އިޒްރާއީލުން ފަލަސްތީނުގައި މަރާލާފައިވާ، އަލްޖަޒީރާގެ ނޫސްވެރިޔާ، ޝީރީން އަބޫ އަކްލޭހުގެ މަރުގެ މިނިވަން ތަހުގީގެއް އެމެރިކާއިން ބޭނުންވާކަމަށް އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން ވިދާޅު ވެއްޖެއެވެ.
އަލްޖަޒީރާގެ މަޝްހޫރު ޖާނަލިސްޓް، އަދި އެމެރިކާ ދަރިކޮޅުގެ ފަލަސްތީނު ރައްޔިތެއް ކަމުގައިވާ އަބޫ އަކްލޭހު އިޒްރާއީލު ސިފައިން ދިން ބަޑީގެ ހަމަލާއެއްގައި މަރުވެފައިވަނީ ފާއިތުވެދިޔަ މޭމަހުގެ 11 ވނަ ދުވަހުއެވެ.
އިޒްރާއީލު ސިފައިން އޭނާ މަރާލާފައިވަނީ، ހިފާފައިވާ ހުޅަނގު އައްސޭރީގެ ޖެނިން ރެފިއުޖީ ކޭމްޕުގައި އިޒްރާއީލު ސިފައިން ކުރިޔަށް ގެންދިޔަ އަޕަރޭޝަނެއް އޭނާ ކަވަރު ކުރަމުން ދަނިކޮށެވެ.
އަބޫ އަކްލޭހުގެ މަރުގެ ހަދިސާގެ މިނިވަން ތަހުގީގަކަށް ބްލިންކަން ބުރާސްފަތި ދުވަހު ގޮވާލައްވާފައި މިވަނީ، މިމަރުގެ ތަހުގީގު ހިންގަންވަނާނީ އިސްރާއީލް އިސްވެ އޮވެކަމަށް އެމެރިކާގެ ރައީސް ޖޯ ބައިޑްން ވިދާޅުވެފައި ވަނިކޮށެވެ. އަދި ބައެއް ފަރާރްތަކުން ދަނީ އެމެރިކާގެ ޖާސޫސީ އިދާރާ އެފްބީއައިއިން އެ މުވައްސަސާގެ ވަކި ތަހުގީގެއް ހިންގުމަށްވެސް ގޮވާލަމުންނެވެ.
ލޮސް އެންޖްލްސްގައި މިހާރު ކުރިޔަށްދާ ލެޓިން އެމެރިކާ ސަމިޓްގެ ހަވާސާގައި އޮތް ފޯރަމް ފޯރ ސްޓޫޑަންޓް ޖާނަލިސްޓްގައި، އިންޑެޕެންޑެންޓް ޑޮކިއުމަންޓްރީ އެންޑް އިންޓަވިވް ސީރީސް، ދަ އެމްޕަޔަރ ފައިލްސްގެ ހޯސްޓް އައްބީ މާޓިންވަނީ، އަބޫ އަކްލޭޚްގެ މަރާއި ގުޅިގެން އިޒްރާއީލް ޖަވާބުދާރީ ކުރުވުމަށް އެއްވެސް މަސައްކަތެއް ނުކުރެވެނީ ކީއްވެތޯ ބްލިންކަންއާއި ސުވާލު ކޮށްފައެވެ.
"އަހަރެމެން ބޭނުންވަނީ މިނިވަން ތަހުގީގެއް. އެ ތަހުގީގު ނިމުމުން ފެންނަން ހުރި ހަގީގަތްތަކުގެ މައްޗަށް އަހަރެމެން ބަލާނަން. އެއީ ވަރަށް ސާފުކޮށް އެކަން އޮތް ގޮތް،" ބްލިންކަން ވިދާޅުވިއެވެ.
"ޝީރީންގެ ވަކިވެ ދިއުމަކީ ލިބުނު ވަރަށް ބޮޑު ހިތާމައެއް. އޭނާއަކީ ވަރަށް ކުޅާދާނަ ނޫސްވެރިއެއް. އަދި އެމެރިކާގެ ރައްޔިތެއްވެސްމެ،" ބްލިންކަން އިތުރަށް ވިދާޅުވިއެވެ.
ބްލިންކަން ވިދާޅުވި ގޮތުގައި މި ހާދިސާގެ ހަގީގަތްތަކާއި ހަމައަށް އަދި ދަތުރު ކުރެވިފައެއް ނުވެއެވެ.
އެހެންނަމަވެސް މިހާދިސާ ލޮލުން ދެކުނު ފަރާތްތަކާއި، މީީޑިއާތަކުން އޭގެ ފަހުން ކޮށްފައިވާ ތަހުގީގުތަކުންނާއި، އަދި އިންސާނީ ހައްގުތަކަށް މަސައްކަތްކުރާ އެތަކެއް ޖަމިއްޔާތަކުންވެސް ވަނީ އަބޫ އަކްލޭހު މަރުވެފައިވަނީ އިސްރާއީލުން ދިން ބަޑީގެ ހަމަލާތަކުގައި ކަމުގައި ބުނެފައެވެ. އަދި އަލްޖަޒީރާއިން ބުނެފައިވަނީ އިސްރާއިލް ސިފައިން އެ ނެޓްވާކުގެ ނޫސްވެރިޔާ މަރާލާފައިވަނީ ގަސްތުގައި ކަމުގައެވެ.
އަބޫ އަޤްލީހުއަކީ، އަލް ޖަޒީރާގެ އަރަބި ނިއުސް ސާވިސްގެ އެންމެ މަޝްހޫރު އެއް ނޫސްވެރިޔާއެވެ. އަދި އޭނާ ވަނީ އިސްރާއިލް ފަލަސްތީނު މައްސަލައިގެ ޚަބަރުތައް ފާއިތުވި 15 އަހަރު ކަވަރު ކޮށްފައެވެ.
