ރާއްޖެއަށް ނާދެވި މައްކާގައި ހާލުގައިޖެހިފައިވާ ދިވެހި އުމްރާވެރިން އަންނަ ހޮނިހިރު ދުވަހު ރާއްޖެ ގެނައުމަށް ނިންމައިފި އެވެ.
އަލް ހިޖްރަ ގްރޫޕުގެ ހަވާލުގައި އުމްރާގެ އަޅުކަން އަދާކުރުމަށް ރާއްޖެއިން ދިޔަ 24 މީހަކު އަނބުރާ ނާދެވި މައްކާގައި ވަނީ ތާށިވެފަ އެވެ. އެ އުމްރާވެރިން އަނބުރާ ރާއްޖެ ގެނައުމުގެ މަސައްކަތް ހައްޖު ކޯޕަރޭޝަނުން މިހާރު އަންނަނީ ކުރަމުންނެވެ.
އެކްސްގައި ކުރެއްވި ޕޯސްޓެއްގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ހިޖުރަ ކުންފުނީގެ ޙަވާލުގައި ދިޔަ އުމްރާވެރިން މިނިސްޓްރީގެ އިރުޝާދުގެ ދަށުން ޙައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައިވާ ކަމަށެވެ. އެ އުމްރާވެރިން ހޮނިހިރު ދުވަހުގެ ހެނދުނު 8.10 ގައި ޤަތަރު އެެއަަވޭސް އިން ރާއްޖެ އަންނާނެ ކަމަށް ޝަހީމް ވިދާޅުވި އެވެ.
އުމްރާވެރިން ޙާލުގައި ޖެއްސި، އަލްހިޖްރަ ޓްރެވަލް އެންޑް ޓުއާސް ޕްރައިވެޑް ލިމިޓެޑްގެ ހުއްދަ ހިފަހައްޓައި، އެ ގްރޫޕް 100،000ރ. އިން ޖޫރިމަނާ ކުރަން އިސްލާމިކް މިނިސްޓްރީން މިއަދު ވަނީ ނިންމާފަ އެވެ. އަދި އެ ގްރޫޕާއި އެ ގްރޫޕްގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާ އަށް މީހުން ގެންދިޔުމަށް ހުއްދަ ނުދޭން ވަނީ ނިންމާފަ އެވެ.
މީގެއިތުރުން އިސްލާމިކް މިނިސްޓްރީން ވަނީ އެ ގްރޫޕްގެ ފަރާތުން އުމްރާ އަށް ގޮސް ހާލުގައި ޖެހުނު މީހުން ރާއްޖެ ގެންނަން މިނިސްޓްރީން ކުރި ހަރަދު އެ ގްރޫޕްގެ އަތުން ހޯދުމަށް ވެސް ނިންމާފަ އެވެ. އަދި އެ ގްރޫޕުން އުސޫލާއި ހިލާފުވެފައިވާތީ އެ މައްސަލަ ތަހުގީގުކޮށް ގާނޫނީ ފިޔަވަޅު އަޅަން ފުލުހަށް ހުށަހަޅަން ވެސް ނިންމާފައިވެ އެވެ.
