ރާއްޖޭގެ ކަނޑުގެ ސަރަހައްދުން ދިވެހި މަސްދޯނި ފަހަރަށް ހަތިޔާރާއެކު އިންޑިޔާ ސިފައިން އަރައި ބިރު ދައްކަމުންދާ މައްސަލައިގައި އަވަހަށް ފިޔަވަޅު އަޅަން ސަރުކާރަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައި ބަހުސް ފަށައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ކުއްލި މައްސަލަ ހުށަހެޅުއްވީ، އުނގޫފާރު ދާއިރާގެ މަޖިލިސް މެންބަރު މުހައްމަދު ވަހީދު (ވައްޑެ) އެވެ.
ކުއްލި މައްސަލަ ހުށަހަޅުއްވަމުން މެންބަރު ވަހީދު ވިދާޅުވީ، ދިވެހި ކަނޑުގެ ސަރަހައްދުގެ ތެރެއިން މަސް އޮޑި ތަކަކަށް ބޭރުގެ ސިފައިން ހަތިޔާރާއެކު އެރި ވާހަކަ ތަކާއި ފޮޓޯތަކާއި ވީޑިޔޯ ތަކާއި ޚަބަރުތައް ކެނޑިނޭޅި ދައުރުވަމުންދާ ކަމަށެވެ. މީގެއިތުރުން ޖާސޫސީ މައުލޫމާތު އެއްކުރާ ބާވަތުގެ އެހެން އުޅަނދު ފަހަރު ރާއްޖޭގެ ކަނޑުގެ ސަރަހައްދީ އިމުގެ ކައިރީގައި ސުވާލު އުފެދޭ ގޮތްގޮތަށް އުޅެމުންދާ ޚަބަރުތައް ދައުރުވަމުންދާ ކަމަށްވެސް ވިދާޅުވިއެވެ.
ނަމަވެސް ދިވެހި ދައުލަތުގެ ސަރަހައްދާއި ދިވެހި ރައްޔިތުންގެ ސަލާމަތާއި ހިމާޔަތާއި ރައްކާތެރިކަން ކަށަވަަރު ކުރުމުގެ ޤާނޫނީ ޒިންމާ އުފުލަންއޮތް ސަރުކާރުގެ މުއައްސަސާތަކާއި އިދާރާތަކުން އެކަމުގެ ސާފު މައުލޫމާތު ރައްޔިތުންނާ ހިއްސާ ނުކުރުމުގެ ސަބަބުން އާންމުންގެ ތެރޭގައި ވަރަށްބޮޑު ނުތަނަވަސް ކަމާއި ބިރުވެރިކަން ފެތުރެމުންދާ ކަމަށްވެސް ވިދާޅުވިއެވެ.
އިންތިހާއަށް ކަންބޮޑުވުން އޮތް މިފަދަ ހުތޫރަތްތެރި މައްސަލައެއްގައި މިއަދުގެ ސަރުކާރުން އެކަށީގެންވާ ސަމާލުކަމެއް ނުދީ އަޅާނުލައި ހިމޭނުން ތިބުމަކީ ހަވާލުވެފައިވާ ޤާނޫނީ ބޮޑު ޒިންމާއިން ރެކުން ކަމަށްވެސް ވިދާޅުވިއެވެ.
އެހެންކަމުން ދިވެހި ރައްޔިތުންނާއި ދިވެހި ގައުމުގެ މަސްލަހަތާގުލޭ މި ޙައްސާސް މައްސަލައިގައި ސަރުކާރުން ވީ އެންމެ އަވަހަކަށް ފިޔަވަޅު އެޅުމަށް ކުއްލި މައްސަލައިގައި ވަނީ ގޮވާލައްވައިފައެވެ.
ކުއްލި މައްސަލައަށް ބަހުސް ކުރަންފެނޭތޯ ނެގި ވޯޓުގައި ޖަލްސާގައި ތިއްބެވި 55 މެންބަރުންގެ ތެރެއިން 54 ވޯޓު ދެއްވައިގެން އެ މައްސަލައަށް މަޖިލީހުގައި ބަހުސް ކުރަން ވަނީ ފާސްކޮށްފައެވެ.
