގުޅިގެންނެވެ.
ޑެންމާކުގެ ބައެއްގެ ގޮތުގައި އޮންނަ، ނަމަވެސް އަމިއްލަ ދާޚިލީ އިސްތިގުލާލެއް އޮންނަ ގްރީންލޭންޑަށް ބާރުގެ ބޭނުން ކޮށްގެން އަތްގަދަ ކުރުމަކީ ބައިނަލްއަގުވާމީ ގާނޫނުތަކާ ޚިލާފު ކަމެއްކަމަށް ވިލާތުގެ ގައުމުތަކުން ބުނެއެވެ.
ވިލާތުގެ އިސް މަސްއޫލުވެރިން ނެރުއްވި ބަޔާނެއްގައި ވިދާޅުވެފައިވަނީ، ގްރީންލޭންޑްގެ މިނިވަންކަމަށް އެމެރިކާއިން އަރައިގަނެފިނަމަ، ރައްދުގައި ވިލާތުގެ ބްލޮކުން އެމެރިކާގެ އަސްކަރީ މަރުކަޒުތައް ހިފައި، އެމެރިކާގެ އަސްކަރީ ބާރު ވިލާތުގެ ބައްރުން އެއްކޮށް ފޮހެލާނެ ކަމަށެވެ. މިއީ ގްރީންލޭންޑްގެ ސިޔާދަތާއި މިނިވަންކަން ހިމާޔަތް ކުރުމަށްޓަކައި އަޅާނެ އެންމެ ހަރުކަށި ފިޔަވަޅު ކަމަށްވެސް އެ ބަޔާނުގައިވެއެވެ.
މި އިންޒާރާ ގުޅިގެން އެމެރިކާގެ ޚާރިޖިއްޔާއިން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ. ނަމަވެސް، މަސްރަހު ދިރާސާކުރާ ފަރާތްތަކުން ބުނާ ގޮތުގައި، މި މައްސަލައިގެ ސަބަބުން ދެ ފަރާތުގެ ދެމެދުގައި އޮތް ޒަމާންވީ ސިޔާސީ އަދި އަސްކަރީ ގުޅުމަށް ބޮޑެތި ލޮޅުން ތަކެއް އަރައި، ބައިނަލްއަގުވާމީ މަސްރަހުގައި ނުތަނަވަސްކަން އިތުރުވެގެން ދާނެއެވެ.
ގްރީންލޭންޑަކީ ގުދުރަތީ ވަސީލަތްތަކުން މުއްސަނދި އަދި ދުނިޔޭގެ ބާރުގަދަ ގައުމުތަކުން ލޯ އަޅަމުންދާ ސަރަހައްދަކަށް ވާއިރު، ވިލާތުގެ މި ނިންމުމަކީ އެ ސަރަހައްދުގެ ހަމަޖެހުން ދެމެހެއްޓުމަށް އެޅި މުހިންމު ފިޔަވަޅެއްގެ ގޮތުގައި ގިނަ ބަޔަކު ދެކެއެވެ.
