އިލެކްޝަންސް ކޮމިޝަނުން ބާއްވާ އިންތިޚާބުތަކުގައި ވާދަކުރާ ކެނޑިޑޭޓުން ކެމްޕެއިން ކުރުމުގައި ރިޝްވަތަށް މަގުފަހިވާގޮތަށް ހިންގާ ކަންކަމާއި، ވަޢުދުތައް ވަކިވާނެ ގޮތަކަށް އިންތިހާބުތަކާބެހޭ އާއްމު ޤާނޫނަށް އިސްލާހު ގެނައުމަށް ހުށަހަޅައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި އާންމު އިންތިހާބުތަކާ ބެހޭ ގާނޫނަށް މި އިސްލާހު ހުށަހަޅުއްވާފައިވަނީ ސަރުކާރުގެ ފަރާތުން ހެންވެއިރު އުތުރު ދާއިރާގެ މެންބަރު އިބްރާހިމް މުއިއްޒެވެ.

މިބިލުގައި އިންތިޚާބަކާއި ގުޅިގެން ކެނޑިޑޭޓަކު އެކެނޑިޑޭޓުގެ އާންމު ތަސައްވަރެއް ނުވަތަ ސިޔާސަތެއް ހާމަކުރާ ކުރުން ފިޔަވައި އެނޫން ގޮތަކަށް ވަކި ފަރުދަކަށް އާންމު ޖަމާއަތަކަށް މަންފާ ވާނޭގޮތަކަށް ސީދާ ގޮތުން ވިޔަސް އަދި ނުސީދާ ގޮތުން ވިޔަސް ފައިސާއާއި އެނޫން އިނާޔަތެއް ދިނުމަކީވެސް ރިޝްވަތުގެ ގޮތުގައި ބަލެވޭނެކަމަށް ވަނީ ބުނެފައެވެ. އޭގެ ތެރޭގައި ވަޒީފާގެ ނުފޫޒާއި އެނޫން ކަންކަންވެސް ހިމެނޭކަމަށް މިއިސްލާހުގައި ބުނެފައިވެއެވެ.

ގާނޫނަށް ހުށަހަޅާފައިވާ އިސްލާހުތަކުގެ ތެރޭގައި ރަސްމީ އިންތިހާބީ އޭޖެންޓް މަރުވުުން، އިސްތިއުފާ ދިނުން ނުވަތަ ވަކިކުރުމުން އެކަން އިލެކްޝަންސް ކޮމިޝަނަށް އަންގަންޖެހޭ މުއްދަތަށް ބަދަލު ގެނައުން ހިމެނެއެވެ. އެގޮތުން ރަސްމީ އިންތިހާބީ އޭޖެންޓް މަރުވުން، އިސްތިއުފާ ދިނުން ނުވަތަ ވަކިވެއްޖެ ނަމަ ގިނަވެގެން 48 ގަޑިއިރުގެ ތެރޭގައި އެކަން އިލެކްޝަންސް ކޮމިޝަނަށް އެންގުމަށް ވަނީ އިސްލާހު ހުށަހަޅާފައެވެ.

މަރުކަޒަކަށް ވޯޓުލުމަށް ރަޖިސްޓަރީވެފައިވާ މީހުންގެ އަދަދުގެ އެއް ޕަސަންޓްއަށްވުރެ އިތުރުނުވާ އަދަދެއްގެ ވޯޓު ކަރުދާސް ފޮނުވަންވާނެ ކަމަށް އޮތް އޮތުމަށް ވަނީ އިސްލާހު ހުށަހަޅާފަ އެވެ. އިސްލާހު ހުށަހަޅާފައިވަނީ، މަރުކަޒަކަށް ވޯޓުލުމަށް ރަޖިސްޓްރީވެފައިވާ މީހުންގެ އަދަދު 100 މީހުންނަށްވުރެ މަދުނަމަ ގިނަވެގެން އިތުރަށް އެއް ވޯޓު ކަރުދާސް ފޮނުވުމަށެވެ.

ވޯޓުނަގާ ދުވަހު ވޯޓުލުމުގެ ކަންތައްތައް މޮނިޓާކުރުމަށް ވޯޓުލާ ސަރަހައްދުތަކާއި ވޯޓު ގުނާ ތަންތަނުގައި ހަރަކާތްތެރިވެވޭނީ އިލެކްޝަންސް ކޮމިޝަނުން ހުއްދަ ދޭ، ރަޖިސްޓްރީކޮށްފައިވާ ނޫސްވެރިންނަށް ހެދުމަށް ވަނީ ހުށަހަޅާފައެވެ. ވޯޓުލާ މަރުކަޒުތަކުން ވޯޓާބެހޭ ތަކެތި މާލޭގައި ހުންނަ ވޯޓާބެހޭ މައި މަރުކަޒަށް ފޮނުވާނީ އިލެކްޝަންސް ކޮމިޝަނުން ކަނޑައަޅާ މަދުވެގެން ތިން މީހުންގެ ހަވާލުގައި ކަމަށް އޮތް އޮތުން ދެ މީހުންނަށް ބަދަލުކުރަން ހުށަހަޅާފައިވެއެވެ.

ކެންޑިޑޭޓުންގެ މާލީ ބަޔާން އިންތިހާބު ބާއްވާ ތާރީހުން ފެށިގެން 21 ދުވަހުގެ ތެރޭގައި މިހާރު އިލެކްޝަންސް ކޮމިޝަނަށް ހުށަހަޅަން ޖެހޭއިރު އެ މުއްދަތު އެއް މަސް ދުވަހަށް ބަދަލުކުރަންވެސް ވަނީ ހުށަހަޅާފައެވެ.