ރައްޔިތުންގެ މަޖިލީހުގެ ރައީސް ކަމުގެ މަޤާމުން އެމްޑީޕީގެ ރައީސް މުހައްމަދު ނަޝީދު ވަކި ކުރަން ވޯޓު ހަމަކުރުމަށް މަސައްކަތް ފަށައިފިނަމަ ރައީސް ޞާލިހު މަޤާމުން ވަކި ކުރުމުގެ މަސައްކަތް ފަށާނެކަމަށް އެމްޑީޕީގެ ކުރީގެ ޕީޖީ ލީޑަރު އަލީ އާޒިމް ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީއަށްފަހު ދެބައިވެފައިވާއިރު، އަލީ އާޒިމްއަކީ ރައީސް ނަޝީދަށް ތާއީދު ކުރައްވާ ބޭފުޅެކެވެ. އާޒިމަކީ މަޖިލިސް ތެރެއިންނާއި، މަޖިލީހުން ބޭރުގައިވެސް ސަރުކާރަށް ވަރަށް ބޮޑަށް ފާޑުވިދަޅުވާ ބޭފުޅެކެވެ. އާޒިމް މިއަދު މިފަދަ ޓުވީޓެއް ކުރީ ރައީސް ނަޝީދުގެ އިތުބާރު ނެތްކަމަށް ވޯޓު ނެގަން ޖެހިދާނެކަމުގެ އިޝާރާތެއް އެމްޑީޕީގެ ރައީސް ޞާލިހުގެ މެމްބަރުން ދެމުންދާ ދަނޑިވަޅެއްގައެވެ.

އަލީ އާޒިމް ވިދާޅުވީ މަޖިލީހުގެ ރައީސް ކަމުގެ މަޤާމުން އެމްޑީޕީގެ ރައީސް މުހައްމަދު ނަޝީދު ވަކި ކުރަން ބޭނުންވާ ވޯޓު ހަމަކުރަން މަސައްކަތް ފަށައިފިނަމަ، ރައީސުލްޖުމްހޫރިއްޔާގެ މަޤާމުން ރައީސް އިބްރާހިމް މުހައްމަދު ޞާލިހު ވަކި ކުރުމަށް ބޭނުންވާ ވޯޓު ހަމަކުރުމުގެ މަސައްކަތް ފަށާނެކަމަށެވެ.

މަޖިލިސްގެ ރައީސް ވަކިކުރުމަށްޓަކައި ވޯޓު ހަމަކުރަން މަސައްކަތް ފަށައިފިނަމަ، ރައީސް ޞާލިހުގެ އިތުބާރު ނެތްކަމުގެ ވޯޓު ހަމަ ކުރުމުގެ މަސައްކަތް އަޅުގަނޑުމެންވެސް ފަށާނަން.

– އަލީ އާޒިމް ވިދާޅުވިއެވެ.

އެމްޑީޕީގެ ތެރޭގައި ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް އަދި ކުރީގެ ރައީސް ނަޝީދާ ދެމެދު ވަރުގަދަ ކޯޅުންގަނޑެއް އުފެދިފައިވާއިރު، މަޖިލީހުގެ ރިޔާސަތުގެ ނާޖާއިޒު ފައިދާ ނަންގަވައިގެން ސަރުކާރާ ދެކޮޅަށް މަސައްކަތް ކުރައްވާ ކަމުގެ ތުހުމަތުތައް ދަނީ އަމާޒުވަމުންނެވެ. މިގޮތުން، އެކި ކަންކަމުގައި ތަޅުމުގައި ކުރިއަށްދާ ބަހުސްތަކުގައި ބައިވެރިވެވަޑައިގެންނެވުމާއި މެމްބަރުންގެ މެދުގައި ތަފާތުކުރުން ފަދަ މަޖިލީހުގެ ގަވައިދާ ހިލާފަށް މަޖިލިސް ހިންގަވަމުންދާ ކަމުގެ ޝަކުވާ އެމްޑީޕީގެ ގިނަ މެމްބަރުން ކުރައްވާތާ އެތައް ދުވަހެއް ވަނީ ވެފައެވެ.

ދާދިފަހުން އޮންލައިން ނޫހަކަށް މައުލޫމާތު ދެއްވަމުން އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވީ، މަޖިލީހުގެ ރައީސްކަމުގެ މަޤާމުން ރައީސް ނަޝީދު ވަކި ކުރުމުގެ މަސައްކަތެއް އެމްޑީޕީގެ ޕީޖީ ގުރޫޕުގެ ތެރެއިން މީގެ ކުރިން ކުރެވުނު ކަން އެނގިވަޑައިގެންފައިވާ ކަމަށެވެ. ނަމަވެސް، އަސްލަމް ވިދާޅުވި ގޮތުގައި އެމްޑީޕީއަށް ނަޝީދު ކޮށްދެއްވާފައިވާ ހިދުމަތަށް ބަލައި، އެފަދަ ނިންމުމެއް ނިންމުމަށް ޕާޓީގެ ތެރޭގައި "ރިލަކްޓަންސް"އެއް އުޅޭ ކަމަށެވެ.

ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ފާސްވާނީ ހާޒިރުވެ ވޯޓުގައި ބައިވެރިވާ މެންބަރުންގެ އަގުލަބިއްޔަތުންނެވެ. މަޖިލީހަށް އެ މައްސަލަ ހުށަހަޅައި ބަހުސް ފަށަން ބޭނުން ވަނީ 22 މެންބަރުންގެ ސޮޔެވެ. ޖުމްލަ 87 މެމްބަރުން އެކުލެވޭ މަޖިލީހުގައި ނަޝީދު ނުހިމަނައި، އެމްޑީޕީ ތަމްސީލުކުރާ 65 މެމްބަރުން ތިއްބަވައެވެ.