އިނގިރޭސިވިލާތުގެ ރަސްގެފާނު ޗާލްސް، ރާއްޖެ ވަޑައިގަތުމަށް ރާއްޖެއިން ދައުވަތު ދީފިއެވެ.
ޗާލްސް ރާއްޖެ ވަޑައިގަތުމަށް ދައުވަތު ދެއްވީ، ކޮމަންވެލްތު ހެޑްސް އޮފް ގަވާމަންޓް މީޓިންގައި ބައިވެރިވެވަޑައިގަތުމަށް، ނައިބު ރައީސް ޙުސައިން މުޙަންމަދު ލަތީފް މިހާރު ސަމޯއާއަށް ކުރެއްވި ދަތުރުފުޅުގައި، ރަސްގެފާނު ޗާލްސްއާ ބައްދަލު ކުރައްވާފައެވެ. ކޮމަންވެލްތުގެ އެންމެ އިސްވެރިއަކީ ރަސްގެފާނު ޗާލްސްއެވެ.
ނައިބު ރައީސް ވިދާޅުވީ ޗާލްސް ރާއްޖެ ވަޑައިގަތުމަށް ދައުވަތު ދެއްވީ ރައީސް ޑރ. މުޙަންމަދު މުއިއްޒުގެ ފަރާތްޕުޅުން ކަމަށެވެ. ރައީސް މުއިއްޒުވެސް ވަނީ ދާދިފަހުން ދުބާއީގައި ބޭއްވި ކޮޕް-28 ގެ ހަވާސާގައި ރަސްގެފާނު ޗާލްސްއާ ބައްދަލު ކުރައްވާފައެވެ.
އިނގިރޭސި ރަސްގެފާނު ޗާލްސް ރާއްޖެ ވަޑައިގަތުމަށް ދައުވަތު ދީފައިވާއިރު، ޗާލްސްގެ މަންމާފުޅު އަދި އިނގިރޭސިވިލާތުގެ ކުރީގެ ރާނީ އެލިޒަބަތު ދެވަނަ ވަނީ 52 އަހަރު ކުރިން ރާއްޖެ ވަޑައިގެންފައެވެ. އެއީ 1972 ވަނަ އަހަރު ރައީސް އިބްރާހިމް ނާސިރުގެ ވެރިކަމުގައެވެ. އޭގެފަހުން އިނގިރޭސި ރަސްކަލަކު މިހާތަނަށް ރާއްޖެ ވަޑައިގެންފައެއް ނުވެއެވެ.
ރާއްޖެއަށް ފުރިހަމަ މިނިވަންކަން ލިބުމާއި ހަމައަށް ރާއްޖެ އޮތީ އިނގިރޭސިންގެ ޙިމާޔަތުގެ ދަށުގައެވެ. އެދުވަސްވަރު އިނގިރޭސިންގެ މައި މަރުކަޒަކީ އައްޑު އަތޮޅު ގަމެވެ. ގަމުގައި މިހާރުވެސް އިނގިރޭސިންގެ ހަނދާންތައް އެބަހުއްޓެވެ. އެދުވަސްވަރު އިނގިރޭސި ރަސްކަލުން ރާއްޖެ ވަޑައިގެން ގަމުގައި އުޅުއްވި ކަމަށްވެއެވެ.
