މިއަންނަ އަހަރު ދައުލަތުގެ ބަޖެޓުން ފައިސާ ދޫކުރާނީ ފަސް ޕާޓީއަކަށް ކަމަށް އިލެކްޝަންސް ކޮމިޝަން (އީސީ)ން ބުނެފި އެވެ.
އީސީން މިރޭ ބުނީ ދައުލަތުގެ ބަޖެޓުން ސިޔާސީ ޕާޓީތަކަށް ދޫކުރާ ފައިސާ ލިބުމުގެ ޝަރުތު ހަމަވަނީ ފަސް ޕާޓީއަކަށް ކަމަށެވެ.
ރައްޔިތުންގެ މަޖިލީހުން އަންނަ އަހަރުގެ ބަޖެޓް ފާސްކުރި ދުވަހުގެ ނިޔަލަށް 10،000 މެމްބަރުން ހަމަވެފައިވަނީ ފަސް ސިޔާސީ ޕާޓީއެއްގެ ކަމަށާއި ބަޖެޓް ދޫކުރާނީ އެ ޕާޓީތަކަށް ކަމަށް ވެސް އީސީން ބުންޏެވެ.
ސިޔާސީ ޕާޓީތަކުގެ ގާނޫނުގައިވާ ގޮތުން ދައުލަތުގެ ބަޖެޓުން ފައިސާ ދޫކުރަނީ 10،000 މީހުން ހަމަވާ ޕާޓީތަކަށެވެ.
އެ ޕާޓީތަކަކީ އެމްޑީޕީ އާއި އަދާލަތު ޕާޓީ އާއި ޖުމްހޫރީ ޕާޓީގެ އިތުރުން އެމްޑީއޭ އަދި ޕީއެންސީ އެވެ.
އީސީން ޕާޓީތަކަށް ދޭނެ ފައިސާގެ އަދަދު ކަނޑައަޅާނީ މި މަހުގެ ނިޔަލަށް ޕާޓީތަކުގައި މެންބަރުން ތިބި ޖުމްލަ އަދަދަށް ބަލައިގެންނެވެ.
މީގެ ކުރިން ސިޔާސީ ޕާޓީތަކަށް ފައިސާ ދޫކުރަނީ އެ އަހަރެއްގެ ދައުލަތުގެ ބަޖެޓުން 0.1 ޕަސެންޓާއި 0.2 ޕަސެންޓާ ދެމެދުގެ އަދަދެކެވެ. ނަމަވެސް މަޖިލީހުން ގާނޫނު އިސްލާހު ކުރުމަށް ފަހު މިހާރު ވަނީ ބަޖެޓުން އެ އަހަރަކު ލިބޭނެ ކަމަށް ލަފާކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެއް ޕާޓީތަކަށް ދޫކުރާ ގޮތަށް ކަނޑައަޅައިފަ އެވެ.
މި އަހަރަށް ކަނޑައެޅި ބަޖެޓުން ސިޔާސީ ހަ ޕާޓީއަކަށް ވަނީ 44 މިލިއަން ރުފިޔާ ދީފަ އެވެ.
